មហាផ្ទៃ បង្កើតក្រុមការងារ ដើម្បីរៀបចំកិច្ចប្រជុំពន្លឿននីតិវិធីតុលាការ

ជាតិ

សង្គមជាតិ

មហាផ្ទៃ បង្កើតក្រុមការងារ ដើម្បីរៀបចំកិច្ចប្រជុំពន្លឿននីតិវិធីតុលាការ

29, Nov 2018 , 8:19 pm

រូបភាព

ដោយ: ថ្មីៗ

សម្តេច ស ខេង រដ្ឋមន្ត្រីក្រសួងមហាផ្ទៃ បានចេញសេចក្តីសម្រេចមួយនៅថ្ងៃទី២៧ ខែវិឆ្ឆិកា ឆ្នាំ២០១៨ ស្តីពីការបង្កើតក្រុមងាររៀបចំខ្លឹមសារកិច្ចប្រជុំ ពន្លឿននីតិវិធីជំនុំជម្រះនិងចេញសាលក្រមឬសាលដីកាស្ថាពរ។

បើយោងតាមសេចក្តីសម្រេចខាងលើ លោក សក់ សេដ្ឋា រដ្ឋលេខាធិការក្រសួងមហាផ្ទៃ ជាប្រធាននៃក្រុមការងារនេះ ដោយអមជាមួយអនុប្រធាន២រូប គឺលោក ប៉ាវ ហមផាន រដ្ឋលេខាធិការក្រសួងមហាផ្ទៃ និង លោក កើត រិទ្ធ រដ្ឋលេខាធិការក្រសួងយុត្តិធម៌។

ចំណែកសមាជិកនៃក្រុមការងារនេះ មាន៨រូប គឺ លោក ប៊ុន ហ៊ុន រដ្ឋលេខាធិការក្រសួងមហាផ្ទៃ លោក ឡាំ ជា រដ្ឋលេខាធិការក្រសួងមហាផ្ទៃ លោក ជិន ម៉ាលីន អនុរដ្ឋលេខាធិការក្រសួងយុត្តិធម៌ លោក នេត សាវឿន អគ្គស្នងការនគរបាលជាតិ លោក ចាន់ គឹមសេង អគ្គនាយកនៃអគ្គនាយកដ្ឋានពន្ធនាគារ លោក ខាន់ វណ្ណៈ អគ្គាធិការនៃអគ្គាធិការដ្ឋានក្រសួងយុត្តិធម៌ លោក ចៅ សុធី អគ្គលេខាធិការរងនៃអគ្គលេខាធិការដ្ឋានក្រសួងមហាផ្ទៃ និងលោក សុច សុផាន់ណារ៉ា អគ្គនាយករងនៃអគ្គនាយកដ្ឋានកិច្ចការអយ្យការនិងព្រហ្មទណ្ឌនៃក្រសួងយុត្តិធម៌។

សេចក្តីសម្រេចរបស់រដ្ឋមន្ត្រីក្រសួងមហាផ្ទៃ បានចែងថា ក្រុមការងារនេះ មានភារកិច្ចរៀបចំតាក់តែងចងក្រងឯកសារពាក់ព័ន្ធដល់ដំណើរការនៃកិច្ចប្រជុំក្នុងគោលដៅជំរុញពិន្យិនីតិវិធី ឲ្យសាលាជម្រះក្តីគ្រប់ជាន់ថ្នាក់ ដើម្បីពន្លឿននីតិវិធីជំនុំជម្រះក្តី និងចេញសាលក្រមឬសាលដីកាស្ថាពរ។ សេចក្តីសម្រេចដដែល បញ្ជាក់ថា ក្រោយរៀបចំឯកសាររួចហើយ ប្រធានក្រុមការងារ ត្រូវបញ្ជូនទៅរដ្ឋមន្ត្រីក្រសួងមហាផ្ទៃ ដើម្បីពិនិត្យនិងសម្រេច៕