ជាតិ
សេដ្ឋកិច្ច
លោក ស៊ុន ចាន់ថុល ស្នើ JICA សិក្សាគម្រោងរថភ្លើងលើអាកាស ដល់ពហុកីឡដ្ឋានមរតកតេជោ
× ភ្នំពេញ៖ ទីភ្នាក់ងារសហប្រតិបត្តិការអន្តរជាតិជប៉ុន (JICA) កំពុងសិក្សាគម្រោងរថភ្លើងលើអាកាស ពីព្រលានយន្តហោះអន្តរជាតិភ្នំពេញ មកកណ្ដាលរាជធានី។ លើសពីនេះ រដ្ឋាភិបាលបានស្នើឲ្យ JICA ពង្រីកការសិក្សាគម្រោងនេះ មកដល់ពហុកីឡដ្ឋានមរតកតេជោ ស្របពេលកម្ពុជាត្រៀមធ្វើជាម្ចាស់ផ្ទះស៊ីហ្គេមឆ្នាំ២០២៣ ។
«ក្រសួងសាធារណការ និងដឹកជញ្ជូន សហការជាមួយ JICA កំពុងតែសិក្សាគម្រោងផ្លូវរទេះភ្លើងលើអាកាស (AGT) ខ្ញុំក៏បានស្នើទៅភាគីជប៉ុនជួយសិក្សាបន្តមកដល់ពហុកីឡដ្ឋានមរតកតេជោ តែម្ដង។ គេកំពុងសិក្សា យើងមិនទាន់ដឹងថា តើការសិក្សានោះអាចចប់សព្វគ្រប់ ឬបន្តមកដល់កន្លែងនេះឬអត់ទេ?»។ នេះជាប្រសាសន៍របស់លោក ស៊ុន ចាន់ថុល ដែលបានថ្លែងប្រាប់អ្នកកាសែតក្នុងឱកាសលោកចូលរួមជិះកង់អបអរសាទរពិធីសម្ពោធវិមានអនុស្សាវរីយ៍នយោបាយឈ្នះ-ឈ្នះ នៅថ្ងៃទី២៨ខែធ្នូនេះ។
គួររម្លឹកថា លោក ស៊ុន ចាន់ថុល ធ្លាប់ប្រកាសថា ការសិក្សាគម្រោងរថភ្លើងលើអាកាសនេះ នឹងត្រូវបញ្ចប់នៅឆ្នាំ២០១៨ ឬឆ្នាំ២០១៩ ដែលគម្រោងនេះត្រូវបានប៉ាន់ស្មានថានឹងត្រូវចំណាយមិនតិចជាង ៨០០លានដុល្លារ។ ប៉ុន្តែការប្រកាសលើកមុន គឺកំណត់ការសិក្សាត្រឹមទីតាំងអាកាសយានដ្ឋានអន្តរជាតិភ្នំពេញ មកម្ដុំផ្សារធំថ្មី ប្រវែង ១៨គីឡូម៉ែត្រ៕
© រក្សាសិទ្ធិដោយ thmeythmey.com