Solskjaer មិនចង់ចេញពី Man Utd ក្រោយជាប់កំណត់ត្រាឈ្នះទាំង៤ប្រកួតដំបូង

កីឡាអន្តរជាតិ

អន្តរជាតិ

Solskjaer មិនចង់ចេញពី Man Utd ក្រោយជាប់កំណត់ត្រាឈ្នះទាំង៤ប្រកួតដំបូង

03, Jan 2019 , 10:45 am

រូបភាព

ដោយ: ទេព ពិទូរ្យ

Ole Gunnar Solskjaer បានក្លាយជាអ្នកចាត់ការទីពីរក្នុងប្រវត្តិសាស្ត្រក្លិបបន្ទាប់ពីលោក Matt Busby ដែលដឹកនាំ Manchester United ឈ្នះ៤ប្រកួតដំបូងជាប់គ្នា ។ ក្រោមការដឹកនាំរបស់ Solskjaer បានធ្វើឲ្យក្រុមរហស្សនាមបិសាចក្រហមមួយនេះ ទទួលបានជ័យជម្នះលើក្រុម Newcastle United ២-០ នៅរាត្រីថ្ងៃទី២ ខែមករា ក្នុងការប្រកួតក្របខណ្ឌ Premier League។ Solskjaer ក៏បានសារភាពថា លោកពិតជាមិនចង់ចាកចេញពីក្លិបនៅពេលបញ្ចប់រដូវកាលនេះឡើយ។

Solskjaer បានតែងតាំងជាអ្នកចាត់ការបណ្ដោះអាសន្នរបស់បិសាចក្រហមជំនួសលោក Jose Mourinho ដែលត្រូវបានបញ្ចប់តំណែង ដោយទទួលខុសត្រូវដឹកនាំក្រុមរហូតដល់ចុងបញ្ចប់នៃរដូវកាល ២០១៨-២០១៩ នេះ។ អ្នកចាត់ការសញ្ជាតិន័រវែសរូបនេះ នឹងវិលត្រឡប់ទៅដឹកនាំក្លិបចាស់របស់លោកវិញគឺក្រុម Molde FK នៃលីគបាល់ទាត់ក្នុងប្រទេសន័រវែស។

នៅក្នុងប្រវត្ដិសាស្ដ្ររបស់ក្លិប Man United មានតែវីរបុរសលោក Busby ទេដែលអាចនាំក្រុមនេះឈ្នះ៤ប្រកួតដំបូងបាន កាលពីអំឡុងឆ្នាំ១៩៤៦។ Matt Busby មានសញ្ជាតិស្កុតឡែន ហើយលោកបានទទួលមរណភាពតាំងពីឆ្នាំ១៩៩៤មកម្លេះ។

៧២ឆ្នាំក្រោយលោក Solskjaer ក៏អាចធ្វើដូច្នេះបានដែរ តាមរយៈការសុទ្ធបាល់បញ្ចូលទី២គ្រាប់ពីសំណាក់ខ្សែប្រយុទ្ធ Romelu Lukaku និង Marcus Rashford ដោយជួយ Man Utd ឈ្នះ Newcastle ២-០ និងជាការឈ្នះ៤លើកជាប់គ្នាផង។ សមិទ្ធផលនេះបានធ្វើឲ្យលោកមិនចង់ចាកចេញទៅណាពី Man Utd ឡើយ។

Solskjaer បាននិយាយនៅពេលសួរអំពីអនាគតរបស់លោកនៅក្រោយពេលបញ្ចប់រដូវកាលនេះថា៖ «ខ្ញុំមិនចង់ចាកចេញទេ។ នេះជាក្រុមដែលមានកីឡាករដ៏អស្ចារ្យបរិយាកាសនៅទីនេះល្អណាស់ ប៉ុន្តែយើងនៅមានការប្រកួតបន្ទាប់ទៀត ហើយប្រកួតបន្ទាប់នោះខ្ញុំនឹងធ្វើការងាររបស់ខ្ញុំឲ្យបានល្អក្នុងរយៈពេលយូរទៅមុខទៀតដរាបណាខ្ញុំនៅទីនេះ»។

៤ប្រកួតក្រោមការដឹកនាំរបស់ Solskjaer ម្ចាស់ជើងឯកលីគកំពូលអង់គ្លេស២០សម័យកាលបានទទួលជ័យជម្នះលើក្រុម Cardiff City ៥-១, ឈ្នះ Huddersfield Town ៣-១, ស៊ី Bournemouth ៤-១, និង ឈ្នះ Newcastle ២-០ និងជួយក្រុមឈរចំណាត់ថ្នាក់ទី៦ក្នុងតារាង តាមពីក្រោយក្រុមលេខ៤ Chelsea ៦ពិន្ទុ។

ជំនួបបន្ទាប់ Man Utd ត្រូវធ្វើដំណើរទៅជួប Tottenham នៅកីឡដ្ឋាន Wembley ក្នុងក្របខណ្ឌ Premier League សប្តាហ៍ទី២២ នាថ្ងៃទី១៣ ខែមករា៕