ជាតិ
សង្គមជាតិ
២០១៩៖ រាជការ, ប៉ូលិស, ទាហាន, គ្រូបង្រៀន, ពេទ្យ, កម្មករ កើនប្រាក់ខែទាំងអស់គ្នា
× ភ្នំពេញ៖ មន្ត្រីរាជការ នគរបាល ទាហាន គ្រូបង្រៀន និង គ្រូពេទ្យ ត្រូវបានរាជរដ្ឋាភិបាល ដំឡើងប្រាក់បៀវត្សរ៍ប្រចាំខែបន្ថែមទៀត ចាប់ពីខែមករា ឆ្នាំ២០១៩នេះតទៅ។ នេះបើតាមអនុក្រឹត្យស្តីពីសេក្តីព្រាងច្បាប់ថវិកាជាតិឆ្នាំ២០១៩។
បើតាមការសម្រេចរបស់រដ្ឋាភិបាល ប្រាក់ខែរបស់មន្ត្រីរាជការស៊ីវិល កើនពី១.០១៤.៤៥០រៀល ដល់ ១.០៧០.១០០រៀល នៅខែមករា ឆ្នាំ២០១៩ ហើយនឹងបន្តកើនឡើងល់ ១.១០០.១០០រៀល ចាប់ពីខែមេសា ឆ្នាំ២០១៩។ ចំណែកមន្ត្រីរាជការ ដែលបានជាប់កិច្ចសន្យា តាមក្រសួងនិងស្ថាប័ន នឹងទទួលបាន៦៥ម៉ឺនរៀលក្នុងមួយខែ ដែលពីមុនត្រឹម៦០ម៉ឺនរៀល។
សម្រាប់ប្រាក់ខែរបស់គ្រូបង្រៀននិងគ្រូពេទ្យ ត្រូវដំឡើងពី ១,១១៤.៤៥០រៀល ដល់ ១.១៧០.១០០រៀល នៅខែមករា ឆ្នាំ២០១៩ ហើយនឹងត្រូវដំឡើងដល់ ១.២០០.១០០រៀល នៅខែមេសា ឆ្នាំ២០១៩។
ចំពោះប្រាក់ខែទាហាន (ពលទោ) ដែលពីមុនត្រឹម ៩៧៦.៥៥០រៀល ត្រូវបន្ថែមដល់ ១.០២៥.៩០០ រៀល នៅខែមករា ឆ្នាំ២០១៩ ហើយនឹងត្រូវបន្ថែមដល់ ១.០៥៥.៩០០រៀល ចាប់ពីខែមេសា ឆ្នាំ២០១៩។ ហើយប្រាក់ខែរបស់នគរបាល (ពលបាលត្រី) ត្រូវដំឡើងបន្ថែមពី ១.០៩៨.៩២៧រៀល ដល់១.១៥៤.៥៧៧រៀល នៅខែមករា ឆ្នាំ២០១៩ ហើយនឹងត្រូវដំឡើងដល់ ១.១៨៤.៥៧៧រៀល នៅខែមេសា ឆ្នាំ២០១៩។
ដោយឡែក គណៈកម្មការប្រឹក្សាការងារ បានកំណត់ប្រាក់ខែឲ្យកម្មករ-កម្មការិនី១៨២ដុល្លារក្នុងមួយខែ សម្រាប់ឆ្នាំ២០១៩។ ក្នុងឆ្នាំ២០១៨ ប្រាក់ខែកម្មករ-កម្មការិនី គឺ១៧៥ដុល្លារ។
ជាមួយគ្នានេះផងដែរ រាជរដ្ឋាភិបាល គ្រោងចំណាយថវិកា៥០ប៊ីលានរៀល ដើម្បីរៀបចំជាមូលនិធិថែទាំសុខភាពមន្ត្រីរាជការ កងកម្លាំងប្រដាប់អាវុធ រួមទាំងបុគ្គលិកបម្រើការងារនៅក្រសួងសុខាភិបាល។ ថវិកាមួយចំនួនទៀត នឹងឧបត្ថម្ភជូនមន្ត្រីរាជការ និងកម្លាំងប្រដាប់អាវុធ ដែលជាស្ត្រី និងមួយផ្នែកទៀតជាប្រាក់ឧបត្ថម្ភសម្រាប់មន្ត្រីរាជការណា ដែលបានស្លាប់ ខណៈកំពុងបំពេញបេសកកម្ម ឬគ្រោះថ្នាក់ការងារ។
លើសពីនេះ ថវិកាចំនួន៦ប៊ីលានរៀលទៀត រាជរដ្ឋាភិបាល នឹងទ្រទ្រង់លើរបបសន្តិសុខសង្គមផ្នែកការពារសុខសុវត្ថិភាពសម្រាប់មន្ត្រីសាធារណៈ ដែលស្ថិតនៅក្នុងកញ្ចប់ថវិការបស់ក្រសួងសុខាភិបាល៕
Tag:
ប្រាក់ខែ
រាជការ
ហ៊ុន សែន
© រក្សាសិទ្ធិដោយ thmeythmey.com