កីឡាជាតិ
ជាតិ
ស្រួង ភារី ឈ្នះជើងឯកស្នូកឃ័រក្នុងព្រឹត្តិការណ៍ដែលមានកូរ៉េ៩នាក់ និងជប៉ុន៦នាក់ទៀតចូលរួម ស្រួង ភាវី និងជ័យលាភីបីនាក់ទៀតរួមមាន Kim Bo Mi, Lee Mee Rae និង Ayako Sakai។ រូបថត KBF
× កីឡាការិនីស្នូកឃ័រ ស្រួង ភាវី បានឈ្នះជើងឯកក្នុងព្រឹត្តិការណ៍ Zanca 1st Asian Championship Ladies-3 Cushion ក្រោមការរៀបចំរបស់សហព័ន្ធកីឡាប៊ីយ៉ាកូរ៉េ (Korea Billiards Federation) ពីថ្ងៃទី២៤ ដល់ថ្ងៃទី២៦ ខែវិច្ឆិកា នៅ Seoul Olympic Parktel ក្រុងសេអ៊ូល ប្រទេសកូរ៉េខាងត្បូង។
ភាវី ដែលមានមូលដ្ឋាននៅកូរ៉េខាងត្បូង ជាកីឡាការិនីខ្មែរតែម្នាក់គត់ ក្នុងចំណោមកីឡាការិនី១៦រូបដែលបានចូលរួមក្នុងព្រឹត្តិការណ៍ Zanca 1st Asian Championship Ladies-3 Cushion ដោយសមាសភាព១៥រូបទៀត មានកីឡាការិនីកូរ៉េខាងត្បូង៩នាក់ និងជប៉ុន៦នាក់។
កីឡាការិនីកម្ពុជារូបនេះ ស្ថិតនៅក្នុងពូល C ជាមួយកីឡាការិនីកូរ៉េ Kim Min A, Lee Shing Yong និងកីឡាការិនីជប៉ុន Yuko Nishimoto។ ភារី អាយុ២៨ឆ្នាំ បានប្រកួតឈ្នះជាបន្តបន្ទាប់រហូតដល់វគ្គផ្តាច់ព្រ័ត្រ និងក្លាយជាម្ចាស់ជើងឯកក្នុងព្រឹត្តិការណ៍អន្តរជាតិដែលរៀបចំជាលើកដំបូងដោយសហព័ន្ធកីឡាប៊ីយ៉ាកូរ៉េ។
ជាមួយពានជើងឯក ភាវី ទទួលបានប្រាក់រង្វាន់ចំនួន២០០០ដុល្លារអាមេរិក។ កីឡាការិនីកូរ៉េខាងត្បូង Kim Bo Mi បាន១២០០ដុល្លារអាមេរិកសម្រាប់ចំណាត់ថ្នាក់លេខ២ ខណៈ Lee Mee Rae (កូរ៉េខាងត្បូង) និង Ayako Sakai (ជប៉ុន) បានម្នាក់ចំនួន៦០០ដុល្លារសម្រាប់ចំណាត់ថ្នាក់លេខ៣ស្ទួន។ កីឡាការិនី៤នាក់ទៀត (លេខ៥ ឬក្នុងចំណោម Top 8) រួមមាន Lim Jung Suk (កូរ៉េខាងត្បូង), Orie Hida (ជប៉ុន), Kim Se Yeon (កូរ៉េខាងត្បូង), Kim Min A (កូរ៉េខាងត្បូង) បានម្នាក់ចំនួន៤០០ដុល្លារអាមេរិក។
ស្រួង ភាវី ជាកីឡាការិនីស្នូកឃ័រ-ប៊ីយ៉ាម្នាក់ដ៏មានសក្តានុពលលើវិញ្ញាសា Ladies-3 Cushion តាមរយៈការឈ្នះជើងឯកជាច្រើនក្នុងព្រឹត្តិការណ៍ដែលរៀបចំនៅកូរ៉េខាងត្បូង។ បន្ថែមលើនេះ កីឡាការិនី ភាវី ធ្លាប់បានលេខពីរក្នុងព្រឹត្តិការណ៍អន្តរជាតិ Jennifer Shim International នៅក្រុងញូវយ៉ក សហរដ្ឋអាមេរិក កាលពីឆ្នាំ២០១៥ និងបានលេខ៣ក្នុងព្រឹត្តិការណ៍ពិភពលោក World Championship Ladies នៅក្រុង Izmir ប្រទេសតួកគី កាលពីខែកញ្ញា ឆ្នាំ២០១៨ កន្លងទៅនេះ៕
© រក្សាសិទ្ធិដោយ thmeythmey.com