អន្តរជាតិ
កូរ៉េខាងត្បូងប្រាប់កូរ៉េខាងជើងឲ្យពន្លឿនការរំសាយនុយក្លេអ៊ែរ បើចង់ឆាប់រួចផុតពីទណ្ឌកម្ម
× ប្រធានាធិបតីកូរ៉េខាងត្បូង មូន ចេអុីន នៅថ្ងៃទី១០ ខែមករា បានប្រាប់ឲ្យកូរ៉េខាងជើងធ្វើសកម្មភាពជាក់លាក់បន្ថែមទៀតក្នុងការរំសាយនុយក្លេអ៊ែររបស់ខ្លួន។ លោក មូន និយាយថា បើការរំសាយនុយក្លេអ៊ែរធ្វើឡើងកាន់តែលឿន ទណ្ឌកម្មអន្តរជាតិលើកូរ៉េខាងជើងអាចបន្ធូរបន្ថយកាន់តែលឿនតាមនោះដែរ។ កាលណាបើទណ្ឌកម្មដកផុតនោះ កិច្ចសហប្រតិបត្តិការអន្តរកូរ៉េ ក៏នឹងល្អប្រសើរតាមនោះដូចគ្នា។ ប៉ុន្តែលោក មូន ក៏ស្នើទៅអន្តរជាតិឲ្យធ្វើសកម្មភាពតបវិញដែរ ជាការលើកទឹកចិត្តកូរ៉េខាងជើង។
នរណាត្រូវធ្វើអ្វីមុន? នេះសំណួរដែលមិនមានចម្លើយក្នុងដំណើរការឈានទៅដល់ការលុបបំបាត់នុយក្លេអ៊ែរកូរ៉េខាងជើង។ ទាំងអាមេរិក ទាំងកូរ៉េខាងជើង សុទ្ធតែចង់ឲ្យភាគីម្ខាងទៀតធ្វើសកម្មភាពជាក់លាក់ជាមុន ទើបចាត់វិធានការតាមក្រោយ។ អាមេរិកចង់ឲ្យកូរ៉េខាងជើងចាត់វិធានការម៉ឺងម៉ាត់ដើម្បីរំសាយនុយក្លេអ៊ែរ តែកូរ៉េខាងជើងអះអាងថា ខ្លួនបានធ្វើសកម្មភាពខ្លះរួចមកហើយ ហើយដល់វេនអាមេរិកមានចំណាត់ការតបវិញហើយ។
យ៉ាងណាមិញ កូរ៉េខាងត្បូង ដែលនៅក្បែរនុយក្លេអ៊ែរកូរ៉េខាងជើងជាងអាមេរិក សុទ្ធតែចង់ឲ្យភាគីទាំងពីរ ធ្វើសកម្មភាពរៀងៗដើម្បីសម្រេចគោលដៅគ្មាននុយក្លេអ៊ែរ។ ក្នុងសន្និសីទសារព័ត៌មានថ្ងៃទី១០ ខែមករា ប្រធានាធិបតីកូរ៉េខាងត្បូង មូន ចេអុីន និយាយថា បើចង់ផុតពីទណ្ឌកម្មឲ្យឆាប់រហ័ស កូរ៉េខាងជើង ត្រូវតែមោះមុតធ្វើសកម្មភាពជាក់ស្ដែងថែមទៀត ព្រោះទណ្ឌកម្មនេះ ជាប់ពាក់ព័ន្ធជាមួយដំណើរការឆាប់រហ័សនៃការរំសាយនុយក្លេអ៊ែរ។
ក្រៅពីកូរ៉េខាងជើង សហគមន៍អន្តរជាតិក៏ត្រូវឆ្លើយតបនឹងអ្វីដែលក្រុងព្យុងយ៉ាងបានធ្វើដែរ ព្រោះវាបង្ហាញពីការលើកទឹកចិត្ត និងជាការជំរុញល្បឿនដំណើរការរំសាយនុយក្លេអ៊ែរផងដែរ។ នេះបើតាមលោកប្រធានាធិបតីកូរ៉េខាងត្បូង។ ការលើកឡើងរបស់លោក មូន បានបង្ហាញពីការខ្វែងគំនិតគ្នារវាងអាមេរិក និងកូរ៉េខាងជើងលើបញ្ហារ៉ាំរ៉ៃនេះ និងជាដើមចមនាំឲ្យមានសំណួរខាងលើនោះ។ សម្រាប់លោក មូន បញ្ហានេះ ផ្ដើមចេញពីការមិនទុកចិត្តគ្នារវាងសត្រូវទាំងពីរ។
ក្នុងសន្និសីទសារព័ត៌មានដដែល មេដឹកនាំកូរ៉េខាងត្បូងរូបនេះបញ្ជាក់ថា ក្រុងព្យុងយ៉ាង និងក្រុងវ៉ាស៊ីនតោន សុទ្ធតែដឹងពីអ្វីដែលខ្លួនត្រូវធ្វើ ប៉ុន្តែពួកគេបែររុញដាក់ការទទួលខុសត្រូវគ្នាទៅវិញ។ ដោយសារមិនទុកចិត្តគ្នានេះ ទើបជំនួបមេដឹកនាំអាមេរិក-កូរ៉េខាងជើងលើកទី២ ត្រូវពន្យារពេលទល់សព្វថ្ងៃ។ យ៉ាងណាមិញ លោក មូន សង្ឃឹមថាខ្ពស់ថា ជំនួបនេះនឹងមានឆាប់ៗនេះវិញ ព្រោះលោក គីម ទើបត្រឡប់ពីទស្សនកិច្ចនៅចិន។
ដោយទស្សនកិច្ចរបស់លោក គីម នេះហើយ ទើបលោក មូន កាន់តែជឿជាក់ថា គម្រោងជំនួបត្រាំ-គីមលើក២ នឹងកើតឡើងមិនខាន។ មិនមែនតែជំនួបជាមួយលោក ត្រាំ សូម្បីតែជំនួបរវាងលោក មូន និងលោក គីម ក៏អាចកើតឡើងបន្តគ្នាដែរ ព្រោះមេដឹកនាំកូរ៉េខាងជើងជាអ្នកប្រកាសដោយផ្ទាល់ពីគម្រោងទស្សនកិច្ចនៅសេអ៊ូល ដែលត្រូវធ្វើតាំងពីចុងឆ្នាំ២០១៨ មកម្ល៉េះ ប៉ុន្តែត្រូវអាក់ខានទៅវិញ៕
Tag:
កូរ៉េខាងត្បូង
កូរ៉េខាងជើង
អាមេរិក
មូន ចេអុីន
© រក្សាសិទ្ធិដោយ thmeythmey.com