ជាតិ
បទសម្ភាសន៍
កង្វះសៀវភៅឈ្នះអាហារូបករណ៍នៅបរទេស ធ្វើឲ្យលោក យ៉ាន់ ឧត្តម និពន្ធសៀវភៅ«Inside Scholarships»
× ភ្នំពេញ៖«Inside Scholarships»ជាចំណងជើងសៀវភៅថ្មីមួយ ដែលរៀបរាប់ពីវិធីសាស្ត្រដើម្បីឈ្នះអាហារូបករណ៍ទៅសិក្សានៅបរទេស។ លោក យ៉ាន់ ឧត្តម ដែលជាអ្នកនិពន្ធសៀវភៅនេះ ឲ្យដឹងថាគឺដោយសារតែលោកមើលឃើញថា កង្វះខាតសៀវភៅប្រភេទនេះនៅកម្ពុជា ហើយលោកចង់ចែករំលែកបទពិសោធន៍របស់ខ្លួន ទៅឲ្យយុវជនជំនាន់ក្រោយដែលមានក្តីស្រមៃបន្តការសិក្សានៅក្រៅប្រទេស។ ដ្បិត«Inside Scholarships»ជាភាសាអង់គ្លេសនេះ ជាស្នាដៃសៀវភៅដំបូងបំផុតរបស់ខ្លួន តែលោក ឧត្តម សង្ឃឹមថាសៀវភៅនេះ នឹងទទួលបានការគាំទ្រច្រើន ពីអ្នកអាន ជាពិសេសយុវជនដែលមានមហិច្ឆតាទទួលបានអាហារូបករណ៍ទៅសិក្សានៅបរទេស។
ដើម្បីជ្រាបច្បាស់ សូមលោកអ្នកនាងស្តាប់បទសម្ភាស រវាង កញ្ញា សៅ សុខអេង នៃអ្នកសារព័ត៌មានថ្មីៗ និងលោក យ៉ាន់ ឧត្តមដូចតទៅ៖
«Inside Scholarships បែបអាហារូបករណ៍អន្តរជាតិ» ជាសៀវភៅភាសាអង់គ្លេស ដែលនិពន្ធដោយលោក យ៉ាន់ ឧត្តម ក្នុងបំណងចែករំលែកបទពិសោធន៍របស់ខ្លួនទៅឲ្យយុវជនដែលមានគោលដៅ បន្តសិក្សានៅក្រៅប្រទេស។ លោក យ៉ាន់ ឧត្តម បានឲ្យដឹងថា លោកបានចំណាយពេលប្រមាណ១ឆ្នាំ ដើម្បីសរសេរសៀវភៅជាភាសាអង់គ្លេស កម្រាស់១៥៥ទំព័រនេះ។ លោក យ៉ាន់ រៀបរាប់ដូច្នេះ៖« សៀវភៅនេះជាសៀវភៅបែបបច្ចេកទេស ដែលរៀបរាប់ពីគន្លឹះសរសេរឯកសារ និងការរៀបចំខ្លួនមុនទៅសិក្សានៅក្រៅបរទេស។ សៀវភៅនេះ ក៏បង្ហាញពីគំរូសរសេរ CV, Personal Statement, ឬResearch Proposal និងការរៀបចំឯកសារផ្សេងទៀតដែលពាក់ព័ន្ធនឹងការដាក់ពាក្យស្នើអាហារូបករណ៍ផងដែរ»។
លោក យ៉ាន់ ឧត្តម ដែលមានបទពិសោធន៍ជោគជ័យទៅសិក្សានៅក្រៅប្រទេស និងការធ្វើការងារជាច្រើនឆ្នាំក្នុងការបញ្ជូនសិស្សទៅសិក្សានៅបរទេសផងនោះ រំពឹងថាសៀវភៅដែលជាស្នាដៃដំបូងរបស់ខ្លួនមួយនេះ នឹងទទួលបានការគាំទ្រច្រើនពីអ្នកអាន ជាពិសេសស្រទាប់យុវជនដែលជាសិស្សវិទ្យាល័យ ឬអ្នកកំពុងសិក្សានៅមហាវិទ្យាល័យដែលបំណងទៅសិក្សានៅបរទេស។ មានសង្ឃឹមខ្ពស់ ព្រោះ លោក ឧត្តម មើលឃើញថា សៀវភៅរបស់ខ្លួន ជាប្រភេទសៀវភៅដែលកម្រមានអ្នកនិពន្ធ និងម្យ៉ាងទៀត វាត្រូវបានសរសេរឡើងជាភាសាអង់គ្លេស ដែលវាជាគំរូជាក់ស្តែងបង្ហាញឲ្យអ្នកអានបានយល់ ពីគោលនយោបាយការបរទេសរបស់ប្រទេសនីមួយៗ ដែលពួកគេចង់ទៅសិក្សាផងដែរ។
សូមបញ្ជាក់ថាសៀវភៅ «Inside Scholarships បែបអាហារូបករណ៍អន្តរជាតិ» នឹងមានដាក់លក់នៅក្នុងពិព័រណ៍សៀវភៅកម្ពុជា ពីថ្ងៃទី៧-៩ធ្នូនៅបណ្ណាល័យជាតិកម្ពុជាផងដែរ៕
Tag:
យ៉ាន់ ឧត្តម
អាហារូបករណ៍
សៀវភៅ
អប់រំ
និពន្ធ
© រក្សាសិទ្ធិដោយ thmeythmey.com