ONE Championship
កីឡាជាតិ
ជាតិ
ចាន់ រតនា និងគុនខ្មែរ បានផ្លាស់ប្តូរជិវិតក្មេងប្រុសម្នាក់
× កីឡាករជើងចាស់គុនខ្មែរ ចាន់ រតនា ប្រចាំ ONE Championship សព្វថ្ងៃកំពុងហ្វឹកហាត់យ៉ាងសស្រាក់សស្រាំដើម្បីត្រៀមខ្លួនចូលក្នុងទ្រុងប្រដាល់នៃព្រឹត្តិការណ៍ ONE: DESTINY OF CHAMPIONS ថ្ងៃសុក្រ ទី៧ ខែធ្នូខាងមុខនេះ។ ថ្វីបើត្រូវឡើងទៅប្រកួតនៅក្រុងកូឡាឡាំពួរ ប្រទេសម៉ាឡេស៊ី ក៏ពិតមែន តែកីឡាករប្រដាល់វ័យ ៣២ឆ្នាំរូបនេះ នឹងមានកូនក្រុមពីក្លិបសិល្បៈ ក៏ដូចជានឹងមានអ្នកគាំទ្រជាច្រើនពីទីក្រុងភ្នំពេញចូលរួមជូនដំណើរផងដែរ។
ក្នុងចំណោមអ្នកគាំទ្រទាំងនោះក៏មានកុមារអាយុ១២ឆ្នាំម្នាក់មានឈ្មោះ សុខ សានដែរ។ សុខ សាន បានចាប់ផ្តើមចូលហ្វឹកហាត់កីឡាក្បាច់គុនតាំងពីអាយុ ៨ ឆ្នាំមកម្លេះ ហើយក្នុងរយៈពេល៣ឆ្នាំចុងក្រោយនេះ គេបានហ្វឹកហាត់ជាមួយលោកគ្រូ ចាន់ រតនា។ សាន រំលឹកថា៖ «ពេលខ្ញុំជិះម៉ូតូជាមួយប៉ាម៉ាក់ ខ្ញុំក៏ឃើញក្លិបប(សិល្បៈ) ហ្នឹង។ ខ្ញុំចូលទៅសួរចង់ដឹងថាគេហាត់ក្បាច់គុនអត់ ហើយនិងព័ត៌មានផ្សេងៗ។ រួចខ្ញុំសុំប៉ាចូលហាត់តែម្តងទៅ គាត់ក៏ជំរុញខ្ញុំឲ្យហាត់ដែរ»។
ឥឡូវនេះសុខ សាន មកហាត់ក្បាច់គុននៅក្លិបសិល្បៈ ៥ ដងក្នុងមួយសប្តាហ៍។ ដោយមានលោកគ្រូ រតនា បង្ហាត់ផ្ទាល់ ឃើញថាសមត្ថភាព សុខ សាន មានការរីកចម្រើនខ្លាំងមិនគួរឲ្យជឿ ជាពិសេសបានជួយដល់សុខភាពរបស់គេបានគ្រាន់បើជាងមុនឆ្ងាយ។ សាន រៀបរាប់ថា៖ «ខ្ញុំកើតជំងឺហឺត ពេលណាខ្ញុំខ្អកម្តងៗខ្ញុំដង្ហក់ខ្លាំងណាស់»។ មិនត្រឹមតែជួយដល់សុខភាពខ្លាំងនោះទេ គាត់បានចេះក្បាច់ការពារខ្លួន និងមានជំនឿចិត្តលើខ្លួនឯងខ្លាំងណាស់ដែរ។ សុខ សាន ត្រូវគេធ្វើបាបដូចក្មេងៗដទៃអញ្ចឹង ប៉ុន្តែបន្ទាប់ពីបានហាត់រៀនក្បាច់គុនជាមួយគ្រូ ចាន់ រតនា មករូបគេចេះស្នៀតការពារខ្លួនជាច្រើន ហើយក៏មានសីលធម៌ក្នុងខ្លួនខ្ពស់ណាស់ដែរ។
សាន និយាយបន្ត៖ «នៅសាលា មានក្មេងៗខ្លះធ្លាប់មកបង្អាប់ខ្ញុំ ធម្មតាខ្ញុំមិនដែលនិយាយអីទៅវិញទេ ខ្ញុំដើរចេញតែម្តង។ តែឥឡូវវិញ គេអត់ហ៊ានជាមួយខ្ញុំទេ ព្រោះខ្ញុំអត់ខ្លាច»។
ឱកាសដែលបានហ្វឹកហាត់ជាមួយនិមិត្តរូបគុនខ្មែរមួយរូប បានជម្រុញទឹកចិត្តខ្លាំងដល់សុខ សាន។ កូនសិស្សគុនខ្មែរវ័យក្មេងម្នាក់នេះ មានគំរោងដើរតាមគន្លងរបស់និមិត្តរូបរបស់ខ្លួន ហើយក៏ចង់មានអាជីពជាអ្នកគូរប្តង់ម្នាក់ផងដែរ។ យ៉ាងណាក៏ដោយ គាត់មិនទាន់ត្រូវជ្រើសរើសអាជីពណាមួយនាពេលឆាប់ៗឡើយ។
សុខ សាន និយាយថាខ្លួនចូលចិត្តរៀន ហើយសប្បាយពេលបានទៅហាត់សឹងរាល់ថ្ងៃជាមួយបងប្រុសខ្លួននៅក្លឹប សិល្បៈ។ ម្យ៉ាងបានហាត់ជាមួយគ្រូគុនខ្មែរលំដាប់ពិភពលោកទៀត ពិតជាមានតម្លៃខ្លាំងណាស់ក្នុងជីវិតរបស់ខ្លួន។
«ខ្ញុំហាត់ជាមួយគាត់សប្បាយណាស់។ គាត់រាក់ទាក់ ហើយពូកែខាងទាត់ និងដាល់»។ សាន លើកទឹកចិត្តឲ្យគ្រប់គ្នាមកហាត់រៀនក្បាច់គុន ហើយទទួលយកអត្ថប្រយោជន៍ច្រើនដូចខ្លួន។
លើសពីនេះ គាត់ក៏ចាត់ទុកវិស័យក្បាច់គុន និងសង្វៀនអន្តរជាតិដូចជា ONE Championship ជាមធ្យោបាយមួយដែលអាចផ្សព្វផ្សាយឲ្យមនុស្សជាច្រើនស្គាល់ពី ព្រះរាជាណាចក្រកម្ពុជា ផងដែរ។
គាត់បន្ថែមថា៖ «ពេលមានមនុស្សច្រើនចេះកីឡារ នឹងមានមនុស្សច្រើនឡើងប្រកួតអន្តរជាតិ។ អញ្ចឹង ពេលនោះ នឹងធ្វើឲ្យគេស្គាល់កម្ពុជាកាន់តែខ្លាំងឡើង»។
អត្ថបទ៖ Matias Andres
© រក្សាសិទ្ធិដោយ thmeythmey.com