ម៉ាឌុយរ៉ូ៖ «ជួបសន្ទនាជាមួយលោក ពូទីន ជារឿងមានប្រយោជន៍បំផុតក្នុងជីវិតនយោបាយខ្ញុំ»

អន្តរជាតិ

ម៉ាឌុយរ៉ូ៖ «ជួបសន្ទនាជាមួយលោក ពូទីន ជារឿងមានប្រយោជន៍បំផុតក្នុងជីវិតនយោបាយខ្ញុំ»

15, Dec 2018 , 8:29 pm

រូបភាព

ដោយ: ថ្មីៗ

ប្រធានាធិបតីវេណេស៊ុយអេឡាបានអះអាងសប្តាហ៍នេះថា ជំនួបពិភាក្សាទ្វេភាគីរវាងលោកជាមួយសមភាគីរុស្ស៊ី វ្ល៉ាឌីមៀ ពូទីន នៅសប្តាហ៍មុន ជាជំនួបដ៏មានប្រយោជន៍បំផុតក្នុងឆាកជីវិតនយោបាយកន្លងមក។ ក្រោយកិច្ចពិភាក្សា រុស្ស៊ី និងវេណេស៊ុយអេឡាឯកភាគ្នាបង្កើនកិច្ចសហប្រតិបត្តិការយោធាទ្វេភាគីផងដែរ។

នាសន្និសីទព័ត៌មានមួយដែលត្រូវបានរៀបចំឡើងកាលពីថ្ងៃពុធទី ១២ ខែធ្នូ ប្រធានាធិបតីនៃរដ្ឋអាមេរិកឡាទីន វេណេស៊ុយអេឡា លោក នីកូឡា ម៉ាឌុយរ៉ូ បានកោតសរសើរពីជំនួបទ្វាភាគីរវាងលោកជាមួយប្រធាធិបតីរុស្ស៊ី។ លោកចាត់ទុកថា វាជាជំនួបដ៏ប្រសើរ និងមានប្រយោជន៍បំផុតមិនធ្លាប់មាននៅក្នុងជីវិតនយោបាយ។

ទីភ្នាក់ងារព័ត៌មានរុស្ស៊ី TASS បានស្រង់សម្តីលោក ម៉ាឌុយរ៉ូ ដូច្នេះ៖« វាជាជំនួបពិភាក្សាដ៏មានប្រយោជន៍បំផុតក្នុងជីវិតការងាររបស់ខ្ញុំ។ យើងសម្រេចពង្រឹងកិច្ចសហប្រតិបត្តិការទ្វេភាគីលើវិស័យយោធា»។

លោក ម៉ាឌុយរ៉ូ បានធ្វើដំណើរទៅទស្សនកិច្ចនៅរុស្ស៊ី និងចូលជួបជាមួយប្រធានាធិបតីរុស្ស៊ី ពូទីន កាលពីសប្តាហ៍មុន ស្របពេលដែលមេដឹកនាំរដ្ឋអាមេរិកឡាទីនរូបនេះរងការថ្កោលទោសពីសហគមន៍អន្តរជាតិជាពិសេសអាមេរិក និងសហភាពអឺរ៉ុបផង។ មេដឹកនាំរូបនេះនិងមនុស្សជំនិតក្នុងរបបដឹកនាំសព្វថ្ងៃក៏រងទណ្ឌកម្មរបស់អាមេរិក និងសហភាពអឺរ៉ុបដែរ។

ក្នុងដំណើរទស្សនកិច្ចដ៏កម្រនេះ ភាគីទាំងពីរបានសម្រេចចុះកិច្ចព្រមព្រៀងមួយចំនួនដូចជាកិច្ចសហប្រតិបត្តិការលើការរុករកប្រេង និងឧស្សាហកម្មរ៉ែ និងពង្រឹងពាណិជ្ជកម្មគ្រាប់ធុញ្ញជាតិ។ ក្រៅពីនេះភាគីរុស្ស៊ីសន្យាជួយវេណេស៊ុយអេឡាពង្រឹងសមត្ថភាពយោធានិងសព្វាវុធដែរ។ បើតាមសម្តីរបស់លោក ម៉ាឌុយរ៉ូ កិច្ចព្រមព្រៀងដែលត្រូវបានចុះនេះផ្តោតលើគម្រោងទាំងអស់ដែលមានទំហំលើស ប្រាំមួយពាន់លានដុល្លារអាមេរិកឯណោះ។

មកដល់បច្ចុប្បន្ននេះ វេណេស៊ុយអេឡា និងរុស្ស៊ីកំពុងអនុវត្តគម្រោងវិនិយោគរួមគ្នាច្រើនសន្ធឹករួចហើយក្នុងនោះមានថាមពល កសិកម្ម សុខាភិបាលនិងឧសថសាស្ត្រ រួមទាំងបច្ចេកវិទ្យា បច្ចេកទេសយោធា និងការស្រាវជ្រាវលើថាមពលនុយក្លេរអ៊ែរបម្រើប្រយោជន៍សុខាភិបាលផងដែរ។

ដោយឡែក ក្រោយទស្សនកិច្ចរបស់លោក ម៉ាឌុយរ៉ូ ប៉ុន្មានថ្ងៃ គេឃើញមានវត្តមានយន្តហោះទម្លាក់គ្រាប់បែកយុទ្ធសាស្ត្ររបស់រុស្ស៊ីប៉ុន្មានគ្រឿងដែរចុះចតនៅរដ្ឋធានីការ៉ាកាស។ ការបញ្ជូនក្រុមយន្តហោះទៅវេណេស៊ុយអេឡាជាចេតនារបស់រុស្ស៊ីក្នុងការផ្ញើសារទៅក្រុងវ៉ាស៊ីនតោន និងសហគមន៍អន្តរជាតិដែលបន្តដាក់គំនាបលើរបបដឹកនាំនេះ ជាពិសេសមានការគំរាមអន្តរាគមន៍យោធាផង។

សម្រាប់រុស្ស៊ី ការបញ្ជូនយន្តហោះនេះជាសារមួយទៅកាន់សហគមន៍អន្តរជាតិថា ខ្លួននៅបន្តគាំទ្ររបបដឹកនាំក្រុងការ៉ាកាស ទោះជាស្ថានភាពបែបណាក៏ដោយ។ មួយទៀត រុស្ស៊ីក៏រឆ្លើយតបនឹងសម្តីគំរាមកំហែងរបស់អាមេរិកប្រឆាំងនឹងរបបដឹកនាំវេណេស៊ុយអេឡាដែរ។

កាលពីដើមខែធ្នូនេះ រដ្ឋមន្ត្រីការពារជាតិអាមេរិកលោក ជេម ម៉ាធីស បានលើកឡើងក្នុងវេទិកាសន្តិសុខថា របបដឹកនាំម៉ាឌុយរ៉ូ គួរតែចាកចេញដើម្បីសង្គ្រោះប្រទេសជាតិជាពិសេសវិស័យសេដ្ឋកិច្ច និងសង្គមដែលកំពុងក្ស័យធននោះ។ យ៉ាងណាមិញ មន្ត្រីជាន់ខ្ពស់រូបនេះមិនបានបកស្រាយពាក្យសម្តីរបស់ខ្លួនឡើយ។

ត្រឡប់មកវិញ ការបញ្ជូនយន្តហោះទម្លាក់គ្រាប់ទៅកាន់វេណេស៊ុយអេឡារងការថ្កោលទោសពីអាមេរិក។ ប្រមុខការទូតអាមេរកលោក ម៉ៃ ប៉ុមប៉េអូ បានទិតៀនថា វាជាដែលធ្វើរឿងឥតប្រយោជន៍ ស្របពេលដែលប្រជាពលរដ្ឋវេណេស៊ុយអេឡាដែលកំពុងរងទុក្ខវេទនាដោយសារវិបត្តិសង្គម និងសេដ្ឋកិច្ចយ៉ាងធ្ងន់ធ្ងរនោះ៕