លោកមហាធៀ ៖ ច្បាប់ត្រូវចែងច្បាស់ពីសកម្មភាព ឬសម្ដីដែលត្រូវចាត់ទុកជាការប្រមាថមហាក្សត្រ

អន្តរជាតិ

លោកមហាធៀ ៖ ច្បាប់ត្រូវចែងច្បាស់ពីសកម្មភាព ឬសម្ដីដែលត្រូវចាត់ទុកជាការប្រមាថមហាក្សត្រ

10, Jan 2019 , 9:19 pm

រូបភាព

នាយករដ្ឋមន្រ្តីម៉ាឡេស៊ី មហាធៀ មហាម៉ាត់ និងស៊ុលតង់ Muhammad V (រូបភាព AFP)

ដោយ: តន ចាន់រិទ្ធារ៉ា

នាយករដ្ឋមន្ត្រីម៉ាឡេស៊ី មហាធៀ មហាម៉ាត់ បាននិយាយក្នុងន័យរិះគន់ច្បាប់ម៉ាឡេស៊ីដែលលោកអះអាងថា ចែងមិនច្បាស់ពីកំហុសទាក់ទងការមើលងាយមហាក្សត្រ ដែលសូម្បីមន្ត្រីផ្ទាល់ក៏យល់មិនច្បាស់ផង។ លោក មហាធៀ លើកឡើងបែបនេះ បន្ទាប់ពីមានករណីកាត់ទោសមនុស្សបីនាក់ពាក់ព័ន្ធករណីប្រមាថតាមប្រព្រឹត្តតាមបណ្ដាញសង្គមលើមហាក្សត្រ Sultan Muhammad V ដែលទើបដាក់រាជ្យ និងស្របពេលរដ្ឋាភិបាលម៉ាឡេស៊ីគ្រោងបង្កើតច្បាប់ថ្មីការពារប្រមុខរដ្ឋផង។

ច្បាប់របស់ម៉ាឡេស៊ី ត្រូវកំណត់ឲ្យច្បាស់ពីសកម្មភាពណាមួយដែលត្រូវចាត់ទុកការប្រមាថមហាក្សត្រ។ នេះជាការលើកឡើងរបស់នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី១០ ខែមករា ជុំវិញគម្រោងបង្កើតច្បាប់ការពារមហាក្សត្រពីការវាយប្រហារ ឬការប្រមាថដែលរដ្ឋាភិបាលរបស់លោកនឹងស្នើទៅសភាឆាប់ៗនេះ។

បើតាមសារព័ត៌មានម៉ាឡេស៊ី The Star លោក មហាធៀ និយាយថា បច្ចុប្បន្ននេះ មន្ត្រីអនុវត្តច្បាប់ម៉ាឡេស៊ី មិនយល់អ្វីទៅជាការប្រមាថមហាក្សត្រឡើយ ដូចនេះច្បាប់ត្រូវតែកំណត់ឲ្យច្បាស់លាស់ពីសកម្មភាព ឬសម្ដីដែលត្រូវចាត់ទុកជាការប្រមាថ។ សម្រាប់ម៉ាឡេស៊ីដែលអនុវត្តសេរីភាពបញ្ចេញមតិនោះ បុគ្គលណាមួយមិនគួរត្រូវបានដាក់ទោសដោយសារការនិយាយការពិតឡើយ ហើយការបិទមាត់នរណាម្នាក់មិនឲ្យនិយាយពីបទឧក្រិដ្ឋណាមួយនោះ គឺជារឿងអយុត្តិធម៌។

គម្រោងបង្កើតច្បាប់ការពារមហាក្សត្រ ត្រូវបានបញ្ចេញដោយរដ្ឋមន្ត្រីការិយាល័យនាយករដ្ឋមន្ត្រី Liew Vui Keong នៅថ្ងៃទី១០ ខែមករា ដោយបូកទាំងការធ្វើវិសោធនកម្មច្បាប់មានស្រាប់ផង ហើយគោលដៅធំ គឺការពារមហាក្សត្រពីការវាយប្រហារទាំងអស់។ បើតាមលោក Liew ច្បាប់ព្រហ្មទណ្ឌសព្វថ្ងៃដែលចែងពីការដាក់ទោសជនល្មើស គឺនៅស្រាល ឯច្បាប់ប្រឆាំងការបោះបោរឆ្នាំ១៩៤៨ ក៏ចែងពីការដាក់ទោស ដែលមិនគ្នានឹងបរិបទសង្គមបច្ចុប្បន្នដែរ។

ក្នុងដំណើរការបង្កើតច្បាប់ថ្មីនេះ រដ្ឋមន្ត្រីខាងលើបន្ថែមថា ម៉ាឡេស៊ីនឹងពិនិត្យមើលប្រទេសប្រកាន់របបរាជានិយមអាស្រ័យរដ្ឋធម្មនុញ្ញដទៃទៀតដែលជាសមាជិក Commonwealth ។ ការទាមទារឲ្យដាក់ទោសធ្ងន់លើជនប្រមាថមហាក្សត្រ បានកើនឡើងជាលំដាប់ក្នុងប្រទេសរាជានិយមមួយនេះ។ កាលពីថ្ងៃទី៩ ខែមករា ដោយប៉ូលិសម៉ាឡេស៊ីចាប់ខ្លួនបុរសពីរនាក់ និងស្ត្រីម្នាក់ ពាក់ព័ន្ធករណីនេះ ដែលកើតឡើងតាមបណ្ដាញសង្គមជុំវិញការដាក់រាជ្យរបស់មហាក្សត្រ Sultan Muhammad V ។

សូមរំឭកថា Sultan Muhammad V នៃរដ្ឋកេឡាន់តាន់ បានដាក់រាជ្យកាលពីសប្ដាហ៍មុន តែទ្រង់មិនបង្ហាញមូលហេតុច្បាស់លាស់ឡើយ តែកើតឡើងក្រោយបែកធ្លាយព័ត៌មានទ្រង់រៀបអភិសេកជាមួយអតីតបវរកញ្ញាមូស្គូ។ មហាក្សត្រថ្មី នឹងត្រូវជ្រើសរើសនៅថ្ងៃទី២៤ ខែមករាក្នុងសន្និសីទស៊ុលតង់នៃរដ្ឋនានាចំណុះសហព័ន្ធម៉ាឡេស៊ី៕