ជាតិ
យុវជនកម្ពុជា២០០នាក់រំឭកចំណងការទូតកម្ពុជា-ចិនដែលភ្ជាប់ដោយព្រះបរមរតនកោដ្ឋ និងអតីតមេដឹកនាំកំពូលរបស់ចិន
× យុវជនកម្ពុជា២០០នាក់បានចូលរួមអបអរសាទរខួបលើកទី៦០នៃទំនាក់ទំនងការទូតកម្ពុជា-ចិន ក្នុងឱកាសនៃជំនួបមិត្តភាពយុវជនកម្ពុជា-ចិន នៅទីក្រុងប៉េកាំងនៅក្នុងសប្តាហ៍នេះ។ កម្ពុជានិងចិនបានភ្ជាប់ចំណងការទូតជាផ្លូវការនៅថ្ងៃទី១៩ខែកក្កដាឆ្នាំ១៩៥៨។
សមាជិកសហភាពសហព័ន្ធយុវជនកម្ពុជា និងនិស្សិតកម្ពុជាដែលកំពុងសិក្សានៅក្នុងប្រទេសចិន សរុប២០០នាក់ ត្រូវបានអញ្ជើញឲ្យចូលរួមក្នុងវេទិកាជំនួបមិត្តភាពយុវជនកម្ពុជា-ចិនដែលត្រូវបានរៀបចំនៅក្នុងរដ្ឋធានីប៉េកាំងប្រទេសចិននៅក្នុងសប្តាហ៍នេះ។ យុវជននៃប្រទេសទាំងពីរបានឡើងបង្ហាញចំណាប់អារម្មណ៍លើផ្លែផ្កានៃទំនាក់ទំនងជាប្រវត្តិសាស្ត្រនៃប្រទេសទាំងពីរ។
លោក ហ៊ុន ម៉ានី ដែលជាប្រធានប្រតិភូយុវជនកម្ពុជាបានលើកឡើងនៅក្នុងវេទិកាជំនួបយុវជននោះ ដោយជំរុញឲ្យយុវជនស្វែងយល់ និងសិក្សាបន្ថែមអំពីទំនាក់ទំនងនៃប្រទេសទាំងពីរ។ ប្រធានចលនាយុវជនដ៏ធំរបស់គណបក្សប្រជាជនកម្ពុជា បានថ្លែងប្រៀបធៀបទំនាក់ទំនងរវាងប្រទេសពីរ ទៅនឹងមនុស្សពីរនាក់។ លោក ហ៊ុន ម៉ានី បានបញ្ជាក់យ៉ាងដូច្នេះ៖«មនុស្សទោះបីមានក្រយ៉ាងណា គប្បីរាប់អានគ្នា និង គោរពគ្នាទៅវិញទៅមកដោយភក្តីភាពជាមួយអ្នកដែលមានចរិត និងចេតនាល្អ។ ការទាក់ទងរវាងប្រទេស និងប្រទេសក៏ដូចច្នោះដែរ»។
ជំនួបរវាងយុវជននៃប្រទេសទាំងពីរនៅពេលនេះ បានប្រព្រឹត្តទៅចំពេលដែលប្រទេសមហាមិត្តទាំងពីរកំពុងប្រារព្ធខួបចំណងការទូតឆ្នាំទី៦០។ ខណៈពេលដែលកម្ពុជាដែលដឹកនាំដោយគណបក្សប្រជាជនកម្ពុជាបានក្លាយជាដៃគូយុទ្ធសាស្ត្រគ្រប់ជ្រុងជ្រោយជាមួយប្រទេសចិនតាំងពីខែធ្នូឆ្នាំ២០១០នោះ ការពង្រឹងទំនាក់ទំនងយុវជនជាអ្នកបន្តវេន គួរតែជាយន្តការមួយនៅក្នុងភាពជាដៃគូរបស់ប្រទេសទាំងពីរ។
ប្រទេសកម្ពុជា និងប្រទេសចិនប្រជាមានិត បានបង្កើតទំនាក់ទំនងការទូតជាផ្លូវការនៅថ្ងៃទី ១៩ កក្កដា ១៩៥៨ បន្ទាប់ពីជំនួបទ្វេភាគីលើកទី១ រវាង ព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងលោក ជូ អេន ឡាយ អតីតនាយករដ្ឋមន្ត្រីចិន ក្នុងអំឡុងពេលចូលរួមសន្និសីទ ទីក្រុងបានឌុង នៅខែ មេសា ១៩៥៥ នៅទីក្រុងបានឌុង ប្រទេសឥណ្ឌូនេស៊ី និងការបំពេញទស្សនកិច្ចទៅវិញទៅមករវាងថ្នាក់ដឹកនាំជាន់ខ្ពស់ នៃប្រទេសទាំងពីរក្នុងអំឡុងឆ្នាំ ១៩៥៦៕
© រក្សាសិទ្ធិដោយ thmeythmey.com