មហាផ្ទៃ នឹងពិចារណាសំណើសុំដាក់បញ្ចូលគ្រូបង្វឹកចាស់ៗរបស់អង្គភាពក្រសួង ចូលក្នុងក្របខណ្ឌរដ្ឋ

កីឡាជាតិ

ជាតិ

មហាផ្ទៃ នឹងពិចារណាសំណើសុំដាក់បញ្ចូលគ្រូបង្វឹកចាស់ៗរបស់អង្គភាពក្រសួង ចូលក្នុងក្របខណ្ឌរដ្ឋ

30, Nov 2018 , 2:46 pm

រូបភាព

លោក ហ៊ុយ វណ្ណៈ ថ្លែងក្នុងពិធីជួបសំណេះសំណាលជាមួយថ្នាក់ដឹកនាំ គ្រូបង្វឹក និងកីឡាករចំណុះឲ្យក្រសួងមហាផ្ទៃ, រូបភាពទាំងអស់ពីហ្វេសប៊ុកអង្គភាពកីឡាក្រសួងមហាផ្ទៃ

ដោយ:

ភ្នំពេញ៖ ក្រសួងមហាផ្ទៃ នឹងពិចារណាសំណើសុំដាក់បញ្ចូលគ្រូបង្វឹកចាស់ៗរបស់អង្គភាពកីឡាក្រសួង ចូលក្នុងក្របខណ្ឌរាជការ។ ការពិចារណារបស់ក្រសួងមហាផ្ទៃនេះ ធ្វើឡើងបន្ទាប់ពីមានការស្នើសុំពីលោក ជា ប៊ុនហេង ប្រធានអង្គភាពកីឡាក្រសួងមហាផ្ទៃ។

លោក ហ៊ុយ វណ្ណៈ រដ្ឋលេខាធិការក្រសួងមហាផ្ទៃទទួលបន្ទុកផ្នែកកីឡា មិនបដិសេធចំពោះសំណើរបស់លោក ជា ប៊ុនហេង ឡើយ ព្រោះលោក ក៏យល់ឃើញថា កីឡាករក៏អាចវិវត្តខ្លួន ទៅជាអ្នកធំ ឬថ្នាក់ដឹកនាំបានដែរ ឲ្យតែពួកគេខិតខំព្យាយាម និងយកចិត្តទុកដាក់ក្នុងការហ្វឹកហាត់។

ថ្លែងក្នុងពិធីជួបសំណេះសំណាលជាមួយថ្នាក់ដឹកនាំ គ្រូបង្វឹក និងកីឡាករនៃក្របខណ្ឌក្រសួងមហាផ្ទៃកាលពីថ្ងៃទី២៩ ខែវិច្ឆិកា លោក ហ៊ុយ វណ្ណៈ បាននិយាយដូច្នេះថា៖«ខ្ញុំព្រមទទួលយកនូវសំណូមពររបស់បង ជា ប៊ុនហេង ដែលគិតគូដល់គុណបំណាច់គ្រូបង្វឹករបស់យើង ដែលពួកគាត់បានតស៊ូ ពុះពារការលំបាកគ្រប់បែបយ៉ាង តាំងពីនៅជាកីឡាកររហូតដល់គ្រូបង្វឹក។ ដូច្នេះការឯកភាពនេះ គឺដើម្បីតបស្នង និងដឹងគុណពួកគាត់ ដែលសាងស្នាដៃជូនស្ថាប័នក្រសួងមហាផ្ទៃ និងប្រទេសជាតិ»។

ដ្បិតព្រមទទួលយកសំណើរនេះក៏ដោយ តែរដ្ឋលេខាធិការរូបនេះ ក៏មិនហ៊ានសន្យាថា នឹងជួយឲ្យគ្រូបង្វឹក ឬកីឡាករឆ្នើម អាចទទួលបានក្របខណ្ឌនេះ ១០០ភាគរយដែរ ។ ប៉ុន្តែលោកនឹងព្យាយាមប្រឹងប្រែងដោះស្រាយឲ្យអស់ពីលទ្ធភាព តាមរយៈការពិភាក្សាជាមួយថ្នាក់ដឹកនាំក្រសួងមហាផ្ទៃ។

លោកឧត្តមសេនីយ៍ឯក ជា ប៊ុនហេង ប្រធានអង្គភាពកីឡាក្រសួងមហាផ្ទៃ

ក្រៅពីផ្ដល់ក្តីសង្ឃឹមដល់គ្រូបង្វឹក និងកីឡាកររបស់អង្គភាពកីឡាក្រសួងមហាផ្ទៃហើយ លោក ហ៊ុយ វណ្ណៈ ក៏ជំរុញឲ្យកីឡាករទាំងអស់ ជាពិសេសយុវជនត្រូវខិតខំរៀនសូត្របង្កើនចំណេះដឹង ដើម្បីសម្រេចបំណងនេះនាពេលអនាគត។

ក្នុងកម្មវិធីជួបថ្នាក់ដឹកនាំ គ្រូបង្វឹក និងកីឡាករនេះ ក៏មានការប្រគល់ប្រាក់រង្វាន់លើកទឹកចិត្តដល់កីឡាករម្ចាស់ជ័យលាភីទៀតផង៕