ចិនរឹតបន្តឹងចំណងការទូតជាមួយព័រទុយហ្គាល់ ខណៈរដ្ឋអឺរ៉ុបខ្លះបារម្ភពីការកើនឡើងឥទ្ធិពលចិនក្នុងតំបន់

អន្តរជាតិ

ចិនរឹតបន្តឹងចំណងការទូតជាមួយព័រទុយហ្គាល់ ខណៈរដ្ឋអឺរ៉ុបខ្លះបារម្ភពីការកើនឡើងឥទ្ធិពលចិនក្នុងតំបន់

04, Dec 2018 , 5:56 pm

រូបភាព

ដោយ: សៅ ផលនិស្ស័យ (Sao Phal Niseiy)

ចាកចេញពីប៉ាណាម៉ាភ្លាម ប្រមុខរដ្ឋចិនលោក ស៊ី ជិនភីង បានបន្តដំណើរត្រឡប់មកទឹកដីអឺរ៉ុបវិញភ្លាមដែរដើម្បីបំពញទស្សនកិច្ចផ្លូវការនៅព័រទុយហ្គាល់។ ទស្សនកិច្ចរយៈពេលពីរថ្ងៃនេះធ្វើឡើងក្នុងគោលដៅពង្រឹងទំនាក់ទំនងនិងកិច្ចសហប្រតិបត្តិការទ្វេភាគីជាមួយរដ្ឋអឺរ៉ុបខាងលិច ប៉ុន្តែរដ្ឋមេដឹកនាំអឺរ៉ុបមួយចំនួនបង្ហាញក្តីបារម្ភពីការរីកសាយភាយនៃឥទ្ធិពលចិនក្នុងតំបន់អឺរ៉ុបផងដែរ។

សប្តាហ៍មុន ប្រធានាធិបតីចិនលោក ស៊ី ជិនភីង បានអញ្ជើទៅទស្សនកិច្ចនៅអេស្ប៉ាញមុនអញ្ជើញទៅប្រទេសអាហ្សង់ទីនចូលរួមប្រជុំប្រទេសសេដ្ឋកិច្ចជឿនលឿន G20 ។ នៅថ្ងៃអង្គារទី ៤ ខែធ្នូនេះ លោក ស៊ី បានអញ្ជើញត្រឡប់ជាន់ទឹកដីអឺរ៉ុបជាមួយដោយបំពេញទស្សនកិច្ចនៅព័រទុយហ្គាល់វិញម្តង។

បើតាមការចុះផ្សាយរបស់ទីភ្នាក់ងារព័ត៌មាន AFP មេដឹកនាំចិនចេញផ្សាយបទវិចារណកថាមួយលើកាសែតព័រទុយហ្គាល់ដោយគូសបញ្ជាក់ពីសារសំខាន់នៃចំណងមិត្តភាពដែលចិនមានជាមួយរដ្ឋអឺរ៉ុបខាងលិចមួយនេះផង។ លោកសង្កត់ធ្ងន់ថា ចំណងមិត្តភាពទ្វេភាគីនេះជាផ្នែកមួយនៃចំណងពាណិជ្ជកម្មដ៏មានសារសំខាន់ដែលចិនមានជាមួយអឺរ៉ុបផងដែរ។

តាមពិធីការទូត ទស្សនកិច្ចរបស់លោក ស៊ី នឹងបញ្ចប់ទៅដោយជំនួបទ្វេភាគីមួយជាមួយប្រធានាធិបតីព័រទុយហ្គាល់លោក Marcelo Rebelo de Sousa រួមជាមួយនឹងពិធីចុះកិច្ចព្រមព្រៀងកិច្ចសហប្រតិបត្តិការទ្វេភាគីផង។

កិច្ចព្រមព្រៀងមួយក្នុងចំណោមកិច្ចព្រមព្រៀងទ្វេភាគីទាំងអស់នោះមានគោលដៅភ្ជាប់កំពង់ផែភាគនីរតីទៅក្នុងគម្រោងហេដ្ឋារចនាសម្ព័ន្ធរបសចិន «ខ្សែក្រវាត់មួយវិថីមួយ»ដែលមានគោលដៅជំរុញការអភិវឌ្ឍហេដ្ឋារចនាសម្ព័ន្ធនិងការភ្ជាប់ពាណិជ្ជកម្មពីអាស៊ីដល់អឺរ៉ុបនិងដល់អាហ្វ្រិកតាមលំនាំផ្លូវសូត្រសម័យបុរាណនោះ។

តាមពិតទៅ វត្តមានរបស់លោក ស៊ី នៅរដ្ឋអឺរ៉ុបនៅពេលនេះ ស្របពេលដែលក្តីបារម្ភរបស់បណ្តាប្រទេសអឺរ៉ុបមានកាន់តែច្រើនជុំវិញការកើនឡើងនៃឥទ្ធិពលរបស់មហាអំណាចអាស៊ីចិននេះផង។ ទស្សនកិច្ចនេះទៀតក៏កើតឡើងក្រោយពេលដែលអឺរ៉ុបអនុម័តក្របខណ្ឌវាយតម្លៃទុនវិនិយោគបរទេសដែលមានគោលដៅត្រួតពិនិត្យតឹងរ៉ឹងលើក្រុមហ៊ុនបរទេសជាពិសេសរបស់ចិនតែម្តងនៅក្នុងវិស័យយុទ្ធសាស្ត្រដូចជា វិស័យថាមពលជាដើមដែរ។ បណ្តារដ្ឋមេដឹកនាំអឺរ៉ុបដូចជាបារាំង និងអាល្លឺម៉ង់ចង់បានវិធានការបែបនេះនេះ។

ក្រុងប៉ារីស និង ប៊ែកឡាំងបារម្ភខ្លាំងពីក្រុមហ៊ុនវិនិយោគបរទេសដែលព្យាយាមលួចបច្ចេកវិទ្យាសំខាន់ៗរបស់អឺរ៉ុបតាមរយៈការទិញភាគហ៊ុនក្នុងក្រុមហ៊ុនអឺរ៉ុបជាដើម ហើយមេដឹកនាំអឺរ៉ុបទាំងនេះក៏អំពាវនាវឲ្យមានការដាក់ចេញបទបញ្ញត្តិសំខាន់ៗប្រចាំអឺរ៉ុបដើម្បីគ្រប់គ្រងបញ្ហានេះដែរ។ ប៉ុន្តែបញ្ហាត្រង់ថា រដ្ឋអឺរ៉ុបនីមួយៗនៅតែមានអំណាចក្នុងការកំណត់វិធានការដែលត្រូវប្រើប្រាស់ បើទោះជាមានវិធានការរួមកម្រិតការវិនិយោគបែបនេះក្តី។

យ៉ាងណាក៏ដោយចុះ នាយករដ្ឋមន្ត្រីព័រទុយហ្គាល់លោក Antonio Costa បង្ហាញជំហរច្បាស់លាស់ថា រដ្ឋាភិបាលក្រុងលីសបោន (Lisbon) មិនគាំទ្រចំណាត់ការរបស់អឺរ៉ុបឡើយ ប៉ុន្តែខ្លួនធូរចិត្តដែលកិច្ចព្រមព្រៀងដែលសម្រេចបាននេះត្រឹមជាការប្រឹក្សាយោបល់ដែលផ្តល់ឲ្យដោយគណៈកម្មការអឺរ៉ុបជុំវិញការសម្រេចទទួលទុនវិនិយោគបរទេសនេះ។

ប្រមុខរដ្ឋាភិបាលរូបនេះបានផ្តល់យោបល់បន្ថែមថា ទុនវិនិយោគបរទេសមិនមែនជាក្តីបារម្ភរបស់ប្រទេសលោកទេ ហើយលោកក៏មិនចង់ឃើញសហភាពអឺរ៉ុបបែរជាងាកទៅប្រើគោលនយោបាយគាំពារនិយមស្របពេលដែលសកលភាវូបនីយកម្មកំពុងបន្តដើរទៅមុខឡើយ។

មិនខុសពីអេស្ប៉ាញឡើយ ព័រទុយហ្គាល់ស្ថិតក្នុងចំណោមប្រទេសក្រីក្របំផុតមួយនៅអឺរ៉ុបខាងលិច។ ប្រទេសនេះបើកទ្វារចំហទូលំទូលាយទទួលយកវិនិយោគទុនចិន បន្ទាប់ពីរងគ្រោះធ្ងន់ធ្ងរដោយសារវិបត្តិសេដ្ឋកិច្ចសាកលឆ្នាំ ២០០៨កន្លងមក។ ក្រៅពីស្ថិតក្នុងចំណោមដៃគូពាណិជ្ជកម្មធំជាងគេ ចិនក៏មានទុនវិនិយោគមានទំហំប្រហែល ៣,៦ ភាគរយនៃទំហំផលិតផលក្នុងស្រុកសរុបរបស់ព័រទុយហ្គាល់ចន្លោះពីឆ្នាំ ២០១០ ដល់ឆ្នាំ ២០១៦ដែរ។ ហើយមិនត្រឹមតែប៉ុណ្ណោះ ចិនថែមទាំងមានភាគហ៊ុនដល់ទៅ ២៨ភាគរយក្នុងក្រុមហ៊ុនរបស់ព័រទុយហ្គាក់ធំៗជាពិសេសផ្នែកថាមពល និងហិរញ្ញវត្ថុឬធនាគារថែមទៀតផង។

តាមពិតទៅ ទ្វារសម្រាប់ការវិនិយោគបើកចំហធំ ក្រោយឆ្នាំ ២០១១ ពេលដែលសហភាពអឺរ៉ុប និងអង្គការរូបិយវត្ថុអន្តរជាតិ IMF បានផ្តល់កញ្ចប់លុយសង្គ្រោះសេដ្ឋកិច្ចព័រទុយហ្គាល់ក្នុងទំហំ ៧៨ ពាន់លានដុល្លារ។ កញ្ចប់លុយដែលផ្តល់ឲ្យនោះគឺមានលក្ខខណ្ឌដែលតម្រូវឲ្យព័រទុយហ្គាល់ចាយវាយត្បិតត្បៀត និងបើកទ្វារទទួលទុនវិនិយោគបរទេសផង។