សហភាពអឺរ៉ុបឯកភាពកាត់បន្ថយការបញ្ចេញឧស្ម័នកាបូនឌីអុកស៊ីតដែលបញ្ចេញពីយានយន្តថ្មីៗឲ្យបាន ៣៧ ភាគរយត្រឹមឆ្នាំ ២០៣០ ខាងមុខ។ ការប្រកាសកាត់បន្ថយកម្រិតការបញ្ចេញឧស្ម័នពុលចូលទៅកាន់បរិយាកាសនេះធ្វើឡើងបន្ទាប់ពីសន្និសីទកំពូលប្រែប្រួលអាកាសលើកទី២៤ (COP24) បិទបញ្ចប់ទៅជាផ្លូវការនៅប្រទេសប៉ូឡូញ។
ផែនការកាត់បន្ថយកម្រិតឧស្ម័នកាបូនិចភាយចេញពីរថយន្តថ្មីៗនេះត្រូវបានព្រមព្រៀងគ្នាដោយសភាអឺរ៉ុប និងរដ្ឋសមាជិកសហភាពអឺរ៉ុបទាំងអស់កាលពីថ្ងៃចន្ទទី ១៧ ខែធ្នូ។ គណៈកម្មការអឺរ៉ុបបានប្រកាសដូច្នេះ បើតាមការចុះផ្សាយរបស់ទីភ្នាក់ងារព័ត៌មាន AFP។
កម្រិតកាត់បន្ថយនោះគឺ ៣៧,៥ភាគរយ ហើយគោលដៅដែលត្រូវសម្រេចឲ្យបាននោះគឺត្រឹមឆ្នាំ ២០៣០។ តាមកិច្ចព្រមព្រៀងដែលមានសុពលភាពអនុវត្តក្នុងសហភាពអឺរ៉ុបទាំងមូលនេះ កម្រិតបំភាយឧស្ម័នកាបូនិច គឺត្រូវតែស្ថិតនៅប្រហែល ៣១ភាគរយទាបជាងកម្រិតបំភាយចេញនៅក្នុងឆ្នាំ ២០២១ដែរ។
បទបញ្ញត្តិថ្មីនេះដែរនឹងអាចជួយរកចំណុចប្រសព្វបានរវាងប្រទេសដែលទាមទារឲ្យមានការកាត់បន្ថយឧស្ម័នកាបូនិច ៣០ភាគរយពីយានយន្ត និងសភាពអឺរ៉ុបដែលបានទាមទារឲ្យកម្រិតនៃការកាត់បន្ថយឧស្ម័នពុលនេះឲ្យខ្ពស់ដល់ ៤០ភាគនោះ។
អង្គការក្រៅរដ្ឋាភិបាលដែលផ្តោតលើការដឹកជញ្ជូននិងបរិស្ថាននោះបានសាទរចំពោះជំហានវិជ្ជមានរបស់សហភាពអឺរ៉ុប ប៉ុន្តែចំណាត់ការនេះនៅតែមិនទាន់ល្អគ្រប់គ្រាន់នៅឡើយទេ។ អង្គការទាំងនោះបានអះអាងថា ការប្តេជ្ញាចិត្តកាត់បន្ថយឧស្ម័នកាបូនិចមិនទាន់លឿនល្មមអាចសម្រេចគោលដៅការដោះស្រាយបញ្ហាប្រែប្រួលអាកាសធាតុសាកលឡើយ។
យ៉ាងណាមិញ ស្នងការទទួលបន្ទុកកិច្ចការសកម្មភាពដោះស្រាយប្រែប្រួលអាកាសធាតុនិងថាមពល Arias Canete មានសុទិដ្ឋនិយមខ្ពស់ចំពោះវិធានការថ្មីដែលសហភាពអឺរ៉ុបដាក់ចេញពេលនេះក្នុងគោលដៅបំបាត់ចោលការបំពុលបរិយាកាសជាពិសេសចេញពីវិស័យដឹកជញ្ជូនតែម្តង។
មន្ត្រីជាន់ខ្ពស់រូបនេះបាននិយាយដូច្នេះ៖ «ដោយមានបទបញ្ញត្តិអនុវត្តត្រឹមត្រូវនេះ យើងកំពុងកំណត់គោលដៅបានត្រឹមត្រូវ និងមានការលើកទឹកចិត្តក្នុងការដោះស្រាយការបំភាយឧស្ម័នពុលដែលចេញពីវិស័យដឹកជញ្ជូនដែរ។ វាប្រាកដណាស់ថា ចំណាត់ការនេះនឹងជួយដល់ឧស្សាហកម្មរបស់យើងឈានទៅលើកស្ទួយបច្ចេកវិទ្យានិងការច្នៃប្រឌិតនានាដើម្បីធានាបាននូវយានជំនិះដែលគ្មានបំភាយឧស្ម័នកាបូនិច និងពង្រឹងការដឹកនាំការប្រើប្រាស់មមធ្យោបាយធ្វើដំណើរដែលមិនបំពុលបរិស្ថាន»។
ការឯកភាពគ្នារវាងសមាជិកសហភាពអឺរ៉ុប និងសភាអឺរ៉ុបកើតឡើងប៉ុន្មានថ្ងៃប៉ុណ្ណោះក្រោយសន្និសីទកំពូលអង្គការសហប្រជាជាតិស្តីពីការប្រែប្រួលអាកាសធាតុនៅ Katowice រដ្ឋធានីប៉ូឡូញ បានបិទបញ្ចប់ទៅដោយបន្សល់ទុករឿងខកចិត្តច្រើនសម្រាប់រដ្ឋជាភាគីទាំងអស់។ ខកចិត្តត្រង់ថា ផែនការសកម្មភាពដោះស្រាយបញ្ហាប្រែប្រួលអាកាសធាតុនៅតែខ្វះមហិច្ឆតាខ្ពស់ក្នុងការកាត់បន្ថយការបំពុលបរិយាយកាសតាមរយៈការបំភាយឧស្ម័នផ្ទះកញ្ចក់ ទោះជាភាគីឯកភាពគ្នាលើសៀវភៅណែនាំសម្រាប់ជំរុញការអនុវត្តកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ក៏ដោយ។
ត្រឡប់មកវិញ បច្ចុប្បន្ននេះ កម្រិតបំភាយឧស្ម័នកាបូនិចដែលចេញពីការដុតផូស៊ីលឥន្ធនៈទូទាំងពិភពលោកបានកើនឡើងដល់ ២,៧ភាគរយនៅក្នុងឆ្នាំ ២០១៨ ដែលជាកម្រិតមួយគួរឲ្យបារម្ភ។ បើតាម របាយការណ៍ស្រាវជ្រាវដែលចេញផ្សាយដើមខែធ្នូដោយសាស្ត្រាចារ្យនៃនៅក្នុងសាកលវិទ្យាល័យ East Anglia បរិមាណនេះបន្តកើនពីរឆ្នាំជាប់គ្នា បន្ទាប់ពីស្ថិតនៅកម្រិតមួយថេរអស់បីឆ្នាំមកនោះ។ គេព្រួយបារម្ភខ្លាំងថា ពិភពលោកកំពុងដើរកាន់តែចាកឆ្ងាយពីគោលដៅដោះស្រាយបញ្ហាប្រែប្រួលអាកាសធាតុហើយនៅពេលនេះ៕