យីកេ «ទុំទាវបីជំនាន់» ទាក់ទាញអ្នកទស្សនាផ្ទាល់ដល់ទៅជាង៧០០នាក់

ជាតិ

យីកេ «ទុំទាវបីជំនាន់» ទាក់ទាញអ្នកទស្សនាផ្ទាល់ដល់ទៅជាង៧០០នាក់

11, Dec 2018 , 9:19 pm

រូបភាព

ដោយ: ប៉ូ សាគុន

ភ្នំពេញ៖ ការសម្ដែងល្ខោនយីកេរឿងទុំទាវ ក្រោមប្រធានបទ «ទុំទាវបីជំនាន់» កាលពីរាត្រីថ្ងៃទី១០ ខែធ្នូ នៅសាលមហោស្រពចតុមុខ ទទួលបានអ្នកទស្សនាប្រមាណជាង៧០០នាក់ ដែលមានទាំងមនុស្សវ័យចំណាស់ និងយុវវ័យ។ នេះបើតាមលោក ប៊ុត ចាន់ណា ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ។

លោក ប៊ុត ចាន់ណា បានបញ្ជាក់ថា ការសម្ដែងល្ខោនយីកេរឿងទុំទាវមានការគាំទ្រច្រើន គួរឱ្យកត់សម្គាល់។ លោកថាបើគិតតែនៅក្នុងសាលមានអ្នកទស្សនាជាង៦០០នាក់ ដោយអ្នកខ្លះត្រូវឈរមើលផង។ ចំណែកនៅខាងក្រៅវិញមានអ្នកទស្សនាប្រមាណជាង១០០នាក់ទៀត ដែលមើលតាមការផ្សាយបន្ត។

លោក ចាន់ណា បានបន្ថែមយ៉ាងដូច្នេះថា៖«មានការគាំទ្រច្រើនណាស់ ទាំងយុវជន និងវ័យចំណាស់។ អ្នកខ្លះដែលមានអាយុស្របាលសិល្បករចាស់ៗគាត់មើលហើយគាត់យំ មិនស្មានថាបានមើលសិល្បករចាស់ៗសម្ដែងម្ដងទៀត។ ពីយប់មិញបើមានសំបុត្រ១ពាន់សន្លឹកក៏ប្រហែលជាចែកអស់ដែរមើលទៅ»។

ប្រធាននាយកដ្ឋានសិល្បៈទស្សនីយភាពរូបនេះថា ជាគម្រោងមិនទាន់ផ្លូវការ រឿងទុំទាវនេះអាចនឹងសម្ដែងម្ដងទៀត តែមិនទាន់កំណត់ទីតាំង និងពេលវេលាច្បាស់លាស់នៅឡើយ។ លោកថាមានការសម្ដែងម្ដងទៀត ក៏ដោយសារមានសន្ទុះនៃការគាំទ្រខ្លាំង។

ផ្ទាំងទស្សនីភាពល្ខោនយីកេរឿងទុំទាវ ក្រោមប្រធានបទ "«ទុំទាវបីជំនាន់" ដែលប្រមូលផ្ដុំសិល្បករជំនាន់ទស្សវត្សរ៍៦០ និង៨០ ព្រមទាំងសម័យបច្ចុប្បន្នចំនួនជាង១០០នាក់ បានសម្ដែងកាលពីនៅថ្ងៃទី១០ខែធ្នូឆ្នាំ២០១៨កន្លងទៅ៕