អន្តរជាតិ
ចិនបាញ់បង្ហោះផ្កាយរណបទៅអង្កេត និងសិក្សាពីផ្នែកងងឹតនៃភពព្រះចន្ទ
× ដើខែធ្នូកន្លងទៅនេះ ភ្នាក់ងារខាងការរុករកនិងស្រាវជ្រាវលំហអាកាសរបស់ចិនបានបាញ់បង្ហោះផ្កាយរណបរបស់ខ្លួន ដើម្បីគាំទ្រដំណើរបេសកកម្មត្រួតពិនិត្យនិងសិក្សាពីផ្នែកងងឹតនៃភពព្រះចន្ទ។ នេះបើតាមការចុះផ្សាយរបស់ទីភ្នាក់ងារព័ត៌មានចិន Xinhua។
ផ្កាយរណបចិនមួយដែលត្រូវបានបង្ហោះនោះមានឈ្មោះថា Chang’e-4 ហើយវាជាផ្កាយរណបលើកទីមួយដែលត្រូវចុះចតផ្ទាល់នៅភពព្រះចន្ទ។ កាលពីពេលកន្លងទៅ ផ្កាយរណបជាច្រើនត្រូវបានបង្ហោះទៅ ដោយគ្រាន់តែហោះហើរលើគន្លងមួយជុំវិញភពព្រះចន្ទប៉ុណ្ណោះ។
ភពរណបរបស់ផែនដីមួយនេះមានចំងាយប្រមាណជា ៣៨៤០០០ គីឡូម៉ែត្រ ឬស្មើនិងចម្ងាយពីទីក្រុងភ្នំពេញទៅទីក្រុងញូវយ៉ក២៧ដង។ ជាធម្មតា ផ្កាយរណបត្រូវការរយៈពេល២ទៅ៣ថ្ងៃដើម្បីធ្វើដំណើរទៅដល់គោលដៅមួយនេះ។
ដោយសារទំនាញរបស់ភពផែនដីមានលក្ខណៈពិសេស ទើបធ្វើឲ្យភពព្រះចន្ទបែរមុខតែម្ខាងមករកផែនដីតែប៉ុណ្ណោះ។ នេះក៏ដោយសារតែពេលវេលារង្វិលជុំ និងរង្វិលខ្ងាល់របស់ព្រះចន្ទមានភាពស្រដៀងគ្នា ទើបធ្វើឲ្យអ្នកសង្កេតពីផែនដីមិនអាចមើលឃើញផ្នែកម្ខាងទៀតនៃព្រះចន្ទឡើយ។
ជំហានដ៏ធំរបស់ប្រទេសចិនក្នុងការដណ្តើមអំណាចបច្ចេកវិទ្យាគ្រប់គ្រងលំហនេះមានការគាំទ្រយ៉ាងខ្លាំងពីសំណាក់ប្រធានាធិបតីចិនលោក ស៊ី ជិនភីង។
គេចាំបានថា កាលពីសម័យសង្គ្រាមត្រជាក់ មហាអំណាចដែលអាចមានឥទ្ធិពលលើលំហគឺមានត្រឹមសហរដ្ឋអាមេរិក និងសហភាពសូវៀតប៉ុណ្ណោះ។ ប៉ុន្តែពេលបច្ចុប្បន្ន មហាអំណាចជាន់ថ្មីដទៃទៀតមានដូចជា ឥណ្ឌា ចិន និងសហភាពអឺរ៉ុបក៏កំពុងកសាងឥទ្ធិពលខ្លាំងគួរសមក្នុងវិស័យបច្ចេកវិទ្យាលំហរ ដែរ។
ត្រឡប់មកវិញផ្កាយរណបមួយនេះនឹងត្រូវអ្នកជំនាញប្រើប្រាស់ដើម្បីពិនិត្យមើលសណ្ឋានដី រូបផ្គុំដី និង សារធាតុបង្ក ដោយប្រើឧបករណ៍រលកវិទ្យុទាបក្នុងការទាក់ទងជាមួយផែនដីផង។ គេរំពឹងថា រដ្ឋាភិបាលចិននឹងមានលទ្ធភាពពង្រឹងឥទ្ធិពលរបស់ខ្លួនក្នុងផ្នែកអវកាសវិទ្យា ប្រហាក់ប្រហែលនឹងអាមេរីក និងរុស្សីដែរនៅក្នុងឆ្នាំ២០៣០ខាងមុខនេះ៕
Tag:
ភពព្រះចន្ទ
ចិន
លំហអាកាស
© រក្សាសិទ្ធិដោយ thmeythmey.com