កងទ័ពវ៉េណេស៊ុយអេឡាបានប្រកាសស្វាមីភក្តិចំពោះប្រធានាធិបតី នីកូឡា ម៉ូឌុយរ៉ូ ដែលនឹងស្បថចូលកាន់តំណែងអាណត្តិទីពីរជាថ្មីនៅថ្ងៃព្រហស្បតិ៍ទី ១០ ខែមករា។ ក្នុងការស្បថចូលកាន់តំណែងនេះ នឹងធ្វើឡើងចំពោះមុខចៅក្រមតុលាការកំពូល បើទោះជាវាជាភារកិច្ចរបស់រដ្ឋសភាក៏ដោយ។
ខណៈដែលការស្បថចូលកាន់តំណែងសម្រាប់អាណត្តិទីពីររបស់លោក នីកូឡា ម៉ាឌុយរ៉ូ ជិតមកដល់ រដ្ឋមន្ត្រីការពារជាតិវ៉េណេស៊ុយអេឡាដែលតំណាងឲ្យកងទ័ពទាំងអស់បានចេញមុខប្រកាសពីភក្តីភាពមោះមុតចំពោះមេដឹកនាំខ្លួន។
យោងតាមទីភ្នាក់ងារព័ត៌មាន AFP ឧត្តមសេនីយ៍ Vladimir Padrino ប្រមុខការពារជាតិវេណេស៊ុយអេឡាបានប្រកាសតាមសេចក្តីថ្លែងការណ៍របស់ខ្លួនដូច្នេះ៖« កងកម្លាំងប្រដាប់អាវុធវ៉េណេស៊ុយអេឡាគាំទ្រពេញទំហឹង និងមានស្វាមីភក្តិលើសលុបចំពោះលោក នីកូឡា ម៉ាឌុយរ៉ូ ក្នុងការបន្តតំណែងជាប្រធានាធិបតី និងជាអគ្គមេបញ្ជាការកំពូលកងទ័ពចាប់ពីឆ្នាំ ២០១៩ដល់ឆ្នាំ ២០២៥»។
លោក ម៉ាឌុយរ៉ូ នឹងស្បថចូលកាន់តំណែងសម្រាប់អាណត្តិទីពីរនៅថ្ងៃព្រហស្បតិ៍ទី ១០មករា បន្ទាប់ពីបានជាប់ឆ្នោតជាថ្មីនៅក្នុងការបោះឆ្នោតថ្ងៃ ២០ ខែឧសភាកន្លងទៅ ដែលស្នើឡើងដោយសភាធម្មនុញ្ញ ជាអាយ៉ងរបស់រដ្ឋាភិបាលនោះ។ ប៉ុន្តែការបោះឆ្នោតនោះមិនមានការចូលរួមពីសមាជិកបក្សប្រឆាំងឡើយ ដ្បិតមេដឹកនាំពួកគេភាគច្រើនត្រូវបានហាមឃាត់ និងស្ថិតក្រោមការឃុំឃាំងក្នុងផ្ទះ។ លទ្ធផលក៏រងការថ្កោលទោសខ្លាំងពីសហគមន៍អន្តរជាតិ និងមិនមានការទទួលស្គាល់ពីអង្គការរដ្ឋអាមេរិកឡើយ។
យ៉ាងណាមិញ ពិធីស្បថចូលកាន់តំណែងនេះនឹងត្រូវធ្វើឡើងនៅចំពោះមុខតុលាការកំពូលទៅវិញ ខណៈដែលច្បាប់ចែងថា ពីធីនេះត្រូវធ្វើឡើងនៅចំពោះមុខសភាក៏ដោយ។ តាមពិតទៅ សភាវេណេស៊ុយអេឡាត្រូវដឹកនាំដោយតំណាងរាស្ត្របក្សប្រឆាំង ប៉ុន្តែកាលពីឆ្នាំមុនលោក ម៉ាឌុយរ៉ូ បានបង្កើតសភាធម្មនុញ្ញមួយដើម្បីប្រជែងនឹងស្ថាប័ននីតិបញ្ញត្តិនេះ និងបង្កើតឲ្យមានវិបត្តិធម្មនុញ្ញផង។
មកដល់ឥឡូវនេះ បើទោះជារដ្ឋសភាដែលដឹកនាំដោយបក្សប្រឆាំងនៅជួបប្រជុំគ្នាក៏ដោយ រាល់សេចក្តីសម្រេចទាំងអស់របស់ស្ថាប័ននេះត្រូវបានតុលាការកំពូលដែលមានសមាជិកជាមនុស្សជំនិតរបស់លោក ម៉ាឌុយរ៉ូ លុបចោលទាំងអស់។
កាលពីថ្មីៗនេះ រដ្ឋសភាវ៉េណេស៊ុយអេឡា ដែលដឹកនាំដោយបក្សប្រឆាំងខាងលើ រួមជាមួយសហគមន៍អន្តរជាតិផងនាំគ្នាថ្កោលទោសរដ្ឋាភិបាលក្រុងការ៉ាកាស និងបដិសេធទទួលលោក ម៉ាឌុយរ៉ូជាមេដឹកនាំស្របច្បាប់ដែរ។ សភានេះក៏កំណត់ផែនការរៀបចំរដ្ឋាភិបាលអន្តរកាលមួយផងដើម្បីរៀបចំការបោះឆ្នោតប្រជាធិបតេយ្យនៅពេលខាងមុខផង។ ប៉ុន្តែទោះជាយ៉ាងណាក៏ដោយ ស្ថាប័ននីតិបញ្ញត្តិនេះទំនងជាមិនអាចធ្វើអ្វីកើតឡើយ ដ្បិតថា វាមិនទទួលបានការគាំទ្រពីក្រុមយោធា ស្ថាប័នតុលាការ និងស្ថាប័ននយោបាយផ្សេងទៀតឡើយមកដល់ឥឡូវនេះ។
សូមបញ្ជាក់ថា វ៉េណេស៊ុយអេឡា ដែលជារដ្ឋធ្លាប់មានស្តុកស្តម្ភដោយសារសម្បូរធនធានប្រេង បានផុងខ្លួនក្នុងវិបត្តិយ៉ាងជ្រៅក្រោមការដឹកនាំរបស់លោក ម៉ាឌុយរ៉ូ ។ ជម្លោះផ្នែកនយោបាយ និងអសមត្ថភាពគ្រប់គ្រងសេដ្ឋកិច្ច ធ្វើឲ្យរដ្ឋអាមេរិកឡាទីននេះឈានដល់ធ្លាក់ក្នុងស្ថានភាពចលាចល និងក្ស័យធន ហើយស្ថានភាពនេះបានបង្ខំឲ្យប្រជាជនរាប់លាននាក់ភៀសខ្លួនទៅកាន់ប្រទេសជិតខាងដែរ៕