នាយករដ្ឋមន្ត្រីសិង្ហបុរី លោក លី សៀនឡុង ដាក់ពាក្យប្តឹងអ្នករិះគន់លើរដ្ឋាភិបាលលោកពាក់ព័ន្ធនឹងការមួលបង្កាច់ ដោយបានចែករំលែក (share) អត្ថបទព័ត៌មានមួយលើបណ្តាញសង្គមហ្វេសប៊ុក។ ដ្បិតថាក្នុងអត្ថបទនេះ បានលើកឡើងថា មេដឹកនាំសិង្ហបុរីរូបនេះបានជាប់ពាក់ព័ន្ធនឹងរឿងអាស្រូវហិរញ្ញវត្ថុ 1MDB ដែលធ្វើឲ្យបាត់បង់ប្រាក់ជាតិរបស់ម៉ាឡេស៊ីរាប់ពាន់លានដុល្លារ ក្នុងអាណត្តិរបស់អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់។
កាសែតម៉ាឡេស៊ី The Straits Times បានចុះផ្សាយនៅថ្ងៃទី០៤ ខែធ្នូថា លោក លី សៀនឡុង បានដាក់ចេញវិធានការតាមផ្លូវច្បាប់ ក្រោយពី លោក Leong Sze Hian ជាអ្នកសរសេរ Blog និងជាទីប្រឹក្សាផ្នែកហិរញ្ញវត្ថុ បានបរាជ័យក្នុងការធ្វើតាមលិខិតមួយច្បាប់ ដែលបានផ្ញើដោយមេធាវីរបស់នាយករដ្ឋមន្ត្រីសិង្ហបុរី។
ក្នុងអត្ថន័យនៃសំបុត្រនេះ មេធាវីរបស់លោកលី សៀនឡុង បានទាមទារឲ្យលោក Leong ចេញមុខសុំទោសជាសាធារណៈ និងផ្តល់ជាសំណងលើការខូចខាត ជុំវិញការចែករំលែកអត្ថបទមួយនោះ លើបណ្តាញសង្គមហ្វេសបុក កាលពីថ្ងៃទី០៧ ខែវិច្ឆិកាកន្លងទៅ។
តាមពិតទៅ អត្ថបទរិះគន់លើលោកលី ដែលបានចេញផ្សាយដោយសារព័ត៌មានក្នុងស្រុកម៉ាឡេស៊ី ឈ្មោះថា The Coverage បានលើកឡើងថា អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ ដែលកំពុងរងបទចោទជាច្រើនករណីពាក់ព័ន្ធនឹងរឿងអាស្រូវលួចលុយរដ្ឋរាប់រយលានដុល្លារនោះ បានចូលដៃចូលជើងជាមួយលោក លី ដើម្បីស្នើសុំជំនួយពីធនាគារសិង្ហបុរី។
ម្យ៉ាងវិញទៀត មុននឹងការសម្រេចចាត់វិធានការផ្លូវច្បាប់លើអ្នករិះគន់រូបនេះ រដ្ឋាភិបាលសិង្ហបុរីក៏ធ្លាប់ព្យាយាមចាត់វិធានផ្លូវច្បាប់ប្រឆាំងនឹងអ្នកសរសេរអត្ថបទព័ត៌មានដើមផងដែរ ដោយអះអាងថា ការចោទប្រកាន់នោះគឺជា «ព័ត៌មានក្លែងបន្លំ និងបរិហារកេរ្តិ៍»។
ទន្ទឹមនឹងនេះ ក្រុមមេធាវីរបស់នាយករដ្ឋមន្ត្រីសិង្ហបុរី បានគូសបញ្ជាក់ទៀតថា កេរ្តិ៍ឈ្មោះរបស់លោកលី សៀនឡុង ត្រូវបានខូចខាតយ៉ាងធ្ងន់ធ្ងរ ហើយលោកត្រូវបានទាញឲ្យធ្លាក់ចូលក្នុងរឿងអាស្រូវ និងការប្រមាថ។
ទោះបីជាយ៉ាងនេះក៏ដោយក្តី សារព័ត៌មានហុងកុង South China Morning Post បានដកស្រង់សម្តីរបស់លោក Leong ដូច្នេះថា៖ «សម្រាប់ហេតុផលផ្លូវច្បាប់ ខ្ញុំពុំអាចផ្តល់យោបល់ជុំវិញរឿងក្តីរបស់ខ្ញុំបាននោះឡើយ។ ក្នុងការការពាររបស់ខ្ញុំ ខ្ញុំអាចនិយាយបានថា នេះមិនមែនជាការតតាំងគ្នាជាមួយខ្ញុំ និងនាយករដ្ឋមន្ត្រីនោះឡើយ ប៉ុន្តែវាជាការតតាំងគ្នារវាង ប្រជាជន និងរូបលោក សម្រាប់សិទ្ធិសេរីភាពនៃការបញ្ចេញមតិ, តម្លាភាព និងប្រជាធិបតេយ្យ។ ខ្ញុំមិនយល់ទេថា ហេតុអ្វីបានជាលោក [លី] កំពុងដាក់ពាក្យប្តឹងមកលើរូបខ្ញុំទាក់ទងនឹងរឿងមួលបង្កាច់»។
ឲ្យពិតទៅ ការសម្រេចចិត្តរបស់លោកលី ក្នុងការដាក់ពាក្យប្តឹងលើលោក Leong គឺធ្វើឡើង ក្រោយពីអាជ្ញាធរសិង្ហបុរីបានចាត់វិធានការផ្លូវច្បាប់ប្រឆាំងនឹងភាគីផ្សេងៗទៀតលើបណ្តាញសង្គមនិងវេបសាយ ដែកបានចែករំលែកបន្តយ៉ាងទូលំទូលាយពីការចុះផ្សាយរបស់សារព័ត៌មាន The Coverage។ របាយការណ៍របស់សារព័ត៌មាន The Coverage បានដងស្រង់ប្រភពចេញពីសារព័ត៌មាន States Times Review ដែលជាសារព័ត៌មានអនឡាញមួយ ដែលមានទីតាំងក្នុងប្រទេសអូស្ត្រាលី។
អាជ្ញាធរសិង្ហបុរីបានបញ្ជាក្រុមហ៊ុនផ្តល់សេវាកម្មអ៊ីនធឺណិតក្នុងស្រុកឲ្យបិទវេបសាយរបស់សារព័ត៌មាន States Times Review ក្រោយពីសារព័ត៌មាននេះបានបដិសេធលុបអត្ថបទនោះចោល។ គេដឹងហើយថា ភាគច្រើននៃអត្ថបទព័ត៌មានរបស់វេបសាយ States Times Review គឺជាបទវិចារណកថាតែម្ខាង ដោយពុំផ្អែកលើព្រឹត្តិការណ៍ពិតនោះឡើយ។
ស្របពេលដែលអាជ្ញាធរសិង្ហបុរីបានបិទវេបសាយព័ត៌មាននេះដោយជោគជ័យហើយនោះ ពួកគេក៏បានព្យាយាមសុំជំនួយពីក្រុមហ៊ុនហ្វេសប៊ុក ក្នុងគោលដៅលុបការបង្ហោះផ្សេងៗលើបណ្តាញសង្គមដ៏ធំនេះ ដែលជាប់ទាក់ទងនឹងរឿងអាស្រូវរបស់លោក លី។ យ៉ាងណាមិញ ក្រុមហ៊ុនបណ្តាញសង្គមយក្សនេះបានបដិសេធធ្វើតាមសំណើរបស់អាជ្ញាធរសិង្ហបុរី។ ហើយការបដិសេធបែបនេះបានធ្វើឲ្យរដ្ឋបាលលោក លី ឆេះដុំជាខ្លាំង។
មែនទែនទៅ លោក លី ក៏ដូចជាឪពុករបស់លោកគឺ លោក លី ក្វាន់យូ ត្រូវបានគេកត់សម្គាល់ថា បានចាប់ផ្តើមវិធានការផ្លូវច្បាប់ជាថ្នាំព្យាបាល ក្រោយការមួលបង្កាច់។ លោក លី បានឈ្នះរឿងក្តីមួលបង្កាច់មួយកាលពីឆ្នាំ២០១៤ ប្រឆាំងនឹងអ្នកសរសេរ Blog ឈ្មោះថា Roy Ngerng ដែលបានចោទប្រកាន់លោក លី ជុំវិញរឿងការចំណាយថវិការដ្ឋមិនប្រក្រតី។
ហើយស្ថាប័នសារព័ត៌មាន ដែលពីមុនមកបានសម្រេចេញមុខសុំទោស និងសងការខូចខាតទៅមេដឹកនាំរបស់បក្សកាន់អំណាច PAP សម្រាប់ការចេញផ្សាយអត្ថបទ ដែលរដ្ឋាភិបាលសិង្ហបុរីរកឃើញថា វាជាមួលបង្កាច់។ តួយ៉ាងស្ថាប័នព័ត៌មានទាំងនោះ គឺរួមមានដូចជា Financial Times, The Economist និង Bloomberg៕