ពីនេះ ពីនោះ
ព័ត៍មានសុខភាព
ការសិក្សា៖នារីវ័យជំទង់ប្រើប្រាស់បណ្តាញសង្គមច្រើនម៉ោង ងាយកើតជំងឺបាក់ទឹកចិត្តជាងបុរស
× នាវីជំទង់ដែលចំណាយពេលច្រើនម៉ោងលើបណ្តាញសង្គម មានហានិភ័យខ្ពស់ក្នុងការកើតជំងឺបាក់ទឺកចិត្ត ជាងមនុស្សប្រុស។ នេះបើយោងតាមការសិក្សាមួយ ដែលបានចេញផ្សាយដោយទស្សនាវដ្ដីវេជ្ជសាស្ដ្រ EClinicalMedicine កាលពីថ្ងៃទី៣ មករា ឆ្នាំ២០១៩។
ក្រុមអ្នកស្រាវជ្រាវ ដឹកនាំដោយលោកស្រី Yvonne Kelly សាស្ត្រាចារ្យមកពីសកលវិទ្យាល័យ College London (UCL) ក្នុងចក្រភពអង់គ្លេស បានរកឃើញថា ស្ទើតែ៤០ភាគរយនៃមនុស្សស្រី ដែលចំណាយពេលច្រើនជាង ៥ម៉ោងក្នុងមួយថ្ងៃលើបណ្តាញសង្គមនោះ បង្ហាញអាការៈនៃជំងឺបាក់ទឹកចិត្ត (depression) ។ ខណៈដែលភាគរយនៃហានិភ័យសម្រាប់ការកើតជំងឺបាក់ទឹកចិត្ត មានកម្រិតទាប សម្រាប់មនុស្សប្រុស ពោលគឺមានចំនួនតិចជាង ១៥ភាគរយតែប៉ុណ្ណោះ។
យោងតាមការសិក្សាខាងលើនេះ មនុស្សស្រីប្រមាណ២ភាគ៥ បានរងការរំលោភបំពានតាមប្រព័ន្ធអនឡាញ ឬការគំរាមកំហែងតាមប្រព័ន្ធអនឡាញ បើធៀបទៅនឹងមនុស្សប្រុសមានត្រឹម១ភាគ៤ប៉ុណ្ណោះ។ មួយវិញទៀត មនុស្សស្រីប្រមាណ៤០ភាគរយ ទទួលទានដំណេកមិនគ្រប់គ្រាន់ ព្រោះតែទម្លាប់ប្រើប្រាស់បណ្តាញសង្គម ខណៈដែលមនុស្សប្រុសមានត្រឹមតែ ២៨ភាគរយប៉ុណ្ណោះលើករណីនេះ។
បើធៀបទៅនឹងមនុស្សប្រុស មនុស្សស្រីហាក់មានភាពខ្មាសអៀនច្រើន និងមិនសូវពេញចិត្តនឹងរូបរាងកាយរបស់ខ្លួន ជាពិសេស មុខមាត់ និងទម្ងន់របស់ពួកគេជាដើម។ ការស្រាវជ្រាវនេះ បានធ្វើឡើងដោយផ្អែកលើ ការសម្ភាសជាមួយក្មេងស្រីវ័យ១៤ឆ្នាំប្រមាណជាង ១១ ០០០នាក់ ដែលកំពុងចូលរួមនៅក្នុងការសិក្សាឈ្មោះថា Millennium Cohort។ មែនទែនទៅ វាជាគម្រោងស្រាវជ្រាវដ៏សំខាន់មួយ ដែលមានគោលដៅសិក្សាឈ្វេងយល់ពីជីវិតរបស់កុមារ។
ជាមួយគ្នានេះ ក្រុមអ្នកស្រាវជ្រាវនេះ បានអះអាងថា ការរកឃើញទាំងនេះ គឺមានភាពចាំបាច់សម្រាប់ការអភិវឌ្ឍគោលនយោបាយស្តីពីផែនការសម្រាប់សុវត្ថិភាពនៃការប្រើប្រាស់បណ្តាញសង្គម និងជំរុញឲ្យឧស្សាហកម្មបច្ចេកវិទ្យានានា ពង្រឹងច្បាប់ឲ្យបានតឹងរ៉ឹងបន្ថែមទៀតលើ ពេលវេលាប្រើប្រាស់បណ្តាញសង្គមសម្រាប់មនុស្សវ័យក្មេង។
យ៉ាងណាមិញ ក្រុមអ្នកស្រាវជ្រាវដដែលនេះ បានបញ្ជាក់ទៀតថា ដំណើរការជាមូលដ្ឋាននៃបាតុភូតនេះ ពុំទាន់ត្រូវបានគេឈ្វេងយល់ច្បាស់លាស់នៅឡើយទេ។ ត្រង់ចំណុចនេះ លោក Simon Wessely សាស្ត្រាចារ្យផ្នែកចិត្តសាស្ត្រនៃវិទ្យាស្ថាន Psychiatry ចក្រភពអង់គ្លេស បានបញ្ជាក់ប្រាប់កាសែតក្នុងស្រុកអង់គ្លេស The Guardian ថា ក្រុមអ្នកស្រាវជ្រាវទាំងនោះ នៅមិនទាន់អាចនិយាយឲ្យច្បាស់ទេថា បណ្តាញសង្គមបានបង្កផលប៉ះពាល់ដល់សុខភាពផ្លូវចិត្ត ទោះបីជាភស្តុតាងកំពុងចាប់ផ្តើមចង្អុលទៅតាមទិសដៅនោះក៏ដោយក្តី៕
Tag:
ការសិក្សា
សុខភាពផ្លូវចិត្ត
© រក្សាសិទ្ធិដោយ thmeythmey.com