អន្តរជាតិ
បាញ់ប្រហារនៅបារាំង សម្លាប់មនុស្ស៣នាក់ និងធ្វើឲ្យច្រើននាក់របួស
× ខ្មាន់កាំភ្លើងម្នាក់បានបើកការវាយប្រហារលើមនុស្សម្នាក្នុងផ្សារមួយក្នុងទីក្រុង Strasbourg របស់បារាំង នៅព្រឹកព្រលឹមថ្ងៃទី១២ ខែធ្នូ ដោយសម្លាប់មនុស្ស៣នាក់ និងច្រើននាក់ទៀតរងរបួស។ ក្រោយហេតុការណ៍នេះ រដ្ឋមន្ត្រីមហាផ្ទៃបារាំង Christophe Castaner ក៏ប្រកាសបង្កើនកម្រិតភាពអាសន្នតែម្ដង។
ប្រតិបត្តិការរុករក កំពុងធ្វើឡើងដើម្បីស្វែងរកខ្មាន់កាំភ្លើងដែលបាញ់ប្រហារនៅឯផ្សារ Christmas ក្នុងទីក្រុងប្រវត្តិសាស្ត្ររបស់បារាំង Strasbourg ។ ជនដៃដល់ដែលជាប់ឈ្មោះក្នុងបញ្ជីតាមដានរបស់ប៉ូលិស បានសម្លាប់មនុស្សយ៉ាងហោចណាស់៣នាក់ ក្នុងហេតុការណ៍ដែលកើតឡើងនៅវិថីដ៏មមាញឹកមួយរបស់ទីក្រុង ហើយដែលធ្វើឲ្យមនុស្សម្នាផ្សេងទៀតរត់រកកន្លែងសុវត្ថិភាព។
បើតាមទីភ្នាក់ងារព័ត៌មាន AFP ទាហានដែលយាមកាមក្នុងទីក្រុង បានប្រទះជាមួយខ្មាន់កាំភ្លើង និងបានបាញ់តដៃទៅមក។ ជនដៃដល់បានរងរបួស តែនៅអាចរត់គេចខ្លួនបាន។ រដ្ឋមន្ត្រីមហាផ្ទៃបារាំង Christophe Castaner ប្រកាសថា បារាំងបានលើកកម្រិតអាសន្នទៅដល់កម្រិត «ការវាយប្រហារបន្ទាន់» ដោយនឹងមានការអនុវត្តការរឹតបន្តឹងការគ្រប់គ្រងព្រំដែន និងត្រួតពិនិត្យផ្សារ Christmas នៅទូទាំងប្រទេសដើម្បីចៀសវាងការវាយប្រហារដូចគ្នានេះ។
នៅម្ខាងទៀតនៃព្រំដែន ប៉ូលិសអាល្លឺម៉ង់ក៏បានរឹតបន្តឹងព្រំដែនរបស់ខ្លួនដែរ។ បារាំង និងអាល្លឺម៉ង់ខណ្ឌចែកទឹកដីគ្នាដោយទន្លេ Rhine ។ ប្រភពមន្ត្រីសន្តិសុខបារាំងនិយាយថា ជនដៃដល់មានឈ្មោះ Chekatt Cherif មានអាយុ២៩ឆ្នាំ មានកំណើតក្នុងទីក្រុងនេះតែម្ដង។ ជននេះត្រូវបានរំពឹងថា នឹងត្រូវចាប់ខ្លួនដោយប៉ូលិសនៅថ្ងៃទី១១ ខែធ្នូនេះដែរ ដោយរូបគេជាប់ពាក់ព័ន្ធក្នុងសំណុំរឿងប៉ុនប៉ងសម្លាប់មនុស្ស។
ចំណែកនៅឯសភាអឺរ៉ុបប្រចាំ Strasbourg វិញ អាគារសភាត្រូវបានបិទ ហើយសមាជិកសភា និងអ្នកសារព័ត៌មានមិនត្រូវបានអនុញ្ញាតឲ្យចេញទៅណាឡើយ។ ពួកគេខ្លះត្រូវចែកជាក្រុមតូចៗដើម្បីតាមដានស្ថានការណ៍សិន។
Strasbourg គឺជាទីក្រុងទេសចរណ៍សំខាន់មួយរបស់បារាំង។ នៅរដូវបុណ្យ Christmas បែបនេះ វិថីនានាត្រូវបានតុបតែងដោយភ្លើងលម្អ និងពោរពេញដោយមនុស្សរាប់ពាន់នាក់។ ក្នុងស្ថានភាពនេះ អាជ្ញាធរបារាំង បានបង្កើនការប្រុងប្រយ័ត្នរបស់ខ្លួនកាន់តែខ្លាំង ព្រោះធ្លាប់ជួបការវាយប្រហារឆ្នាំ២០១៥ នៅទីក្រុងប៉ារីសម្ដងហើយ ដែលពេលនោះមនុស្ស១៣០បានស្លាប់៕
© រក្សាសិទ្ធិដោយ thmeythmey.com