Starbucks និងអង្គការមូលនិធិអាស៊ី រួមគ្នាបោះពុម្ពសៀវភៅរឿងនិទាន ដើម្បីបង្កើនភាពរីករាយក្នុងការអានដល់កុមារកម្ពុជា

អត្ថបទពាណិជ្ជកម្ម

Starbucks និងអង្គការមូលនិធិអាស៊ី រួមគ្នាបោះពុម្ពសៀវភៅរឿងនិទាន ដើម្បីបង្កើនភាពរីករាយក្នុងការអានដល់កុមារកម្ពុជា

03, Dec 2018 , 5:36 pm

រូបភាព

ដោយ: ជី ដាណា

ភ្នំពេញ ៣០ វិច្ឆិកា ២០១៨៖ ក្រុមហ៊ុនកាហ្វេ Starbucks កម្ពុជា និងអង្គការមូលនិធិអាស៊ីកម្ពុជា សហការគ្នា បោះផ្សាយសៀវភៅរឿងនិទានសម្រាប់កុមារដែលមានចំណងជើងថា «ខាល់ឌី និងពពែរាំរែក»។ សៀវភៅនេះ ជាផ្នែកមួយនៃយុទ្ធនាការសប្បុរសធម៌ (Give Good)ឆ្នាំ២០១៨ របស់Starbucks ដែលមានបំណងបង្កើនភាពរីករាយក្នុងការអានសម្រាប់កុមារ នៅកម្ពុជា។ តាមរយៈយុទ្ធនាការនេះ Starbucksកម្ពុជា គាំទ្រដល់គម្រោងតោះអាន (Let’s Read!) របស់អង្គការមូលនិធិអាស៊ី ដែលមានគោលដៅពង្រីកធនធានសៀវភៅកុមារ ដែលមានភាសា សាច់រឿង តួអង្គ នៅតាមប្រទេសក្នុងតំបន់អាស៊ី ដែលងាយស្រួលសម្រាប់កុមារស្រមៃឃើញ។

ដោយឡែកនៅឆ្នាំនេះ យុទ្ធនាការនេះ ផ្តល់ឱកាសដល់អ្នកនិពន្ធ និងវិចិត្រករកម្ពុជា សហការជាមួយអ្នកជំនាញ ផ្នែកឆុងកាហ្វេរបស់ Starbucks ដើម្បីផលិតសៀវភៅរឿង ខាល់ឌី និងពពែរាំរែក ដែលជារឿងព្រេងនិទាន ពីការរកឃើញកាហ្វេដំបូង។

កាលពីឆ្នាំមុន Starbucks កម្ពុជា បានគាំទ្រដល់យុទ្ធនាការនេះ ដោយជួយបោះពុម្ពសៀវភៅកុមារចំនួន ៥០០ក្បាល។ លោក ប៉ោ លីម អ្នកគ្រប់គ្រងទូទៅនៃក្រុមហ៊ុន Starbucks កម្ពុជា ថ្លែងថា៖«យើងពិតមានសេចក្តីរីករាយមែនទែន ចំពោះលទ្ធផលនៃកិច្ចសហការវាងយើង និងអង្គការមូលនិធិអាស៊ី កាលពីឆ្នាំមុន ហើយយើង រំពឹងថា នឹងបន្តការងារនេះ ជាមួយគ្នាបន្តទៅទៀត»។

ដៃគូឆុងកាហ្វេរបស់ Starbucks កញ្ញា មាស មធុរ៉ា ដែលបានចូលរួមផលិតសៀវភៅ ខាល់ឌី និងពពែរាំរែក និយាយថា៖ «ខ្ញុំត្រេកអរ ដែលបានចូលរួមជាមួយក្រុមការងារផលិតសៀវភៅនេះ ដោយសារក្នុងនាមជាអ្នកឆុងកាហ្វេម្នាក់ ខ្ញុំតែងប្រាថ្នាចែករំលែកចំណេះដឹងពីកាហ្វេ និងភាពច្នៃប្រឌិតនានា ដែលខ្ញុំអាចធ្វើបាន ដើម្បីផលិត សៀវភៅនេះឡើង។ ខ្ញុំសង្ឃឹមថា អូនតូចៗ នឹងមានភាពសប្បាយរីករាយ ពេលអានសាច់រឿងនេះ ពីព្រោះការរកឃើញកាហ្វេ មានប្រវត្តិគួរឲ្យទាក់ទាញមែនទែន។»

អ្នកស្រី Meloney Lindberg តំណាងអង្គការមូលនិធិអាស៊ី ប្រចាំប្រទេសកម្ពុជា មានប្រសាសន៍ថា៖ «សៀវភៅ រឿងពីកាហ្វេ នឹងជួយឲ្យកុមារយល់ដឹងពីប្រវត្តិរបស់កាហ្វេ។ គម្រោងតោះអាន (Let’s Read!) បានចាប់ផ្តើម នៅប្រទេសកម្ពុជា តាំងពីឆ្នាំ២០១៦ មកម្ល៉េះ។ គោលបំណងសំខាន់របស់យើង គឺបង្កើតធនធានសម្រាប់អានកាន់តែច្រើនឡើង ហើយផ្សព្វផ្សាយពីវប្បធម៌នៃការអាន ដល់កុមារនៅប្រទេសកម្ពុជា។»

“សៀវភៅរឿង ខាល់ឌី និងពពែរាំរែក ($6.00)”

សាធារណជន គឺអាចចូលរួមយុទ្ធនាការសប្បុរសធម៌ (Give Good) នេះបានដែរ ដោយការជួយទិញសៀវភៅរឿង ខាល់ឌី និងពពែរាំរែក ដែលមានដាក់លក់នៅទាំង១៥សាខា របស់ហាងកាហ្វេ Starbucks កម្ពុជា ទាំងនៅក្នុង ក្រុងភ្នំពេញ និងទីរួមខេត្តសៀមរាប ចាប់ពីថ្ងៃទី១ ខែធ្នូនេះតទៅ។ ប្រាក់ចំណេញដែលរកបានពីការលក់សៀវភៅ នឹងយកទៅបន្តគាំទ្រដល់គម្រោងLet’s Read! នៅប្រទេសកម្ពុជា និងប្រទេសដទៃទៀតនៅអាស៊ី។ សៀវភៅរឿងនេះ មានជាភាសាខ្មែរ និងអង់គ្លេស ហើយក៏អាចរកបាននៅលើគេហទំព័រទាំងពីរនេះ។

ភាសាខ្មែរ ភាសាអង់គ្លេស គម្រោងតោះអាន (Let’s Read!) ជាគម្រោងឌីជីថលរបស់អង្គការមូលនិធិអាស៊ី ព្យាយាមបង្កើនការទទួលបាន សៀវភៅកុមារ និយាយពីតំបន់ក្នុងស្រុក តួអង្គ និងភាសា របស់កុមារ នៅតាមប្រទេសមួយចំនួន ទូទាំងទ្វីបអាស៊ី។ គម្រោងបណ្ណាល័យឌីជីថលតោះអាន មានសៀវភៅកុមារប្រកបដោយគុណភាពខ្ពស់ ជាភាសាខ្មែរ ចំនួនជាង ២៦០ក្បាល និងជាង១៦០០ក្បាលទៀត ជាភាសា២០ផ្សេងទៀត។ លោកអ្នក អាចអាន និងដោនឡូតយក សៀវភៅទាំងនេះ ដោយមិនគិតថ្លៃ នៅលើគេហទំព័រ www.letstreadasia.org ឬដោតឡូត អេប Let’s Read! នៅលើGoogle PlayStore៕