អន្តរជាតិ
ព្រៃអាម៉ាស្សូន៖ តើការអភិវឌ្ឍ និងការបំផ្លិចបំផ្លាញទន្ទ្រានយកព្រៃឈើត្រូវតែដើរទន្ទឹមគ្នា?
×![]()
ដោយ: គី ចំណា
តើការរីកលូតលាស់ជឿនលឿននៃពិភពលោកនិងការថែរក្សាការពារបរិស្ថានធម្មជាតិអាចកើតឡើងក្នុងពេលតែមួយបានដែរឬទេ? តើការអភិរឌ្ឍបច្ចេកវិទ្យានឹងធ្វើឲ្យសម្បត្តិធម្មជាតិឆ្ពោះទៅរកភាពវិនាសអន្តរាយមែនឬ? នេះជាសំណួរដែលពិបាកក្នុងការរកចម្លើយដោយបានច្បាស់លាស់ណាស់។
ដើម្បីឆ្លើយសំណួរនេះ គេគួរងាកទៅរកព្រៃអាម៉ាស្សូននៅប្រទេសប្រេស៊ីល និងជាព្រៃដែលមានទំហំធំជាងក្នុងពិភពលោក។
មានទំហំប្រមាណ៦៧០លានហិកតា ព្រៃអាម៉ាស្សូនមានផ្ទៃដីធំជាងអឺរ៉ុបប៉ែកខាងលិចឬប្រទេសឥណ្ឌាទៅទៀត។ ប៉ុន្តែក្នុងរយៈពេលត្រឹមតែជា ៣០ឆ្នាំក្រោយនេះប៉ុណ្ណោះ ព្រៃអាម៉ាស្សូនត្រូវបានគេកាប់បំផ្លាញអស់ជាង២០ភាគរយទៅហើយ ប្រៀបនឹងទំហំកាលពីដើម។
ភ្នាក់ងារពាក់ព័ន្ធខ្លះបានព្យាយាមហាមប្រាមការកាប់ដើមរុក្ខជាតិដែលមានវ័យចំណាស់រាប់រយឆ្នាំ ហើយខ្លះទៀតបានព្យាយាមការពារជីវភាពរស់នៅរបស់ក្រុមកុលសម្ព័ន្ធដែលរស់នៅក្នុងតំបន់ដើម្បីធានានិរន្តរភាពព្រៃឈើ។ ចំណែកខ្លះទៀតបានលើកហេតុផលថា ព្រៃអាម៉ាហ្សូននេះមានលក្ខណៈសំខាន់ខ្លាំងដែលចាំបាច់ត្រូវថែរក្សាកាពារឲ្យគង់វង្ស ដ្បិតវាជាទីជំរករបស់ពពួកសត្វប្រមាណជា១ភាគ១០ នៃប្រភេទសត្វសរុបដែលមានលើពិភពលោក។
World Economic Forum ចុះផ្សាយថា ព្រៃអាម៉ាស្សូនមានសមត្ថភាពរក្សាសមាសធាតុកាបូនសរុបប្រមាណ ១០០ ពាន់លានតោន ស្មើនឹង១០ដងនៃបរិមាណកាបូនដែលមនុស្សបញ្ចេញដោយការប្រើប្រាស់ផូស៊ីលឥន្ធនៈក្នុងមួយឆ្នាំៗ។ ប្រើព្រៃនេះនៅតែបន្តរងការបំផ្លិចបំផ្លាញទៀត បរិមាណសមាសធាតុកាបូនដែលមានក្នុងបរិយាកាសនឹងធ្វើឲ្យបរិស្ថានធម្មជាតិនានាជុំវិញពិភពលោករងការខូចខាតកាន់តែខ្លាំង។
ការកាប់ព្រៃឈើភាគច្រើនគឺដើម្បីវាតយកដីសម្រាប់ធ្វើកសិកម្មដូចជាដំណាំស្រូវ ស្រូវសាលី ដំឡូង ឬ ដូងប្រេងជាដើម។ យោងតាមស្ថិតិរបស់អង្គការ OECD ប្រទេសប្រេស៊ីលនឹងក្លាយជាអ្នកផ្គត់ផ្គង់ស្ករជិតពាក់កណ្តាលនៃស្ករដែលត្រូវផ្គត់ផ្គងសរុបក្នុងទីផ្សារពិភពលោក។ ប្រទេសមួយនេះក៏នឹងក្លាយជាប្រទេសនាំចេញសណ្តែកសៀងធំជាងគេពោលគឺ ប្រមាណ៤៧% នៃសណ្តែកសៀងត្រូវបាននាំចេញទៅកាន់ពិភពលោកក្នុងឆ្នាំ២០២៦ ខាងមុខ។
ដោយសារតែតម្រូវការដីក្នុងការបង្កបង្កើនផលមានការកើនឡើងយ៉ាងឆាប់រហ័យនេះហើយទើបការទន្ទ្រានយកដីព្រៃក្លាយជាបញ្ហាចោទមួយ និងពិបាកក្នុងការដោះស្រាយជាទីបំផុត។ រឿងរ៉ាវទាំងអស់នេះពិតជាត្រូវការការសហការរវាងដៃគូអភិវឌ្ឍន៍និងរដ្ឋាភិបាលពាក់ព័ន្ធរួមទាំងភាគីឯកជនផងដែរដើម្បីដោះស្រាយបញ្ហានេះជាពិសេសធានាផ្គត់ផ្គង់ផលិតផលទៅកាន់ទីផ្សារអន្តរជាតិផង និងធានាកាត់បន្ថយផលអវិជ្ជមានលើបរិស្ថានធម្មជាតិផង៕
Tag:
បរិស្ថាន
ប្រស៊ីល
ព្រៃឈើ
អាម៉ាហ្សូន
© រក្សាសិទ្ធិដោយ thmeythmey.com
