ជាតិ
ពលរដ្ឋអាចចូលរួមកាត់បន្ថយប្លាស្ទីក តាមរយៈ«ត្រក»
× ភ្នំពេញ៖ ផលិតផលមួយចំនួនអាចដាក់បញ្ចូលគ្នាបានក្នុងត្រកមួយ ដូចជាបន្លែ ដោយមិនបាច់ប្រើថង់ប្លាស្ទិកនោះឡើយ។ ឬមួយគេប្រើថង់រួមមួយ សម្រាប់ទំនិញច្រើនមុខ ពេលដើរផ្សារ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន អះអាងថា នេះជាសកម្មចូលរួមកាត់បន្ថយថង់ប្លាស្ទីកនៅកម្ពុជា។ លោកបន្ថែមថា ពលរដ្ឋក៏អាចប្រើប្រាស់ឡើងវិញនូវថង់ ស្បោង ចៀសវាងការប្រើម្ដងហើយបោះចោល។ ឧទាហរណ៍ ថង់ដែលបានដាក់សាច់ ត្រូវបានប្រើម្ដងទៀតសម្រាប់ដាក់សំរាម។
សូមស្ដាប់ប្រសាសន៍របស់លោក នេត្រ ភក្ត្រា ខាងក្រោមនេះ៖
បញ្ហាថង់ប្លាស្ទីក ជាកង្វល់មួយមិនតែនៅកម្ពុជានោះទេ តែទូទាំងសកលលោក ព្រោះវាមិនងាយរលាយដូចសំរាមចំណីអាហារនោះទេ។ អនុក្រឹត្យរបស់រដ្ឋាភិបាល ដែលចាប់ផ្ដើមអនុវត្តពីខែមេសាឆ្នាំ២០១៨នេះ បានតម្រូវឲ្យផ្សារទំនើប មជ្ឈមណ្ឌលលក់ទំនិញ គិតតម្លៃបន្ថែម បើកាលណាអតិថិជនទាមទារប្រើប្រាស់ថង់ប្លាស្ទីក។ លោក នេត្រ ភក្ត្រា បានឲ្យដឹងថា ផ្សារទំនើបធំៗមួយចំនួន កំពុងអនុវត្តតាមអនុក្រឹត្យនេះបានយ៉ាងល្អ។ ហើយតាមរយៈវិធានការនេះ អតិថិជនខ្លះក៏បានផ្លាស់ប្ដូរទម្លាប់ប្រើថង់ប្លាស្ទីកផងដែរ៕
Tag:
នេត្រ ភក្ត្រា
ប្លាស្ទីក
សំរាម
© រក្សាសិទ្ធិដោយ thmeythmey.com