នៅក្នុងឆ្នាំ២០១៨ សារព័ត៌មានថ្មីៗ បានទទួលការអញ្ជើញឲ្យយកព័ត៌មាន និងចូលរួមវេទិកាអន្តរជាតិនៅបរទេសចំនួន២១លើក។ អ្នកកាសែត និងថ្នាក់ដឹកនាំសារព័ត៌មានថ្មីៗសរុប១២នាក់ បានចូលរួមវេទិកាអន្តរជាតិទាំងនោះនៅក្នុងប្រទេសចំនួន១០ ដែលរួមមានប្រទេសសមាជិកអាស៊ាន ប្រទេសចិន សហរដ្ឋអាមេរិក សាធារណរដ្ឋកូរ៉េ និងឥណ្ឌា។ គ្រាន់តែ នៅក្នុង ឆ្នាំ ២០១៧ អ្នកកាសែតថ្មីៗ ៩នាក់ បានចេញយកព័ត៌មាន ២១ លើក ក្នុងប្រទេស ចំនួន ១១។ ក្នុងឆ្នាំ ២០១៦ អ្នកកាសែតនៃសារព័ត៌មានថ្មីៗ ៦ នាក់ ត្រូវបាន អញ្ជើញ ឲ្យ ចូលរួម យក ព័ត៌មាន ១៣ លើក នៅក្នុង ប្រទេស ចំនួន៦។ ចំណែកឯក្នុង ២០១៥ អ្នកកាសែត ១០នាក់របស់ថ្មីៗ ក៏បានចេញ យកព័ត៌មាន និងបានចូលរួមវគ្គបណ្តុះបណ្តាលចំនួន១៨ លើក នៅក្នុងប្រទេសចំនួន៩ផងដែរ ។
សារព័ត៌មានថ្មីៗ សូមថ្លែងអំណរគុណដល់ម្ចាស់អ្នករៀបចំកម្មវិធីទាំងអស់ដូចជា៖ សារព័ត៌មានចិន People’s Daily, ស្ថានទូតសហរដ្ឋអាមេរិកប្រចាំកម្ពុជា, ក្រសួងការបរទេសឥណ្ឌា, ស្ថានទូតសិង្ហបុរីប្រចាំនៅកម្ពុជា, ក្រសួងទេសចរណ៍ម៉ាឡេស៊ី, Canal France International, ONE FC, សម្ព័ន្ធអ្នកកាសែតអាស៊ីអាគ្នេយ៍ (SEAPA), ក្រុមហ៊ុន Star Auto Camboida, អង្គការសេដាក និងអង្គការ NGO Forum ដែលបានផ្តល់កិត្តិយស សេចក្តីទុកចិត្ត និងគាំទ្រសារព័ត៌មាន
thmeythmey.com យើងខ្ញុំ។
១. លោក លាង ដឹលុច បានបំពេញបេសកកម្មទៅប្រទេសចំនួន២ នៅឡាវ និងចិន៖
ចូលរួមកិច្ចប្រជុំសារព័ត៌មាននៃកិច្ចសហប្រតិបត្តិការមេគង្គឡានឆាងលើកទី២ នៅប្រទេសឡាវ
ចូលរួមវេទិកាកិច្ចសហប្រតិបត្តិការសារព័ត៌មានឆ្នាំ២០១៨ ស្តីពីខ្សែក្រវ៉ាត់ និងវិថី នៅប្រទេសចិន
២. លោក អ៊ឹង ចំរើន ចូលរួមសិក្ខាសាលាស្តីពីព័ត៌មានមិនពិតនៅទីស្នាក់ការក្រុមហ៊ុន Google ប្រទេសសិង្ហបុរីរយៈពេល២ថ្ងៃ បន្ទាប់មកបន្តចូលរួមក្នុងវេទិកាអ្នកសារព័ត៌មានក្រោមប្រធានបទ «ព័ត៌មានក្លែងបន្លំ» ដដែល រយៈពេល៣ថ្ងៃបន្ថែមទៀតក្នុងខែមិថុនា។
៣. លោក សៅ ផលនិស្ស័យ បានចូលរួមព្រឹត្តិការណ៍អន្តរជាតិចំនួន៣ នៅក្នុងប្រទេសសិង្ហបុរី ឥណ្ឌា និងឥណ្ឌូណេស៊ី៖
ចូលរួមក្នុងកម្មវិធីទស្សនកិច្ចអ្នកកាសែតអាស៊ានរៀបចំឡើងដោយក្រសួងគមនាគមន៍ និងព័ត៌មានសិង្ហបុរីនាខែសីហា។
ចូលរួមក្នុងកម្មវិធីយកព័ត៌មានកិច្ចសន្ទនាដែលី (Delhi Dialogue លើកទី ១០) នៅរដ្ឋធានីញូវដេលីខែកក្កដា រៀបចំឡើងដោយក្រសួងការបរទេសឥណ្ឌា។
លោក សៅ ផលនិស្ស័យ ត្រូវបានអញ្ជើញឲ្យចូលរួមជាវាគ្មិនក្នុងកិច្ចពិភាក្សាតុមូលស្តីពីសេរីភាពសារព័ត៌មានតំបន់ 4M Asia ដែលរៀបចំឡើងដោយទូរទស្សន៍បារាំង CFI នៅក្រុងហ្សាការតា ប្រទេសឥណ្ឌូណេស៊ី នាខែមេសា។
៤. លោក គី សុខលីម ចូលរួមព្រឹត្តិការណ៍ចំនួន២ នៅថៃ និងវៀតណាម៖
ចូលរួមសិក្ខាសាលាថ្នាក់តំបន់ស្ដីពីព័ត៌មានក្លែងបន្លំនៅទីក្រុងបាងកក ប្រទេសថៃ
ដំណើរទស្សនកិច្ចនៅវៀតណាមដើម្បីពង្រឹងកិច្ចសហប្រតិបត្តិការរវាងអ្នកសារព័ត៌មានកម្ពុជា និងអ្នកសារព័ត៌មានវៀតណាម
៥. កញ្ញា ខន ចំប៉ា ចូលរួមក្នុងព្រឹត្តិការណ៍ចំនួន២ នៅប្រទេសចិន និងសិង្ហបុរី៖
ចូលរួមវេទិកាកិច្ចសហប្រតិបត្តិការសារព័ត៌មានឆ្នាំ២០១៨ ស្តីពីខ្សែក្រវ៉ាត់ និងវិថី និងវេទិកាកិច្ចសហប្រតិបត្តិការសារព័ត៌មាន១០បូក៣ (Asean+3) លើកទី៩ នៅខេត្តហៃណាន់ និងទីក្រុងប៉េកាំង
ចួលរួមវគ្គបណ្តុះបណ្តាលរយៈពេល២ថ្ងៃ ពីថ្ងៃទី២៣ ដល់ទី២៤ ខែមិថុនា នៅក្នុងប្រទេសសិង្ហបុរី ស្តីពីការទប់ស្កាត់ និងផ្ទៀងផ្ទាត់ព័ត៌មាន ដែលរៀបចំដោយក្រុមហ៊ុន Google ប្រចាំតំបន់អាស៊ីប៉ាស៊ីហ្វិក។
៦. លោក តន ចាន់រិទ្ធារ៉ា ចូលរួមព្រឹត្តិការណ៍អន្តរជាតិនៅប្រទេសចិន ឡាវ ថៃ កូរ៉េខាងត្បូង និងអាមេរិក៖
ចូលរួមជំនួបកំពូលសារព័ត៌មាននៃកិច្ចសហប្រតិបត្តិការមេគង្គ-ឡានឆាងក្នុងខែកក្កដា នៅទីក្រុងវៀងចន្ទន៍ ប្រទេសឡាវ
ចូលរួមវេទិកាព្រៃឈើ និងប្រជាជននៅខែសីហាក្នុងទីក្រុងបាងកក ប្រទេសថៃ
ចូលរួមសន្និសីទតំបន់ស្ដីពីព័ត៌មានក្លែងបន្លំក្នុងខែកញ្ញានៅទីក្រុងបាងកក ប្រទេសថៃ
ចូលរួមសិក្ខាសាលាស្ដីពីប្រព័ន្ធផ្សព្វផ្សាយថ្មីនៅទីក្រុងប៉េកាំង ប្រទេសចិនក្នងខែមិថុនា
ឈរថតនៅខាងមុខសេតវិមានអំឡុងដំណើរទស្សនកិច្ចព័ត៌មានស្ដីពីតំបន់អាស៊ីបូព៌ា។
ថតរូបជាមួយប្រធានសភាកូរ៉េខាងត្បូងអំឡុងដំណើរទស្សនកិច្ចព័ត៌មានស្ដីពីអាស៊ីបូព៌ាកាលពីខែវិច្ឆិកា
៧. លោកស្រី អ៊ីសា រ៉ហានី ចូលរួមយកព័ត៌មាន PTM 2018 ដែលរៀបចំឡើងដោយ PATA និងក្រសួងទេសចរណ៍ម៉ាឡេស៊ី ដែលរៀបចំឡើងនៅកោះឡាំងកាវី ប្រទេសម៉ាឡេស៊ី ពីថ្ងៃទី ១២ដល់១៥ ខែកញ្ញា ឆ្នាំ ២០១៨។ កម្មវិធីនេះ មានអ្នកសារព័ត៌មានជាង ១០ប្រទេសចូលរួម។
៨. កញ្ញា ញឹក ស្រីល័ក្ខ បំពេញបេសកកម្មនៅប្រទេសចំនួន២ មានថៃ និងឡាវ៖
ចូលរួមដំណើរទស្សនកិច្ចនៅខេត្តចម្ប៉ាសាក់ ប្រទេសឡាវ ស្ដីពីកសិកម្មផ្ដោតលើដំណាំកាហ្វេ ដែលរៀបចំដោយអង្គការសេដាក។ ដំណើរទស្សនកិច្ចនេះ រយៈពេល ៤ថ្ងៃ ចាប់ពីថ្ងៃទី ២៦ ដល់ ២៩ ខែធ្នូ។
ដំណើរទស្សនកិច្ច ស្ដីពីអភិបាលកិច្ចដីធ្លី និងធនធានធម្មជាតិ ក្នុងបរិបទនៃការទទួលខុសត្រូវផ្នែកសង្គមរបស់ក្រុមហ៊ុនសាជីវកម្ម ការអភិវឌ្ឍប្រកបដោយចីរភាព និង VGGT រៀបចំដោយវេទិកានៃអង្គការរដ្ឋាភិបាលស្តីពីកម្ពុជានៅថៃ
៩. លោក ប៉ាន់ បូនី ចូលរួមដំណើរទស្សនកិច្ចនៅខេត្តចម្ប៉ាសាក់ ប្រទេសឡាវ ស្ដីពីកសិកម្មផ្ដោតលើដំណាំកាហ្វេ ដែលរៀបចំដោយអង្គការសេដាក។ ដំណើរទស្សនកិច្ចនេះ រយៈពេល ៤ថ្ងៃ ចាប់ពីថ្ងៃទី ២៦ ដល់ ២៩ ខែធ្នូ
១០. លោក ជាវ សំណាង បានចូលរួមក្នុងព្រឹត្តិការណ៍បទពិសោធ នៃការបើកបររថយន្ត Mercedes-Benz ប្រចាំឆ្នាំ២០១៨ នៅម៉ាឡេស៊ី
១១. លោក សឿន វណ្ណឌេត ចូលរួមយកព័ត៌មានការប្រកួត ONE Championship នៅសិង្ហបុរី។
១២. លោក រំដួល ចិត្រា ចូលរួមកម្មវិធីទស្សនកិច្ចការងាររៀបចំឡើងដោយសហព័ន្ធអ្នកកាសែតថៃ និង សមាគមអ្នកកាសែតឡាវ