អន្តរជាតិ
ដោះស្រាយបញ្ហាប្រែប្រួលអាកាសធាតុគួរផ្តើមពីពលរដ្ឋម្នាក់ៗ ជាជាងពឹងលើរដ្ឋាភិបាលទាំងស្រុង
× ចាប់ពីសប្តាហ៍មុន តំណាងប្រទេស ១៩៧ ជុំវិញពិភពលោកមកជួបជុំគ្នានៅក្រុង Katowice ប្រទេសប៉ូឡូញដើម្បីបន្តពិភាក្សា និងជំរុញចំណាត់ការឆ្លើយតបនឹងការប្រែប្រួលអាកាសធាតុសាកល។ សន្និសីទអន្តរជាតិនេះក៏បន្តផ្តោតលើការចងក្រងសៀវភៅណែនាំដែលមានគោលដៅធានាការអនុវត្តកិច្ចព្រមព្រៀងក្រុងប៉ារីសឆ្នាំ២០១៥ ឲ្យមានប្រសិទ្ធភាពដែរ។
ការជួបជុំគ្នាក្នុងសន្និសីទអង្គការសហប្រជាជាតិនេះកើតឡើងស្របពេលដែលពិភពលោកប្រឈមច្រើន ហើយគោលដៅកាត់បន្ថយការបំពុលបរិស្ថាន និងទប់ស្កាត់ការឡើងកម្តៅផែនដីនេះមិនដើរទៅមុខដូចការរំពឹងទុកឡើយ។
ប្រទេសធំៗមួយចំនួនដូចជាសហរដ្ឋអាមេរិក និងរដ្ឋ អឺរ៉ុបនៅតែមានភាពយឺតយ៉ាវក្នុងការសម្រេចទទួលបានលទ្ធផលល្អក្នុងការអនុវត្តគោលការណ៍ទាំងនេះដោយសារពួកគេមិនអាចកាត់បន្ថយការបញ្ចេញឧស្ម័នផ្ទះកញ្ចក់ទៅបរិយាយកាសបាន។ ប្រទេសដែលបញ្ចេញឧស្ម័នផ្ទះកញ្ចក់ច្រើនជាងគេនោះគឺ អាមេរិក និងចិន ដែលបរិមាណនោះស្មើនឹងជាង ៦០ភាគរយនៃបរិមាណឧស្ម័នផ្ទះកញ្ចក់សរុបក្នុងពិភពលោក។ ទីក្រុងស្ទើរតែទាំងអស់ដែលមានទីតាំងនៅទ្វីបអាស៊ី និងទ្វីបអាហ្រិ្វកនឹងទទួលរងផលប៉ះពាលខ្លាំងពីការប្រែប្រួលអាកាសធាតុនេះ។
ក្រោយពីការរីកលូតលាស់នៃបដិវត្តន៍ឧស្សាហកម្ម សីតុណ្ហភាពជាការទប់ស្កាត់មិនឲ្យភពផែនដីកើនឡើងជាមធ្យម ១.៥ អង្សារគឺជាចក្ខុវិស័យមួយដែលគេត្រូវតែសម្រេចមុនឆ្នាំ ២០៥០។ មធ្យមរបស់ភពផែនដីបានកើនឡើងជិតមួយអង្សារ។ ទោះបីតួរលេខនេះមើលទៅហាក់បីដូចជាមិនច្រើនក៏ដោយចុះ ប៉ុន្តែវាធ្វើឲ្យបរិស្ថានមានការផ្លាស់ប្តូរខ្លាំងបាន។ នេះបើយោងតាមទិន្នន័យរបស់អង្គការឧត្តុនិយមពិភពលោក (WMO) ។
ស្របពេលដែលការអនុវត្តរបស់រដ្ឋាភិបាលជុំវិញពិភពលោកទំនងជាមិនអាចសម្រេចគោលដៅដោះស្រាយបញ្ហាប្រែប្រួលអាកាសធាតុនេះ អង្គការបរិស្ថានពាក់ព័ន្ធជាច្រើនបានសំណូមពរទៅកាន់មហាជនឲ្យបង្កើតការយល់ដឹងពីការការពារ និងថែរក្សាបរិស្ថានដែរ។ អង្គការទាំងនេះបានជំរុញឲ្យប្រជាជនម្នាក់ៗផ្តោតលើប្រើប្រាស់មធ្យោបាយធ្វើដំណើររួមដូចជាឡានក្រុង រថភ្លើង ការប្រើប្រាស់កង់ ឬថ្មើរជើងទៅកាន់ទីតាំងជិតៗ។ ក្រៅពីនេះគេអាចសន្សំសំចៃការប្រើប្រាស់ថាមពល, ងាកទៅប្រើប្រាស់ ប្រព័ន្ធសូឡាដើម្បីទាញយកថាមពលពីពន្លឺព្រះអាទិត្យ និងប្រើប្រាស់ថាមពលកកើតឡើងវិញផ្សេងទៀតដែលអាចចូលរួមចំណែកបានក្នុងការកាត់បន្ថយការបំភាយឧស្ម័នកាបូនិចទៅកាន់បរិយាកាសផង។
សូមបញ្ជាក់ថា ចាប់តាំងពីមានការធ្វើកំណត់ត្រាសីតុណ្ហភាពពិភពលោកនៅឆ្នាំ១៨៥០មក ពីឆ្នាំ២០១៥ ដល់ឆ្នាំ២០១៨ គឺជាឆ្នាំដែលមានការកើនឡើងកម្តៅខ្លាំងជាងគេ បើប្រៀបធៀបនឹងរយៈពេលចាប់ពីពាក់កណ្តាលសតវត្សទី១៩ មកទល់បច្ចុប្បន្ននេះ។ បញ្ហាដែលកើតឡើងអាចមានដូចជាការកើនឡើងនៃកម្ពស់ និងកម្តៅទឹកសមុទ្រ រួមទាំងបំផ្លិចបំផ្លាញដំណាំកសិកម្មច្រើនដែលជាស្បៀងដ៏ចាំបាច់សម្រាប់មនុស្សផង។
ម្យ៉ាងវិញទៀតតំបន់សមុទ្រទឹកកកអាកទិក និងត្រូវរងការខូចខាតយ៉ាងខ្លាំងពីការរលាយទឹកកកស្របពេលដែលមានការកើនឡើងនៃសីតុណ្ហភាពនេះ។ អ្នកជំនាញប៉ាន់ស្មានថា សមុទ្រទឹកកកអាកទិក នឹងលែងមានវត្តមានទឹកកកក្នុងរដូវក្តៅទៀតហើយនៅក្នុងឆ្នាំ ២០៥០ខាងមុខ។ការប្រែប្រួលបរិស្ថានតំបន់សមុទ្រទឹកកកនេះនឹងបង្កឲ្យមានបញ្ហាដល់ជំរកសត្វនិងរុក្ខជាតិនៅទីនោះយ៉ាងធ្ងន់ធ្ងរ៕
Tag:
ប្រែប្រួលអាកាសធាតុ
បរិស្ថាន
© រក្សាសិទ្ធិដោយ thmeythmey.com