ការចាប់ឆ្នោតរើសគូ វគ្គ១/៨ផ្តាច់ព្រ័ត្រដើម្បីប្រជែងពានរង្វាន់ UEFA Champions League ត្រូវធ្វើឡើងនៅថ្ងៃទី១៧ ខែធ្នូ ឆ្នាំ២០១៨ នៅឯទីស្នាក់ការកណ្តាល UEFA ដែលស្ថិតក្នុងក្រុង Nyon ប្រទេសស្វីស។
ក្រោយបញ្ចប់ការប្រកួតវគ្គសន្សំពិន្ទុតាមពូល ពី A ដល់ H រៀងៗខ្លួនរួចមក UEFA បានរកឃើញក្រុមចំនួន១៦ ដែលអាចឈានទៅប្រជែងនៅវគ្គ ១/៨ផ្តាច់ព្រ័ត្រ។ អ្វីដែលជាការកត់សម្គាល់នោះ ក្រុមមកពីលីគកំពូលអង់គ្លេសចំនួន៤ ដែលរួមមាន Manchester City, Liverpool, Manchester United និង Tottenham Hotspur សុទ្ធតែបានឡើងទៅកាន់វគ្គនេះទាំងអស់។
ឈានដល់វគ្គ ១/៨ផ្តាច់ព្រ័ត្រ ក្រុមទាំង១៦នឹងត្រូវចាប់ឆ្នោតរើសគូប្រកួតម្តងទៀត ដោយចែកចេញជាពីរ គឺទី១សម្រាប់ក្រុមដែលទទួលបានចំណាត់ថ្នាក់ទីមួយតាមពូល និងទី២ក្រុមដែលបានចំណាត់ថ្នាក់ទី២។
ក្រុមដែលឈរនៅកំពូលតារាងតាមពូលនីមួយៗ នឹងត្រូវប៉ះជាមួយក្រុមដែលបានលេខពីរនៃពូលដទៃទៀត។ ដោយសារក្រុមពីក្របខណ្ឌ Premier League ទាំង៤មានតែ Man City ដែលស្ថិតនៅក្រុមទី១ ហើយ Liverpool, Manchester United និង Tottenham Hotspur សុទ្ធតែនៅក្រុមទី២ ដូច្នេះពួកគេនឹងមិនត្រូវចាប់ឆ្នោតជួបគ្នាឡើយ។ រីឯក្រុមដែលជួបគ្នាក្នុងពូលរួចហើយ ក៏មិនជួបគ្នានៅវគ្គ១៦ក្រុមចុងក្រោយនេះដែរ។
ក្រុមដែលអាចជួបគ្នាជាមួយក្រុមមកពីអង់គ្លេសទាំង៤ខាងលើ
- Man City អាចនឹងត្រូវជួប Ajax, Atlético, Roma ឬ Schalke
- Man Utd អាចនឹងត្រូវជួប Barcelona, Bayern Munich, Dortmund, PSG, Porto និង Real Madrid
- Liverpool អាចនឹងត្រូវជួប Barcelona, Bayern, Dortmund, Juventus, Porto និង Real Madrid
- Spurs អាចនឹងត្រូវជួប Bayern, Dortmund, Juventus, PSG, Porto និង Real Madrid
ការប្រកួតជើងទី១សម្រាប់វគ្គ១៦ក្រុមចុងក្រោយនេះ នឹងប្រព្រឹត្តទៅនៅថ្ងៃទី ១២/១៣ និង ១៩/២០ ខែកុម្ភៈ ហើយជើងទី២ នឹងធ្វើនៅថ្ងៃទី ៥/៦ និង១២/១៣ ខែមីនា ឆ្នាំ២០១៩៕