ជាតិ
នយោបាយជាតិ
លោក សុខ ឥសាន៖ លោក សម រង្ស៊ី លួចផ្ញើសារមកសម្តេច ដើម្បីសុំចរចា
× ការដែលលោក សម រង្ស៊ី ប្រកាសថា មិនចរចាជាមួយសម្តេច ហ៊ុន សែន គ្រាន់តែជាការបំភាន់ភ្នែកគេឯងប៉ុណ្ណោះ។ នេះជាការលើកឡើងរបស់លោក សុខ ឥសាន អ្នកនាំពាក្យគណបក្សប្រជាជនកម្ពុជា។
លោក សុខ ឥសាន បានសរសេរសារក្នុងបណ្តាញទំនាក់ទំនងតេឡេក្រាមថា តាមពិត នៅក្រោយឆាក លោក សម រង្ស៊ី បានលួចផ្ញើសារតាមបណ្តាញទំនាក់ទំនង Twitter ទៅកាន់សម្តេច ហ៊ុន សែន ដើម្បីសុំចរចា ក្នុងនាមជាអ្នកតំណាងឲ្យថ្នាក់ដឹកនាំជាង១០០នាក់នៃអតីតគណបក្សសង្គ្រោះជាតិ ដែលត្រូវបានដកសិទ្ធិនយោបាយ។ លោក បានសេរសេរសារទៅកាន់អ្នកកាសែត នៅរសៀលថ្ងៃទី១៩ ខែធ្នូនេះ យ៉ាងដូច្នេះថា៖«ទណ្ឌិតនេះ លួចវាយ Message មកផ្ទាល់តែម្តង»។
អ្នកនាំពាក្យរូបនេះ បានសរសេរទៀតថា ទោះលោក សម រង្ស៊ី ប្រើល្បិចយ៉ាងណា ក៏មិនអាចបិទបាំងបានដែរ ព្រោះរឿងនេះ ត្រូវបានបែកធ្លាយជាសាធារណ:រួចហើយ។ សារព័ត៌មានថ្មីៗ ព្យាយាមសួរលោក បន្ថែម ជុំវិញបញ្ហានេះ តែលោក ពុំអាចផ្តល់ចម្លើយបានទេ ដោយសារតែកំពុងជាប់ប្រជុំក្នុងសន្និបាតនៃគណៈកម្មាធិការកណ្តាលគណបក្សប្រជាជនកម្ពុជា។
យ៉ាងណាក៏ដោយ លោក សម រង្ស៊ី បានប្រកាសថា លើកនេះ រូបលោក ក៏ដូចជាអតីតគណបក្សសង្គ្រោះជាតិ នឹងមិនចរចាជាមួយសម្តេច ហ៊ុន សែន ជាដាច់ខាត។ លោក យល់ថា មានតែសហគមន៍អន្តរជាតិទេ ទើបមានឥទ្ធិពលលើរដ្ឋាភិបាលកម្ពុជា នឹងអាចធ្វើឲ្យរដ្ឋាភិបាលកម្ពុជា កែប្រែឥរិយាបថ។
ពីក្រៅប្រទេស លោក សម រង្ស៊ី ទាមទារប្រាំចំណុចសំខាន់ៗពីរដ្ឋាភិបាលកម្ពុជា គឺដោះលែងលោក កឹម សុខា, ទម្លាក់បទចោទចេញពីថ្នាក់ដឹកនាំទាំងអស់នៃអតីតគណបក្សប្រឆាំង, ឲ្យអតីតគណបក្សប្រឆាំង ធ្វើសកម្មភាពឡើងវិញ, ប្រគល់តំណែងជូនសមាជិកក្រុមប្រឹក្សាឃុំ-សង្កាត់វិញ, និង បោះឆ្នោតសាជាថ្មី៕
Tag:
សម រង្ស៊ី
សុខ ឥសាន
ហ៊ុន សែន
ចរចា
© រក្សាសិទ្ធិដោយ thmeythmey.com