លោក ហង់ ជួន ណារ៉ុន ៖ បើយើងមិនចេះប្រវត្តិសាស្ត្រ នោះកំហុសប្រវត្តិសាស្ត្រអាចកើតឡើងវិញ

ជាតិ

លោក ហង់ ជួន ណារ៉ុន ៖ បើយើងមិនចេះប្រវត្តិសាស្ត្រ នោះកំហុសប្រវត្តិសាស្ត្រអាចកើតឡើងវិញ

03, Jan 2019 , 3:28 pm

រូបភាព

រូបពីហ្វេសប៊ុកក្រសួងអប់រំ យុវជន និងកីឡា

ដោយ: ថ្មីៗ

ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន ប្រាប់គរុសិស្ស និងគរុនិស្សិត ពីរឿងរ៉ាវប្រវត្តិសាស្ត្រ ដើម្បីជាចំណេះដឹងបន្ថែមទៀត សម្រាប់ពួកគេក្នុងការចូលរួមការពារ និងអភិវឌ្ឍន៍ប្រទេសជាតិ ដោយមិនឲ្យកំហុសក្នុងប្រវត្តិសាស្ត្រកើតឡើងជាថ្មីឡើយ។

«បើយើងមិនដឹងប្រវត្តិសាស្ត្រ មិនចេះប្រវត្តិសាស្ត្រ នោះប្រវត្តិសាស្ត្រនឹងកើតឡើងវិញ គ្រាន់តែកើតឡើងដដែល ឬរបៀបផ្សេង»។ នេះជាការលើកឡើងរបស់លោក ហង់ ជួន ណារ៉ុន ដែលជំរុញឲ្យសាស្ត្រាចារ្យ គរុនិស្សិត និងតំណាងសាកលវិទ្យាល័យ ជួយបញ្ជៀបមេរៀនប្រវត្តិសាស្ត្រ ដល់យុវជនជំនាន់ក្រោយ ដើម្បីឲ្យពួកគេបានយល់ដឹងពីកំហុសឆ្គងប្រវត្តិសាស្ត្រ ដោយធ្វើយ៉ាងណាកុំឲ្យបញ្ហានោះកើតឡើងជាថ្មី។

សូមស្តាប់សំឡេង៖

ថ្លែងនៅក្នុងវិទ្យាស្ថានជាតិអប់រំ ក្នុងគោលដៅបង្កើនការយល់ដឹងពីប្រវត្តិសាស្ត្រកម្ពុជា បញ្ចៀសកំហុស ឆ្ពោះទៅរកការអភិវឌ្ឍប្រទេសជាតិឱ្យកាន់តែរីកចម្រើនជឿនលឿន នៅព្រឹកថ្ងៃទី៣ មករា រដ្ឋមន្ត្រីក្រសួងអប់រំរូបនេះ បានលើកឡើងពីការខិតខំប្រឹងប្រែងរដ្ឋាភិបាល ដែលបានរំដោះប្រទេសចេញពីសង្គ្រាមរយៈពេល៤០ឆ្នាំមកនេះ។ ត្រង់ចំណុចនេះលោក ជួន ណារ៉ុន ទទួលស្គាល់ថា ការរីកចម្រើនរបស់ប្រទេសកម្ពុជា នៅមានភាពយឺតយ៉ាវនៅឡើយ បើធៀបទៅនឹងប្រទេសមួយចំនួន នៅក្នុងតំបន់អាស៊ាន ដែលត្រូវការធនធានមនុស្សមានគុណភាពចូលរួមដំណើរការអភិវឌ្ឍនេះ។

«គ្មានការអភិវឌ្ឍណា អាចកើតឡើងបានដោយគ្មានធនធានមនុស្សប្រកបដោយគុណភាពឡើយ ហើយក៏គ្មានភាពរីកចម្រើនណាមួយ ដែលបានមក ដោយគ្មានសាមគ្គីភាព និងការប្រឹងប្រែងទាំងអស់គ្នានោះទេ»។ នេះជាការបញ្ជាក់របស់លោក ហង់ ជួន ណារ៉ុន។

ដើម្បីឲ្យធនធានមនុស្សនៅកម្ពុជា សម្បូរទៅដោយមនុស្សមានគុណភាពនោះ ក្រសួងអប់រំ នឹងកំណែទម្រង់គុណភាពអប់រំ នៅថ្នាក់ឧត្តមសិក្សាបន្ថែមទៀត បន្ទាប់ពីដំណើរការកំណែទម្រង់នៅថ្នាក់មធ្យមសិក្សា។ បន្ថែមពីនេះក្រសួងអប់រំ ក៏នឹងបណ្ដុះបណ្ដាលគ្រូឲ្យមានគុណភាពខ្ពស់ មុននឹងអនុញ្ញាតឲ្យពួកគាត់ចេញបង្រៀនផងដែរ។ នេះបើតាមរដ្ឋមន្ត្រីអប់រំ៕