អន្តរជាតិ
រូបភាព AFP
×![]()
ក្រុងតូក្យូ នឹងបង្កើនការចំណាយលើវិស័យយោធារបស់ខ្លួន ក្នុងរយៈពេល៥ឆ្នាំខាងមុខ ដើម្បីឆ្លើយតបនឹងបញ្ហាសន្តិសុខ និងកាត់បន្ថយអតិរេកពាណិជ្ជកម្ម (Trade Surplus) ជាមួយសហរដ្ឋអាមេរិក តាមរយៈការបញ្ជាទិញសម្ភារៈអាមេរិក។ គម្រោងចាយប្រាក់ថ្មីនេះគឺធ្វើឡើង ស្របពេលប្រធានាធិបតីអាមេរិក ដូណាល់ ត្រាំ បានជំរុញឲ្យជប៉ុនបង្កើនការទិញទំនិញរបស់អាមេរិក។
ក្រសួងការពារជាតិជប៉ុន មានបំណងចាយប្រាក់យ៉ាងហោចណាស់ ២៤០ពាន់លានដុល្លារ ចាប់ពីខែមេសាឆ្នាំ២០១៩ ដល់ខែមីនាឆ្នាំ២០២៤។ បើតាមការចុះផ្សាយរបស់សារព័ត៌មាន Asian Nikkei នៅថ្ងៃទី០៨ ខែធ្នូ ជប៉ុនគ្រោងនឹងស្នើសុំការអនុម័តពីសភាសម្រាប់គម្រោងថវិកាយោធាថ្មីនេះ នាពាក់កណ្តាលខែធ្នូ ឆាប់ៗខាងមុខ។
បច្ចុប្បន្ននេះ ក្រសួងការពារជាតិជប៉ុនបានចំណាយប្រាក់ប្រមាណ ៨០ភាគរយនៃកញ្ចប់ថវិកាការពារសរុប (៤៦ពាន់លានដុល្លារ ក្នុងឆ្នាំ២០១៨) ទៅលើសម្ភារៈយោធា និងកងទ័ព។ ហើយក្រោមគម្រោងថ្មីនេះ ប្រាក់ចំណាយលើការបញ្ជាទិញសម្ភារៈយោធាថ្មី នឹងត្រូវផ្តាច់ចេញពីការចំណាយទាំងអស់នេះ។ ដូច្នេះហើយ ក្រុងតូក្យូនឹងមានភាពងាយស្រួលជាងមុន ក្នុងការទិញសម្ភារៈយោធាពីអាមេរិក។
មែនទែនទៅ ការបញ្ជាទិញសម្ភារៈយោធាអាមេរិកអាចជួយឲ្យជប៉ុន កាត់បន្ថយការប៉ះទង្គិចផ្នែកពាណិជ្ជកម្មជាមួយអាមេរិក ស្របពេលដែលលោក ដូណាល់ ត្រាំ បានជំរុញឲ្យក្រុងតូក្យូ បង្កើនការទិញផលិតផលអាមេរិករួមមានសម្ភារៈយោធាជាដើម។ លើសពីនេះ ប្រធានាធិបតីអាមេរិកទី៤៥រូបនេះ ក៏បានគំរាមដំឡើងពន្ធលើរថយន្តជប៉ុន ដែលនាំចូលទៅកាន់ទីផ្សារអាមេរិកថែមទៀតផង ក្នុងគោលដៅកាត់បន្ថយឱនភាពពាណិជ្ជកម្មជាមួយជប៉ុន។
ជាមួយគ្នានេះ រដ្ឋាភិបាលជប៉ុនក្នុងអាណត្តិរបស់លោកនាយករដ្ឋមន្ត្រី ស៊ីនហ្សូ អាបេ បានខិតខំប្រឹងប្រែងយ៉ាងសស្រាក់សស្រាំ ក្នុងការបង្កើនសមត្ថភាពយោធារបស់ជប៉ុន។ មូលហេតុចម្បងនោះគឺ ដើម្បីឆ្លើយតបនឹងការគំរាមកំហែងបាញ់មីស៊ីលពីសំណាក់របបក្រុងព្យុងយ៉ាង និងទប់ទល់ការកើនឡើងនៃឥទ្ធិពលយោធារបស់មហាយក្សចិននៅក្បែរប្រជុំកោះជម្លោះរវាងប្រទេសទាំងពីរ។
ជាក់ស្តែង ជប៉ុនបានសម្រេចចំណាយប្រាក់ដល់ទៅ ៤៧ពាន់លានដុល្លារអាមេរិក លើវិស័យការពារជាតិនាឆ្នាំ២០១៩ ក្នុងគោលដៅដំឡើងប្រព័ន្ធការពារដែនអាកាសថ្មី ដែលមានសមត្ថភាពបាញ់ទម្លាក់មីស៊ីលបាលីស្ទិករបស់កូរ៉េខាងជើង។ ដ្បិតថា ក្រុងតូក្យូ នៅតែចាត់ទុកបញ្ហាមីស៊ីលរបស់កូរ៉េខាងជើងថា ជាការគំរាមកំហែងដល់សន្តិសុខជាតិរបស់ខ្លួន ទោះបីក្រុងព្យុងយ៉ាងសន្យាបោះបង់អាវុធនុយក្លេអ៊ែររបស់ខ្លួនក៏ដោយក្តី៕
Tag:
ជប៉ុន
សហរដ្ឋអាមេរិក
© រក្សាសិទ្ធិដោយ thmeythmey.com
