ការសិក្សា៖ក្មេងៗមើលទូរសព្ទច្រើនជាង២ម៉ោងក្នុងមួយថ្ងៃ ប៉ះពាល់ដល់ខួរក្បាល

សុខភាព

អន្តរជាតិ

ការសិក្សា៖ក្មេងៗមើលទូរសព្ទច្រើនជាង២ម៉ោងក្នុងមួយថ្ងៃ ប៉ះពាល់ដល់ខួរក្បាល

16, Dec 2018 , 9:59 am

រូបភាព

ដោយ:

ក្រុមអ្នកស្រាវជ្រាវនៃវិទ្យាស្ថានអាមេរិកមួយ បានរកឃើញថា ក្មេងៗដែលប្រើប្រាស់ទូរសព្ទទំនើប និងលេងហ្គេមក្នុងរយៈពេលយូរ ទទួលរងផលប៉ះពាល់ផ្នែកខួរក្បាល ជាពិសេស ការគិតពិចារណា។ នេះបើតាមការចុះផ្សាយរបស់ទូរទស្សន៍ CBS ក្នុងកម្មវិធី 60 Minutes នៅថ្ងៃអាទិត្យថ្ងៃទី ០៩ ខែធ្នូ។

វិទ្យាស្ថានជាតិសម្រាប់សុខភាពរបស់អាមេរិក (NIH) បានផ្តួចផ្តើមការសិក្សាមួយ ដោយស្កែនខួរក្បាលក្មេងៗអាយុ៩ឆ្នាំ និង១០ ប្រមាណ ៤៥០០នាក់។ យោងតាមលទ្ធផលបឋមនៃការសិក្សា ក្មេងៗដែលប្រើប្រាស់ទូរសព្ទទំនើប, ថេបផ្លេត និងលេងហ្កេម ច្រើនជាង២ម៉ោងក្នុងមួយថ្ងៃនោះ ទទួលពិន្ទុទាបលើវិញ្ញាសា ជំនាញគិតពិចារណា និងជំនាញភាសា។

លើសពីនេះ ក្រុមអ្នកស្រាវជ្រាវរបស់វិទ្យាស្ថានអាមេរិកខាងលើនេះ នឹងធ្វើការតាមដានក្មេងៗប្រមាណ ១១ ០០០នាក់បន្ថែមទៀត ក្នុងរយៈពេល១០ឆ្នាំខាងមុខ។ ការសិក្សាដែលគ្រោងចាយប្រាក់៣០០លានដុល្លារនេះ មានគោលដៅស្វែងយល់ឲ្យកាន់តែច្បាស់ពីផលប៉ះពាល់ ដែលបណ្តាលមកប្រើប្រាស់ឧបករណ៍អេឡិចត្រូនិករយៈពេលយូរ ទៅលើខួរក្បាលរបស់ក្មេងៗ។

យោងតាមការចុះផ្សាយរបស់ទូរទស្សន៍ CBS បច្ចុប្បន្ននេះ ក្មេងៗអាយុចន្លោះពី១៣ ទៅ ១៩ឆ្នាំនៅសហរដ្ឋអាមេរិក ចំណាយពេលជាមធ្យមប្រមាណ ៤ម៉ោង និង៣០នាទី ក្នុងមួយថ្ងៃ ប្រើប្រាស់ទូរសព្ទដៃរបស់ពួកគេ។ តួលេខនេះ គេនៅមិនទាន់រាប់បញ្ចូលពេលវេលាដ៏ទៃផ្សេងទៀត ដែលពួកគេចំណាយសម្រាប់ការលេងហ្គេម មើលទូរទស្សន៍ ឬប្រើប្រាស់កុំព្យូទ័រ៕