លោក សម រង្ស៊ី រឹតតែទោមនស្សជាមួយរដ្ឋាភិបាលកម្ពុជា ក្រោយច្បាប់ស្តីពីគណបក្សនយោបាយ ត្រូវបានកែប្រែសាជាថ្មី ដែលគេ ដឹងថា ការកែប្រែនេះ គឺដើម្បីបើកច្រកឲ្យអតីតថ្នាក់ដឹកនាំគណបក្សប្រឆាំង បានវិលមកកាន់ឆាកនយោបាយវិញ។ លោក សម រង្ស៊ី មិនត្រឹមតែមិនសាទរនោះទេ តែលោក ថែមទាំងយល់ថា ការធ្វើដូច្នេះ គឺជាយុទ្ធសាស្ត្ររបស់សម្តេច ហ៊ុន សែន ដើម្បីបំបែកបំបាក់អតីតថ្នាក់ដឹកនាំគណបក្សប្រឆាំង។
តាមរយៈសារលើទំព័រហ្វេសប៊ុក ដែលបង្ហោះចេញពីក្រៅប្រទេស នៅថ្ងៃទី១៤ ខែធ្នូ ឆ្នាំ២០១៨ លោក សម រង្ស៊ី បានសរសេរយ៉ាងដូច្នេះថា៖«ខ្ញុំបានចេញសេចក្តីថ្លែងការណ៍មួយ ជាភាសាអង់គ្លេសនិងភាសាបារាំង ដើម្បីប្រាប់ទៅរដ្ឋាភិបាលជាមិត្តក្នុងពិភពលោកនិងស្ថាប័ននានា ដែលគាំទ្រលទ្ធិប្រជាធិបតេយ្យនៅកម្ពុជា ឲ្យគាបសង្កត់លោក ហ៊ុន សែន កាន់តែខ្លាំង ក្រោយពីគាត់បានគំរាមចាប់ដាក់គុកមន្ត្រីគណបក្សសង្គ្រោះជាតិជាង១០០នាក់ បើមិនព្រមចុះចូលជាមួយគាត់...»។
លោក សម រង្ស៊ី នឹងចាត់ទុកថា ជាជនក្បត់បក្ស បើអតីតថ្នាក់ដឹកនាំគណបក្សប្រឆាំងណាម្នាក់ ហ៊ានធ្វើសំណើសុំសិទ្ធិនយោបាយ ពីរដ្ឋាភិបាលកម្ពុជា។ អ្វីដែលលោក សម រង្ស៊ី ចង់បានមុនគេ គឺការដោះលែងលោក កឹម សុខា ហើយរឿងផ្សេងទៀត ចាំគិតតាមក្រោយ។
លោក សុខ ឥសាន អ្នកនាំពាក្យគណបក្សកាន់អំណាច ចំអកឲ្យលោក សម រង្ស៊ី ដែលប្រឹងរារាំងអតីតថ្នាក់ដឹកនាំគណបក្សប្រឆាំង មិនឲ្យស្នើសុំសិទ្ធិនយោបាយ។ លោក បានសរសេរសារតាមបណ្តាញទំនាក់ទំនងតេឡេក្រាមយ៉ាងដូច្នេះថា៖«ទោះបីប្រើឧបាយកលយ៉ាងណា ក៏លោក សម រង្ស៊ី មិនអាចសម្រេចបានតាមចិត្តដែរ។ នៅទីបំផុត ក្នុងចំណោម១១៧នាក់ មន្ត្រីជាច្រើន នឹងប្រើសិទ្ធិរបស់គេម្នាក់ៗ ដាក់ពាក្យស្នើសុំនីតិសម្បទាធ្វើនយោបាយឡើងវិញ ដោយមិនខ្វល់នឹងឧបាយកលរារាំងរបស់លោក សម រង្ស៊ី ឡើយ»។
វិសោធនកម្មលើច្បាប់ស្តីពីគណបក្សនយោបាយ ត្រូវបានរដ្ឋសភា អនុម័ត នៅថ្ងៃទី១៣ ខែធ្នូ ឆ្នាំ២០១៨។ តាមរយៈខ្លឹមសារថ្មី ដែលត្រូវបានបញ្ចូលក្នុងច្បាប់នេះ នាយករដ្ឋមន្ត្រី មានសិទ្ធិថ្វាយសំណើទៅព្រះមហាក្សត្រ ដើម្បីឲ្យព្រះអង្គ ប្រោសព្រះរាជទានសិទ្ធិធ្វើនយោបាយវិញ ដល់អ្នកដែលត្រូវបានតុលាការកំពូលដកចេញ។
សម្តេច ហ៊ុន សែន ប្រកាសថា នឹងពិចារណាក្នុងការក្រាបបង្គំទូលទៅព្រះមហាក្សត្រ បើអតីតថ្នាក់ដឹកនាំគណបក្សប្រឆាំងរូបណា ដាក់សំណើ។ នាយករដ្ឋមន្ត្រី បង្ហើបថា អ្នកដែលគោរពតាមសាលដីការបស់តុលាការកំពូល អាចនឹងទទួលបានសិទ្ធិធ្វើនយោបាយវិញ តែអ្នកដែលប្រឆាំង នឹងមិនងាយទទួលបានឡើយ។
លោក គង់ គាំ និង កូនប្រុស គឺលោក គង់ បូរ៉ា បានប្រកាសថា នឹងធ្វើសំណើសុំសិទ្ធិនយោបាយវិញ។ លោក គង់ គាំ ដែលធ្លាប់ដើរផ្លូវនយោបាយជាមួយលោក សម រង្ស៊ី រាប់អាណត្តិនោះ បានលើកឡើងថា លោក មិនអាចបន្តរង់ចាំការរស់ឡើងវិញរបស់អតីតគណបក្សសង្គ្រោះជាតិនោះទេ។
គេ កំពុងតែនាំគ្នាសង្កេតមើលថា ក្នុងចំណោមថ្នាក់ដឹកនាំជាង១០០នាក់នោះរបស់អតីតគណបក្សប្រឆាំង តើអ្នកណា នឹងគោរពតាមសម្តីរបស់លោក សម រង្ស៊ី ហើយអ្នកណា នឹងធ្វើតាមការណែនាំរបស់សម្តេច ហ៊ុន សែន៕