ជាតិ
ការបញ្ចប់ការឆ្លង«ជំងឺអេដស៍»ទាំងស្រុងនៅទូទាំងពិភពលោកនៅតែជារឿងលំបាកខ្លាំង
× ចាប់តាំងពីការលេចឡើងនៃជំងឺអេដស៍ដែលបង្កដោយវីរុស HIV នៅអំឡុ ឆ្នាំ១៩៨០មក មនុស្សរាប់លាននាក់ជុំវិញពិភពលោកបានស្លាប់បាត់បង់ជីវិត។ ថ្វីបើចំនួនអ្នករងគ្រោះចាប់ផ្តើមថយចុះខ្លាំងមែនក្តី ការបន្តយុទ្ធនាការប្រយុទ្ធប្រឆាំងនឹងជំងឺដ៏កាចសាហាវនេះនៅមិនទាន់ដល់បញ្ចប់នៅឡើយទេ។
អង្គការសុខភាពពិភពលោក បញ្ជាក់កាលពីចុងខែវិច្ឆិកាថា ចាប់តាំងពីការរីករាលដាលនៃជំងឺអេដស៍រហូតមកដល់សព្វថ្ងៃ មនុស្សប្រមាណជា ៧៧លាននាក់ក្នុងពិភពលោកបានផ្ទុកជំងឺអេដស៍ ដែលនៅក្នុងនោះអ្នកស្លាប់មានរហូតដល់ ៣៥លាននាក់។ បច្ចុប្បន្ន មានមនុស្សប្រមាណជា៣៧លានអ្នកនៅតែមានផ្ទុកវីរុស HIV និងក្នុងនោះមាន ២២លាននាក់កំពុងទទួលការព្យាបាល។
វេជ្ជបណ្ឌិត Gottfried Hirnschall ដែលទទួលបន្ទុកខាងការទប់ស្កាត់និងសិក្សាពីការរីករាលដាលនៃជំងឺអេដស៍នៅអង្គការសុខភាពពិភពលោក (WHO) ក្នុងខួបលើកទី ៣០ នៃការប្រយុទ្ធប្រឆាំងជំងឺអេដស៍ថ្ងៃ ១ធ្នូ បានមានប្រសាសន៍ថា ពេលទិវាប្រយុទ្ធប្រឆាំងជំងឺអេដស៍ត្រូវបានធ្វើឡើងក្នុងឆ្នាំ១៩៨៨ វិធីសាស្ត្រក្នុងការបង្ការនៅមានប្រសិទ្ធភាពតិចតួច និងទន់ខ្សោយនៅឡើយ។ ចំណែក ការចុះទៅអប់រំនៅតាមសហគមន៍តូចនៅពេលនោះនៅជុំវិញពិភពលោកក៏នៅមានឧបសគ្គជាច្រើនដែរ។
ដោយសារតែថ្នាំព្យាបាលនៅមិនទាន់បានរកឃើញនៅឡើយ យុទ្ធនាការក្នុងការទប់ស្កាត់និងការអប់រំមនុស្សត្រូវបានភ្នាក់ងារពាក់ព័ន្ធបន្តរៀបចំយ៉ាងយកចិត្តទុកដាក់។ ការផ្សព្វផ្សាយនានាត្រូវបានបន្តធ្វើទៅមុខជាពិសេសការដាស់តឿនមិនឲ្យមានការប្រើម្ជុលរួមគ្នា រួមភេទជាមួយដៃគូច្រើននាក់ និងការប្រើប្រាស់ស្រោមអនាម័យជាដើម។
នៅឆ្នាំ១៩៩១ រាងខ្សែបូពណ៌ក្រហមដែលតំណាងឲ្យជំងឺអេដស៍នេះត្រូវបានបង្កើតឡើងដោយវិចិត្រករម្នាក់មកពីទីក្រុងញូវយ៉ក។ នៅក្នុងនោះ ពណ៌ក្រហមត្រូវបានគេតំណាងឲ្យតំណក់ឈាមនៃសេចក្តីស្រលាញ់ ហើយរាងខ្សែបូដំណាងឲ្យទំនាក់ទំនងរវាងបុគ្គលនិងបុគ្គល។
នៅអំឡុងចុងទស្សវត្សឆ្នាំ១៩៨០ ការស្រាវជ្រាវនិងទប់ស្កាត់ថ្មីបានធ្វើឡើងនៅបណ្តាប្រទេសនានាជុំវិញពិភពលោកនិងបានសង្គ្រោះរួចពន្យារជីវិតមនុស្សរាប់សែននាក់។ នៅក្នុងឆ្នាំ២០១៧ ប្រជាជនប្រមាណ៧៥% ឬស្មើ ២៨លានអ្នក មានលទ្ធភាពនិង ឱកាសក្នុងការទទួលពិនិត្យឈាមរកមេរោគអេដស៍នៅតាមមន្ទីរពេទ្យក្នុងតំបន់រៀងៗខ្លួន។
ការទប់ស្កាត់ជំងឺនេះទាំងស្រុងតែម្តងពិតជាមិនមែនជារឿងងាយស្រួលប៉ុន្មាននោះទេ។ ជារៀងរាល់ឆ្នាំ មនុស្សប្រមាណជិតមួយលាននាក់នៅតែទទួលមរណភាពដោយសារជំងឺអេដស៍នៅឡើយ។ គេរំពឹងថា ការបញ្ឈប់ការរាលដាលនៃជំងឺនេះនឹងត្រូវបញ្ចប់ក្នុងឆ្នាំ២០៣០ខាងមុខ បើការព្យាបាលធ្វើឡើងនិងទទួលបានផលល្អតាមការគ្រោងទុករបស់អ្នកស្រាវជ្រាវ។
© រក្សាសិទ្ធិដោយ thmeythmey.com