ជាតិ
ហ្វេសប៊ុកស្ថានទូតអាមេរិកប្រចាំកម្ពុជា នឹងអសកម្ម ដោយសារបញ្ហាថវិការដ្ឋាភិបាលអាមេរិក
× ភ្នំពេញ៖ ទំព័រហ្វេសប៊ុកទូតអាមេរិកប្រចាំកម្ពុជា នឹងអសកម្មមួយរយៈ ដោយសារបញ្ហាបែងចែកថវិការដ្ឋាភិបាលអាមេរិក។ នេះបើតាមហ្វេសប៊ុកផ្លូវការរបស់ស្ថានទូតអាមេរិក។
ស្ថានទូតអាមេរិក បានសរសេរថា ទំព័រហ្វេសប៊ុកខ្លួន នឹងអាក់ខានបង្ហោះព័ត៌មាន យ៉ាងសកម្មដូចមុនទៀតហើយ លើកលែងព័ត៌មានបន្ទាន់ ទាក់ទងនិងសុវត្ថិភាព និងសន្តិសុខប៉ុណ្ណោះ។ ស្ថានទូតអាមេរិកបានសរសេរដូច្នេះថា៖«ដោយសារមានបញ្ហានៅក្នុងការកំណត់ការបែងចែកថវិកាសម្រាប់ចំណាយក្នុងរដ្ឋាភិបាលសហរដ្ឋអាមេរិក គណនីនេះនឹងមិនមានបង្ហោះខ្លឹមសារ និងរូបភាពថ្មីៗទៀងទាត់ទេ រហូតទាល់តែកិច្ចដំណើរការការងារមានភាពពេញលេញឡើងវិញ ដោយលើកលែងតែករណីព័ត៌មានបន្ទាន់ទាក់ទងនឹងសុវត្ថិភាព និងសន្តិសុខ»។
បើទោះជាទំព័រហ្វេសប៊ុកគ្មានសកម្មភាពដូចមុនក្តី ប៉ុន្តែសេវាទាក់ទងនឹងលិខិតឆ្លងដែន និងទិដ្ឋាការទាំងអស់ដែលបានកំណត់ពេលរួចហើយ នៅស្ថានទូតអាមេរិកនៅទីក្រុងភ្នំពេញ នឹងបន្តធ្វើដដែល។ «ចំពោះព័ត៌មានស្តីពីសេវា និងកិច្ចដំណើរការការងាររបស់យើង សូមចូលមើលក្នុងគេហទំព័រ
http://ow.ly/cQqm50k2bNo »។ នេះបើតាមទូតអាមេរិក។
កញ្ចប់ថវិការបស់រដ្ឋាភិបាលអាមេរិក មានការកំណត់បែងចែកសម្រាប់ប្រើប្រាស់នេះ គឺវាមានការពាក់ព័ន្ធនឹងបំណងរបស់លោក ដូណាល់ ត្រាំ ប្រធានាធិបតីអាមេរិក ដែលចង់សាងសង់ជញ្ជាំងព្រំដែនជាមួយប្រទេសម៉ិកស៊ិក។ លោក ត្រាំ បានទារឲ្យសភាបញ្ចូលលុយ៥ពាន់លានដុល្លារក្នុងច្បាប់ថវិកាថ្មី ប៉ុន្តែសំណើត្រូវបានបដិសេធដោយបណ្តាបក្សប្រជាធិបតេយ្យ និងសមាជិកបក្សសាធារណរដ្ឋមួយចំនួនផង។
ដោយសារការទាស់ទែងខ្វែងគំនិតគ្នានេះហើយ ទើបលោក ត្រាំ បដិសេធចុះហត្ថលេខាលើសេចក្តីព្រាងច្បាប់ថវិកា ព្រោះតែលោកមិនបានទទួលលុយសង់ជញ្ជាំងតាមបំណង។ ដោយសារគ្មានការអនុម័តកញ្ចប់ហិរញ្ញវត្ថុសម្រាប់ចាយវាយនេះហើយ ទើបវាបណ្តាលឲ្យក្រសួង និងទីភ្នាក់ងាររដ្ឋាភិបាលសហព័ន្ធអាមេរិកជាច្រើនត្រូវផ្អាកសកម្មភាពបណ្តោះអាសន្នដោយសារខ្វះលុយ។
តាមលក្ខខណ្ឌបច្ចេកទេស ដើម្បីអនុម័តសេចក្តីព្រាងច្បាប់ថវិកានៅព្រឹទ្ធសភា វាចាំបាច់មានសំឡេងគាំទ្រ ដល់ទៅ ៦០ ។ បច្ចុប្បន្នបក្សសាធារណរដ្ឋក្តោបក្តាប់អាសនៈភាគច្រើន ៥១ក្នុងព្រឹទ្ធសភា ប៉ុន្តែគេនៅត្រូវការសំឡេងគាំទ្រប្រាំបួនទៀតពីសមាជិកបក្សប្រជាធិបតេយ្យដើម្បីបង្គ្រប់សំឡេង៕
Tag:
អាមេរិក
ហ្វេសប៊ុក
© រក្សាសិទ្ធិដោយ thmeythmey.com