ជាតិ
×![]()
ភ្នំពេញ: សហភាពសហព័ន្ធសហជីព និងសមាគមចំនួន៦ បានស្នើឱ្យរាជរដ្ឋាភិបាលកំណត់ប្រាក់ឈ្នួលអប្បបរមា សម្រាប់វិស័យសំណង់និងសេវាកម្ម។ នេះបើតាមសេចក្ដីថ្លែងការណ៍រួមរបស់សហជីព ក្នុងទិវាសិទ្ធិមនុស្សអន្តរជាតិលើកទី៧០ កាលពីថ្ងៃទី១០ធ្នូ។
ចំណុចដែលក្រុមសហជីព ស្នើទៅរដ្ឋាភិបាលឲ្យពិចារណាដោះស្រាយ មានចំនួន៦ចំណុច ដែលក្នុងនោះរួមមានទី១ រដ្ឋាភិបាលកំណត់ប្រាក់ឈ្នួលអប្បបរមា សម្រាប់វិស័យសំណង់ និងសេវាកម្ម។ ទី២ ស្នើឱ្យជួយអន្តរាគមន៍ឱ្យនិយោជកទទួលយកថ្នាក់ដឹកនាំ និងសកម្មជនសហជីព ដែលត្រូវបានក្រុមហ៊ុនបញ្ឈប់ពីការងារ ដោយខុសច្បាប់ឱ្យបានចូលធ្វើការវិញ និងសងប្រាក់រំឭកដល់ពួកគេ។
ចំណុចទី៣ ក្រុមសហជីពស្នើឱ្យរដ្ឋាភិបាលជួយពិនិត្យឡើងវិញ នូវមាត្រាមួយចំនួននៃច្បាប់ស្ដីពីសហជីព។ ទី៤ ស្នើឱ្យពិនិត្យឡើងវិញលើប្រកាសស្ដីពីភាពជាតំណាងនៃសហជីព។ ទី៥ ស្នើឱ្យផ្ដល់សច្ចាប័នដល់អនុសញ្ញា ILO លេខ១៤៩ ស្ដីពីការការពារកម្មករធ្វើការតាមផ្ទះក្នុងស្រុក និងទី៦ ស្នើឱ្យជំរុញការអនុវត្តច្បាប់ស្ដីពីការងារចំពោះកម្មករធ្វើការងារតាមផ្ទះ និងសេវាកម្ម។
សេចក្ដីថ្លែងការណ៍រួមនេះ បានរំពឹងដូច្នេះថា៖«យើងខ្ញុំនឹងសង្ឃឹមថា រដ្ឋាភិបាលកម្ពុជា និងស្ថាប័នពាក់ព័ន្ធ នឹងបន្តកិច្ចខំប្រឹងប្រែង ក្នុងការដោះស្រោយនូវសំណើខាងលើ ដើម្បីលើកកម្ពស់ការគោរពសិទ្ធិ និងជីវភាពរស់នៅរបស់ប្រជាពលរដ្ឋ ឱ្យកាន់តែប្រសើរឡើង»។
កាលពីថ្ងៃទី៣ធ្នូកន្លងមក រដ្ឋាភិបាល បានចេញសេចក្តីថ្លែងការណ៍ស្តីពីវិធានការនានាដើម្បីពង្រឹងលទ្ធិប្រជាធិបតេយ្យ និងលំហនយោបាយ ដោយក្នុងនោះ មានការពង្រឹងភាពជាដៃគូជាមួយអង្គការសង្គមស៊ីវិល , ការដោះស្រាយបញ្ហាពាក់ព័ន្ធនឹងសិទ្ធិការងារ និងសហជីព, ការលើកតម្កើងសេរីភាពសារព័ត៌មាន និងសេរីភាពបញ្ចេញមតិ រួមទាំងគោលនយោបាយគ្រប់គ្រងដីធ្លី ដើម្បីធានាសិទ្ធិ និងប្រយោជន៍របស់ប្រជាជន និងការប្រើប្រាស់ដីឲ្យបានត្រឹមត្រូវ៕
Tag:
កម្មករ
សហជីព
សំណង់
សេវាកម្ម
ប្រាក់ឈ្នួល
© រក្សាសិទ្ធិដោយ thmeythmey.com
