អត្ថបទពាណិជ្ជកម្ម
«SWEET NIGHTMARE» អាល់ប៊ុមទោលដំបូងរបស់ ចិត្ត កញ្ចនា ដែលរៀបរាប់ពីជីវិតរបស់នាង ក្នុងនាមជាយុវនារីម្នាក់
× ថ្ងៃទី ១០ ខែធ្នូ ឆ្នាំ២០១៨៖ កញ្ញា ចិត្ត កញ្ចនា ដែលត្រូវបានមិត្តយុវវ័យជាច្រើន ក្នុងប្រទេសកម្ពុជា ស្គាល់ថាជាតារាចម្រៀងយុវវ័យ និងនិពន្ធបទចម្រៀងដែលមិនចម្លងគេ បានធ្វើសន្និសីទកាសែត សម្ពោធអាល់ប៊ុមទោលដំបូងរបស់ខ្លួន ដែលមានឈ្មោះថា «SWEET NIGHTMARE» ដែលកញ្ញាបានចំណាយពេលនិពន្ធអស់រយៈពេលមួយឆ្នាំ។
ដើម្បីសម្ពោធអាល់ប៊ុមទោលដំបូងរបស់ខ្លួន តារាចម្រៀងវ័យ២៥ឆ្នាំរូបនេះ នឹងឡើងច្រៀងបទចម្រៀងទាំង៧បទ ក្នុងអាល់ប៊ុមពិសេសមួយនេះ ទៅដល់ទស្សនិកជន ក៏ដូចជាអ្នកគាំទ្រចម្រៀងមិនចម្លងពីគេ បានរីករាយនិងទស្សនា នៅថ្ងៃទី ២២ខែធ្នូខាងមុខ ចាប់ពីម៉ោង ៥ល្ងាច តទៅ នៅFactory Phnom Penh ដែលស្ថិតនៅតាមបណ្តោយផ្លូវជាតិលេខ២ ក្នុងចាក់អង្រែក្រោម។ នេះក៏ជាការបង្ហាញពីការគាំទ្រ នៅក្នុងវិស័យចម្រៀងមិនចម្លងគេ ក្នុងប្រទេសកម្ពុជាផងដែរ។
អាល់ប៊ុម «SWEET NIGHTMARE» គឺជាអាល់ប៊ុមចម្រៀងពិសេស ប្លែកសម្រាប់ឧស្សាហកម្មតន្ត្រីនៅកម្ពុជា ដែលនឹងប្រាប់រឿងរ៉ាវពីជីវិតរបស់នាងក្នុងកម្រិតផ្ទាល់ខ្លួន ដូចជាការប្រឈមមុខនឹងជំងឺធ្លាក់ទឹកចិត្ត,របៀបដែលនាងលើកទឹកចិត្តខ្លួនឯង,ជីវិតស្នេហា,នឹងការសម្តែងការដឹងទៅកាន់មិត្តភក្តិ និងអ្នកគាំទ្ររបស់កញ្ញា។ លើសពីនេះទៀត អាល់ប៊ុមចម្រៀងទោលមិនចម្លងគេរបស់ អ្នកចម្រៀងវ័យក្មេង ចិត្ត កញ្ចនា មិនត្រឹមតែជាការបង្ហាញពីជីវិតរបស់កញ្ញាតែមួយមុខនោះទេ តែនេះគឺជាបង្ហាញពីភាពរីកចម្រើនដ៏វិជ្ជមាន ពីឧស្សាហកម្មតន្ត្រីនៅប្រទេសកម្ពុជា។ ម្ចាស់បទចម្រៀង ឈឺ និងបទអ្នកដទៃ រូបនេះបានលើកឡើងថា៖ «ហេតុផលដែលខ្ញុំដាក់ចំណងជើងអាល់ប៊ុមនេះថា Sweet Nightmare ពីព្រោះខ្ញុំធ្លាប់មានឧបសគ្គអាក្រក់ជាច្រើន កាលពីប៉ុន្មានឆ្នាំកន្លងទៅ ដែលបានបង្រៀនខ្ញុំឲ្យកាន់តែរឹងមាំ និងឲ្យខ្ញុំក្រោកឈរឡើងហេតុនេះហើយ ទើបខ្ញុំចាត់ទុករាល់ឧបសគ្គអាក្រក់ទាំងអស់នោះ ថាជាសុបិនអាក្រក់ បង្កប់ដោយភាពផ្អែមល្ហែមសម្រាប់ខ្ញុំផ្ទាល់។ អីចឹងហើយ ទើបខ្ញុំចង់ចែករំលែកបទពិសោធន៍ជីវិត របសខ្ញុំ ទៅដល់អ្នកគាំទ្រ ក៏ដូចជាប្រជាជនកម្ពុជា បានយល់ពីអត្ថន័យជីវិត តាមរយៈការបង្កើតបទចម្រៀងរបស់ខ្ញុំ»។
កញ្ញា ចិត្ត កញ្ចនា បានបន្ថែមទៀតថា៖ «ខ្ញុំបានដាក់អារម្មណ៍របស់ខ្ញុំ,ការខិតខំប្រឹងប្រែងរបស់ខ្ញុំ,ពេលវេលារបស់ខ្ញុំ នៅក្នុងអាល់ប៊ុមអស់រយៈពេលជិតមួយឆ្នាំ ហើយអ្វីដែលខ្ញុំសង្ឃឹមនោះ គឺថាខ្ញុំអាចនិយាយទៅកាន់អ្នកគាំទ្ររបស់ខ្ញុំ ក៏ដូចជាយុវវ័យទាំងអស់ តាមរយៈបទចម្រៀងទាំងនេះ។ ខ្ញុំក៏សង្ឃឹមថា ចម្រៀងទាំងនេះ នឹងជួយអ្នកឱ្យជាសះស្បើយដូចនឹងតន្ត្រីបានជួយខ្ញុំអីចឹងដែរ»។
លោក អេង រស្មី អ្នកគ្រប់គ្រងរបស់ កញ្ញា ចិត្ត កញ្ចនា បានគូសបញ្ជាក់ថា៖«នៅពេលយើងពិភាក្សាគ្នាអំពីអាល់ប៊ុមដំបូង កញ្ចនាបានប្រាប់ខ្ញុំថានាងចង់បង្កើតបទភ្លេង ដែលមាន លក្ខណៈស្តង់ដារ ហើយនាងចង់ធ្វើអ្វីផ្សេង ពីសមិទ្ធផលការងារពីមុន ដែលនាងធ្លាប់បានធ្វើ។ នាងចង់សរសេរអំពីអ្វីមួយដែលមានលក្ខណៈផ្ទាល់ខ្លួន ហើយនិយាយទៅកាន់អ្នកគាំទ្ររបស់នាង តាមរយៈរឿងនោះ។ កញ្ចនា ពិតជាបានធ្វើបានមែន ពីព្រោះនាងបានខិតខំប្រឹងប្រែងយ៉ាងខ្លាំង ចំណាយទាំងពេលវេលា និងប្រាក់កាក់ ដើម្បីបញ្ចប់អាល់ប៊ុមនេះ ដែលយើងបានធ្វើយ៉ាងជិតមួយឆ្នាំ។ ខ្ញុំពិតជាមិនអាចរង់ចាំ ដើម្បីចែករំលែកបទចម្រៀងរបស់នាង ទៅមនុស្សគ្រប់គ្នាបានទេ»។
គួររំលឹកថា អាល់ប៊ុមទោលដំបូងរបស់កញ្ញា ចិត្ត កញ្ចនា ផលិតឡើង ដោយមានការសហការនិងការគាំទ្រពីក្រុមហ៊ុន Smart Axiata, Jack Daniel, Kilat និង Kourprey ការចេញអាល់ប៊ុមនេះ នាំមកនូវចលនាតន្ត្រីថ្មី មិនចម្លងគេនៅក្នុងប្រទេសកម្ពុជា ទៅជំរុញវិស័យឧស្សាហកម្មតន្ត្រីទៅកម្រិតមួយផ្សេងទៀត។
កញ្ញា ទេព ច័ន្ទសោភា អ្នកឯកទេសជាន់ខ្ពស់ផ្នែកតន្ត្រី និងកម្សាន្ត របស់ក្រុមហ៊ុន Smart Axiata បានឲ្យដឹងថា អស់រយៈពេល២ឆ្នាំជាងមកហើយ ដែលក្រុមហ៊ុន Smart បានដើរតួនាទីយ៉ាងសំខាន់ ក្នុងការជំរុញចលនាតន្ត្រីថ្មីមិនចម្លងគេក្នុងប្រទេសកម្ពុជា ដោយធ្វើរួមគ្នាជាមួយសិល្បៈក្មេងៗជំនាន់ក្រោយ ដែលពោរពេញទៅដល់បទពិសោធន៍ ដើម្បីធ្វើឲ្យវិស័យចម្រៀងក្នុងប្រទេសកម្ពុជាកាន់តែរីកចម្រើនឡើង។ កញ្ញា ទេព ច័ន្ទសោភា បញ្ជាក់បន្តថា៖«យើងពិតជាសប្បាយរីករាយក្រៃលែង ដែលបានឃើញចលនានេះ មានការដើរទៅមុខយ៉ាងលឿន ហើយនាងខ្ញុំក៏អរគុណទៅដល់មនុស្សទាំងអស់ ដែលតែងតែគាំទ្រតន្ត្រីថ្មីមិនចម្លងគេ ហើយការគាំទ្រនេះ ពិតជាសំខាន់ខ្លាំងណាស់សម្រាប់សិល្បករ»។
សូមបញ្ជាក់ជាថ្មីថា ការប្រគំតន្ត្រីរបស់តារាចម្រៀងស្រី កញ្ញា ចិត្ត កញ្ចនា នឹងនាំយកការ សម្តែងពោរពេញទៅដោយភាពច្នៃប្រឌិតទៅដល់អ្នកគាំទ្រ នៅលើឆាកតន្ត្រី ដែលនឹងប្រព្រឹត្តទៅ នៅឯ Factory Phnom Penh ដែលមានទីតាំងស្ថិតនៅបណ្តោយផ្លូវជាតិលេខ ២ ក្នុងសង្កាត់ចាក់អង្រែលើ ខណ្ឌមានជ័យ នាថ្ងៃទី ២២ ខែធ្នូ ឆ្នាំ ២០១៨ ចាប់ពីម៉ោង ៥ល្ងាចតទៅ។
អាល់ប៊ុម Sweet Nightmare នឹងមាននៅលើកម្មវិធីតន្ត្រី Smart Music រយៈពេល ១ ខែ ដែលជាកម្មវិធី (Application)មួយ ដើម្បីទាញយកតន្ត្រីថ្មីមិនចម្លងគេនៅកម្ពុជា ឬជាភាសាអង់គ្លេសថា Original music។ រាល់ការស្តាប់ចម្រៀងនៅក្នុង Smart Music នឹងនាំមកនូវការគាំទ្រផ្នែកហិរញ្ញវត្ថុ ដល់សិល្បករដើមនៅក្នុងប្រទេសកម្ពុជា។ ដើម្បីទស្សនាវីដេអូចម្រៀងរបស់ កញ្ចនា សូមចូលទៅកាន់គេហទំព័រ៖
https://www.youtube.com/watch?v=R7b2u2emK6E ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com