អ៊ុយក្រែនស្នើឲ្យណាតូបញ្ជូននាវាចម្បាំងទៅកាន់សមុទ្រអាហ្សូវ ដើម្បីទប់ទល់រុស្ស៊ី

អន្តរជាតិ

អ៊ុយក្រែនស្នើឲ្យណាតូបញ្ជូននាវាចម្បាំងទៅកាន់សមុទ្រអាហ្សូវ ដើម្បីទប់ទល់រុស្ស៊ី

29, Nov 2018 , 10:39 pm

រូបភាព

ដោយ:

ប្រធានាធិបតីអ៊ុយក្រែន Petro Poroshenko នៅថ្ងៃទី ២៩ ខែវិច្ឆិកា បានស្នើឲ្យសមាជិកអង្គការណាតូ ជាពិសេសអាល្លឺម៉ង់ បញ្ជូននាវាចម្បាំងទៅកាន់សមុទ្រអាហ្សូវ (Azov) ដើម្បីជួយដល់អ៊ុយក្រែនពេលប្រឈមមុខនឹងរុស្ស៊ី។ មេដឹកនាំនេះសង្ឃឹមថា អាល្លឺម៉ង់ដែលជាមានទំនាក់ទំនងជិតស្និទ្ធជាមួយអ៊ុយក្រែន រួមជាមួយមិត្តជាសមាជិកណាតូផ្សេងៗទៀត នឹងជួយអ៊ុយក្រែនក្នុងរឿងនេះបាន។

ទាក់ទងនឹងការប្រឈមមុខដាក់គ្នារវាងរុស្ស៊ី និងអ៊ុយក្រែននៅសមុទ្រអាហ្សូវកាលពីសប្តាហ៍មុន ប្រធានាធិបតីអ៊ុយក្រែន Poroshenko បានលើកឡើងថា លោកមិនអាចទទួលយកសកម្មភាពខុសច្បាប់របស់រុស្ស៊ីបានឡើយ។ ដំបូងរុស្ស៊ីបានលេបត្របាក់ទឹកដីគ្រីមៀកាលពីឆ្នាំ២០១៤ បន្ទាប់មកបន្តលូកដៃនៅក្នុងជម្លោះភាគខាងកើត។ ហើយឥឡូវនេះ ក្រុងមូស្គូចង់បានសមុទ្រអាហ្សូវថែមមួយទៀត។

ថ្លែងទៅកាន់កាសែត Bild daily របស់អាល្លឺម៉ង់នាថ្ងៃព្រហស្បតិ៍ ទី ២៩ ខែវិច្ឆិកាលោក Poroshenko បានគូសបញ្ជាក់ថា៖ «អាល្លឺម៉ង់ជាមិត្តដ៏ស្និទ្ធស្នាលបំផុតមួយរបស់យើង ហើយយើងសង្ឃឹមថា បណ្តារដ្ឋផ្សេងទៀតនៅក្នុងអង្គការណាតូត្រៀមខ្លួនបញ្ជូននាវាចម្បាំងទៅកាន់សមុទ្រអាហ្សូវ ដើម្បីជាជំនួយផ្នែកសន្តិសុខដល់អ៊ុយក្រែនផង»។

យោងតាមទីភ្នាក់ងារព័ត៌មាន AFP ក្រុងគៀវ បានចោទថា មូស្គូកំពុងឈានទៅរកដំណាក់កាលប្រឈមមុខដាក់គ្នាថ្មីមួយទៀត។ ម្យ៉ាងវិញទៀត លោក Poroshenko បានអះអាងថា៖«លោក ពូទីន ចង់បង្រួបបង្រួមអតីតអាណាចក្ររុស្ស៊ីឡើងវិញ។ កន្លងមកតំបន់គ្រីមៀ និង តំបន់ Donbas ហើយពូទីន ចង់បានប្រទេសយើងទាំងមូលតែម្តង។ ពូទីនចាត់ទុកខ្លួនឯងថា ជាអធិរាជនៃអាណាចក្ររុស្ស៊ី។ ដូច្នេះអាណាចក្រនេះ ពុំអាចដំណើរការបានឡើយដោយគ្មានអ៊ុយក្រែននោះ»។

អត្ថបទទាក់ទង

លោកខាងលិចអាចចេញវិធានការក្តៅប្រឆាំងរុស្ស៊ី ក្រោយការប៉ះទង្គិចគ្នាជាមួយទ័ពអ៊ុយក្រែននៅសមុទ្រ Azov

តាមពិតទៅ ការប្រកាសសុំជំនួយផ្នែកសន្តិសុខរបស់ប្រធានាធិបតីអ៊ុយក្រែន ពីអង្គការណាតូនេះគឺធ្វើឡើង បន្ទាប់ពីទីក្រុងមូស្គូកាលពីថ្ងៃទី២៨ ខែវិច្ឆិកា បានប្រកាសនឹងបញ្ជូនប្រព័ន្ធខែលការពារមីស៊ីល S-400 ទៅកាន់តំបន់គ្រីមៀក្នុងពេលឆាប់ៗខាងមុខនេះ។

ជុំវិញរឿងនេះ សហភាពអឺរ៉ុបបានថ្កោលទោសយ៉ាងខ្លាំង ទៅលើសកម្មភាពរបស់រុស្ស៊ី ប៉ុន្តែក្រោយពីការតស៊ូមតិអស់រយៈពេល៣ថ្ងៃមក ខ្លួននៅតែបរាជ័យក្នុងការសម្រេចបន្ថែមទណ្ឌកម្មប្រឆាំងរុស្ស៊ីដដែល។

គួររម្លឹកថា កាលពីថ្ងៃអាទិត្យកន្លងទៅ យោធារុស្ស៊ីបានបាញ់រះ និងឃាត់ទុកនាវាអ៊ុយក្រែនចំនួន ៣គ្រឿង ក្រោយពីនាវាទាំងនោះបានធ្វើដំណើរចូលទៅកាន់សមុទ្រអាហ្សូវ។ ជុំវិញរឿងនេះ ទីក្រុងមូស្គូបានចោទប្រកាន់កងនាវាអ៊ុយក្រែនទាំងនោះថា បានចូលទៅកាន់សមុទ្រនេះដោយខុសច្បាប់។

យ៉ាងណាមិញ ប្រធានអង្គការណាតូ លោក Jens Stoltenberg កាលពីថ្ងៃចន្ទ បានទាមទារឲ្យរុស្ស៊ី ដោះលែងក្រុមនាវិក និង នាវាអ៊ុយក្រែនទាំងបីគ្រឿងនេះវិញ ព្រមទាំងបានព្រមានក្រុងមូស្គូផងដែរថា សកម្មភាពរបស់ខ្លួនបែបនេះអាចប្រឈមនឹងផលវិបាកនៅថ្ងៃខាងមុខផង៕