កីឡាអន្តរជាតិ
អន្តរជាតិ
អំពើហិង្សានាំឲ្យជំនួបផ្តាច់ព្រ័ត្រ Copa Libertadores ត្រូវលេងក្រៅប្រទេសអាហ្សង់ទីន
× ការប្រកួតវគ្គផ្តាច់ព្រ័ត្រជើងទី ២ នៃពានរង្វាន់ Copa Libertadores រវាងគូប្រជែងកំណាចក្នុងស្រុក River Plate និង Boca Juniors នឹងត្រូវលើកពេលទៅខែក្រោយ ហើយត្រូវលេងនៅក្រៅប្រទេសអាហ្សង់ទីនថែមទៀត បន្ទាប់ពីមានអំពើហិង្សាធ្ងន់ធ្ងរកើតឡើង។ នេះបើតាមការបញ្ជាក់របស់អ្នកគ្រប់គ្រងកីឡាបាល់ទាត់អាមេរិកឡាទីន នៅថ្ងៃទី២៨ ខែវិច្ឆិកា។
បន្ទាប់ពីកិច្ចប្រជុំជាមួយប្រធានក្លិបយក្សនៃលីគកីឡាបាល់ទាត់កំពូលរបស់អាហ្សង់ទីនទាំងពីរ នៅឯរដ្ឋធានី Asuncion ប្រទេសប៉ារ៉ាហ្គាយរួចមក សហព័ន្ធកីឡាបាល់ទាត់អាមេរិកឡាទីន (Conmebol) បានសម្រេចថាការប្រកួតរបស់ក្រុមទាំងពីរនឹងប្រព្រឹត្តទៅនៅថ្ងៃទី ៨ ឬទី ៩ ខែធ្នូខាងក្រៅប្រទេសអាហ្សង់ទីន ប៉ុន្តែកីឡដ្ឋានប្រកួតនៅមិនទាន់សម្រេចនៅឡើយ។
ការពន្យាពេលសម្រាប់ការប្រកួតរវាងក្រុមដែលមានមូលដ្ឋានក្នុងក្រុង Buenos Aires ទាំងពីរនេះ គឺបន្ទាប់ពីក្រុមកីឡាកររបស់ Boca Juniors បានរងរបួសក្នុងការវាយប្រហារទៅលើឡានក្រុងរបស់ពួកគេពីសំណាក់អ្នកគាំទ្ររបស់ River Plate ដែលប្រើស្ព្រាយបាញ់ កប់ដុំថ្ម និងវាយនឹងដំបងជាដើម។
ការប្រកួតជើងទី១រវាងក្រុមទាំងពីរបញ្ចប់ទៅក្នុងលទ្ធផល ២-២ ដែលធ្វើឡើងក្នុងកីឡដ្ឋាន Bombonera របស់ Boca កាលពី២សប្តាហ៍មុន។
ប្រធាន Conmebol លោក Alejandro Dominguez បានប្រាប់អ្នកយកព័ត៌មានថា ការប្រកួតវគ្គផ្តាច់ព្រ័ត្រជើងទី២មិនអាចលេងបាននៅប្រទេសអាហ្សង់ទីនទេ ព្រោះអ្នកគាំទ្រ River Plate នឹងបង្កចលាចលបន្តទៀតនៅទឹកដីរបស់ពួកគេ។
Conmebol អះអាងថាដោយសារ «អំពើហឹង្សា ... ដែលធ្វើឲ្យកីឡាករ ក្រុមមន្ត្រី និងអ្នកគាំទ្រមានគ្រោះថ្នាក់ ... វានឹងមិនមានសុវត្ថិភាពឡើយប្រសិនបើបន្តប្រកួតក្នុងប្រទេសអាហ្សង់ទីនទៀតនោះ»។
យ៉ាងណោក៏ដោយ ខាងភាគីពីប្រេស៊ីល អ៊ីតាលី និងប៉ារ៉ាហ្គាយ បានអនុញ្ញាតផ្តល់ទីតាំងប្រកួតសម្រាប់ក្រុមទាំងពីរ៕
Tag:
បាល់ទាត់
River Plate
Boca Juniors
Copa Libertadores
© រក្សាសិទ្ធិដោយ thmeythmey.com