អន្តរជាតិ
លោក គីម ជុងអ៊ុន អាចនឹងថ្លែងទៅកាន់សភាកូរ៉េខាងត្បូង ពេលទស្សនកិច្ចនៅសេអ៊ូល?
×![]()
ដោយ: តន ចាន់រិទ្ធារ៉ា
សេអ៊ូល៖ ក្នុងខែកញ្ញា ប្រធានាធិបតីកូរ៉េខាងត្បូង មូន ចេអ៊ីន បានថ្លែងសុន្ទរកថាចំពោះមុខប្រជាជនកូរ៉េខាងជើង១៥ម៉ឺននាក់ក្នុងព្យុងយ៉ាង។ នាជំនួបមេដឹកនាំអន្តរកូរ៉េលើកទីបី មេដឹកនាំកូរ៉េទាំងពីរក៏ព្រមព្រៀងថា ដល់វេនលោក គីម ជុងអ៊ុន ធ្វើទស្សនកិច្ចនៅកូរ៉េខាងត្បូងវិញម្ដងអំឡុងពេលឆាប់ៗមុខ។ អ្វីគេរង់ចាំមើលនោះ គឺលោក គីម នឹងថ្លែងទៅកាន់កិច្ចប្រជុំសភាកូរ៉េខាងត្បូងឬយ៉ាងណា ខណៈមន្ត្រីជាន់ខ្ពស់កូរ៉េខាងត្បូងនិយាយថា បើជាការពិត វានឹងជួយដល់ស្ថានការណ៍នៅឧបទ្វីបកូរ៉េ។
នាជំនួបលើកទី៣ នៅរដ្ឋធានីព្យុងយ៉ាងកាលពីខែកញ្ញា មេដឹកនាំកូរ៉េខាងជើង គីម ជុងអ៊ុន បានឯកភាពជាមួយប្រធានាធិបតីកូរ៉េខាងត្បូង មូន ចេអ៊ីន ថា លោកនឹងធ្វើទស្សនកិច្ចនៅកូរ៉េខាងត្បូងអំឡុងឆ្នាំ២០១៨ នេះ។ បើកើតឡើងមែននោះ លោក គីម នឹងក្លាយជាមេដឹកនាំកូរ៉េខាងជើងទីមួយដែលជាន់ទឹកដីសេអ៊ូលចាប់តាំងពីកូរ៉េទាំងពីរបែកបាក់គ្នាមក។
អ្វីគួរឲ្យចាប់អារម្មណ៍នោះ លោក មូន បានថ្លែងសុន្ទរកថារយៈពេល៧នាទីទៅកាន់ប្រជាជនកូរ៉េខាងត្បូង១សែន៥ម៉ឺននាក់ដែលប្រមូលផ្ដុំគ្នាក្រោមសីតុណ្ហភាពត្រជាក់ក្នុងពហុកីឡដ្ឋានជាតិក្នុងរដ្ឋធានីព្យុងយ៉ាង។ ក្រោមសម្រែកជ័យឃោស និងការទះដៃកងរំពង លោក មូន បានក្លាយជាប្រធានាធិបតីកូរ៉េខាងត្បូងដំបូងគេដែលថ្លែងជាសាធារណៈបែបនេះនៅកូរ៉េខាងជើង។ គេរំពឹងថា លោក គីម ក៏នឹងអាចធ្វើបែបនេះដែរ ពេលទៅសេអ៊ូលនោះ។
មន្ត្រីកំពូលកូរ៉េខាងត្បូងម្នាក់មិនសុំបញ្ចេញអត្តសញ្ញាណនៅថ្ងៃទី២៨ ខែវិច្ឆិកា និយាយថា វាជារឿងល្អបើប្រធានគណៈកម្មការកិច្ចការរដ្ឋកូរ៉េខាងជើងរូបនេះ អាចធ្វើទស្សនកិច្ចនៅកូរ៉េខាងត្បូងក្នុងឆ្នាំនេះ។ លើសពីនោះ លោក គីម ក៏អាចថ្លែងជាសាធារណៈដូចដែលលោក មូន ធ្វើនៅព្យុងយ៉ាងដូច្នោះដែរ។ យ៉ាងណាមិញ ដោយសារក្រុងសេអ៊ូលពិបាកនឹងរៀបចំការប្រមូលទ្រង់ទ្រាយធំដូចនៅព្យុងយ៉ាងនោះ លោក គីម អាចថ្លែងទៅកាន់សភាវិញ។ មន្ត្រីដដែលនេះបញ្ជាក់ថា នេះជាឱកាសកម្រដែលលោក គីម ទំនងជាមិនប្រកែកឡើយ។
យ៉ាងណាក្ដី ការថ្លែងរបស់ប្រមុខដឹកនាំកូរ៉េខាងជើងក្នុងសភាកូរ៉េខាងត្បូង ក៏រងការមិនពេញចិត្តដែរ ពិសេសពីសំណាក់សមាជិកអភិរក្ស និងក្រុមប្រឆាំង ព្រោះវាប្រៀបដូចជាការទទួលស្គាល់ការដឹកនាំផ្ដាច់ការរបស់លោក គីម ដែរ។ ប៉ុន្តែមន្ត្រីជាន់ខ្ពស់កូរ៉េខាងត្បូងខាងលើសង្ឃឹមថា អ្នកប្រឆាំងនឹងរក្សាឥរិយាបថរបស់ខ្លួន និងមិនធ្វើអ្វីខុសឆ្គងឡើយ។
ជុំវិញគម្រោងទស្សនកិច្ចនៅកូរ៉េខាងត្បូងវិញ កាលបរិច្ឆេទនៅតែមិនទាន់កំណត់ច្បាស់នៅឡើយទេ។ ពីដំបូង លោក គីម ត្រូវបានរំពឹងថា នឹងធ្វើទស្សនកិច្ចក្នុងឆ្នាំនេះ ប៉ុន្តែដោយសារបញ្ហាពេលវេលានោះ អ្នកវិភាគជាច្រើនជឿថា គម្រោងទស្សនកិច្ចរបស់មេដឹកនាំកូរ៉េខាងជើងរូបនេះអាចលើកទៅឆ្នាំក្រោយវិញ៕
Tag:
កូរ៉េខាងត្បូង
កូរ៉េខាងជើង
គីម ជុងអ៊ុន
© រក្សាសិទ្ធិដោយ thmeythmey.com
