មកដល់កម្ពុជាភ្លាម អគ្គរដ្ឋទូតចិនថ្មី រិះគន់ប្រទេសលោកខាងលិច ដែលយកបញ្ហាតូចតាចមកលាបពណ៌កម្ពុជា-ចិន

ជាតិ

មកដល់កម្ពុជាភ្លាម អគ្គរដ្ឋទូតចិនថ្មី រិះគន់ប្រទេសលោកខាងលិច ដែលយកបញ្ហាតូចតាចមកលាបពណ៌កម្ពុជា-ចិន

27, Dec 2018 , 11:12 am

រូបភាព

(រូបខាងឆ្វេង)អគ្គរដ្ឋទូតចិនថ្មី ប្រចាំកម្ពុជាលោក Wang Wentian ក្នុងជំនួបជាមួយលោក ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ។

ដោយ: ថ្មីៗ

ភ្នំពេញ៖ ទំនាក់ទំនងកម្ពុជា-ចិន រឹតតែស្អិតល្មួតល្អ ដែលមិនអាចបំបែកបាន ប៉ុន្តែប្រទេសលោកខាងលិចខ្លះ តែងតែមានបំណងចង់បំបែកសម្ព័ន្ធភាពភាគីទាំងពីរ តាមរយៈការយកបញ្ហាតូចតាចមកលាបពណ៌។ នេះជាការលើកឡើងរបស់អគ្គរដ្ឋទូតចិនថ្មី ប្រចាំកម្ពុជាលោក Wang Wentian ក្នុងជំនួបជាមួយលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ។

លោក Wang Wentian ដែលត្រូវចូលកាន់តំណែងអគ្គរដ្ឋទូតថ្មីប្រចាំកម្ពុជា បានលើកយកជំហរថ្នាក់ដឹកនាំចិន មកប្រាក់រដ្ឋមន្ត្រីការបរទេសកម្ពុជាថា ចិននៅតែគាំទ្ររាល់ការសម្រេចរបស់រដ្ឋាភិបាលកម្ពុជា និងមិនជ្រៀតជ្រែកកិច្ចការផ្ទៃក្នុងកម្ពុជាឡើយ។ ហើយអ្វីដែលថ្នាក់ដឹកនាំចិនប្ដេជ្ញាចិត្តនោះ គឺការបន្តអនុវត្តកិច្ចសហប្រតិបត្តិការលើគ្រប់វិស័យ រួមទាំងទំនាក់ទំនងដូចដែកថែប ដែលមិនអាចកាត់ផ្ដាច់បាន។

បន្ទាប់ពីនិយាយពីជំហរថ្នាក់ដឹកនាំខ្លួនហើយ លោក Wang Wentian ក៏ឆ្លៀតរិះគន់លើប្រទេសលោកខាងលិចថា បណ្ដាប្រទេសទាំងនោះ តែងតែយកបញ្ហាតូចតាចបង្កើតទៅជារឿងធំ ដើម្បីលាបពណ៌មកលើទំនាក់ទំនងរវាងកម្ពុជា-ចិន។

អ្នកនាំពាក្យក្រសួងការបរទេសលោក កេត សុផាន់ ដែលបានស្រង់សម្តីអគ្គរដ្ឋទូតចិនថ្មី ក្នុងជំនួបលោកប្រាក់ សុខុន បាននិយាយដូច្នេះថា៖« មានបរទេសមួយចំនួន ជាពិសេសលោកខាងលិចតែងតែលាបពណ៌ លើរឿងករណីតូចតាច ក៏ប៉ុន្តែយករឿងនេះមកលាបព័ណ៌ក្នុងទំនាក់ទំនងសហប្រតិបត្តិការរវាងកម្ពុជា-ចិន។ ហើយនេះជាការប្រឈម ប៉ុន្តែមិនមែនជារឿងធំ វាជារឿងតូចតាច ដែលប្រទេសយើងទាំងពីរនឹងបន្តកិច្ចសហប្រតិបត្តិការកាន់តែជិតស្និតថែមទៀត»។

ទាក់ទងនឹងចំណុចនេះលោក ប្រាក់ សុខុន រដ្ឋមន្ត្រីក្រសួងការបទេស បាននិយាយក្នុងន័យចំអកថា ប្រទេសលោកខាងលិចទាំងនោះមិនសប្បាយចិត្ត ចំពោះទំនាក់ទំនងកម្ពុជា-ចិន គឺពួកគេតែងតែរកមធ្យោបាយ ដើម្បីបំបែកបំបាក់បែបនេះ។ «ជាធម្មតាទេ ប្រទេសដែលគេមិនសប្បាយចិត្ត គេតែងតែយករឿងតូចតូចបំប៉ោងជារឿងធំ។ តែតាមពិតជាក់ស្តែងការវិនិយោគធំបែបនេះ គឺបាននាំមកនូវផលប្រយោជន៍ដល់កម្ពុជា និងចិន»។នេះជាការលើកឡើងរបស់អ្នកនាំពាក្យ ដែលបានស្រង់សម្ដីលោក ប្រាក់ សុខុន។

អ្នកនាំពាក្យរូបនេះ បានបន្ថែមថា ភាគីចិន ក៏បានគាំទ្រលើកិច្ចការអនុវត្តច្បាប់ ចំពោះជនជាតិចិន ដែលមករស់នៅកម្ពុជា ហើយប្រព្រឹត្តបទល្មើសខុសច្បាប់ផងដែរ។ ហើយចិន នឹងចូលរួមសហការជាមួយអាជ្ញាធរកម្ពុជាជានិច្ច ក្នុងការចាត់វិធានការបង្ក្រាបជនជាតិចិន ដែលប្រព្រឹត្តខុសច្បាប់ទាំងនោះទៀតផង៕