អតីតអ្នកកាសែតអាស៊ីសេរី សុំអន្តរាគមន៍ពីនាយករដ្ឋមន្ត្រី ដើម្បីឲ្យតុលាការទម្លាក់បទចោទ

ជាតិ

សង្គមជាតិ

អតីតអ្នកកាសែតអាស៊ីសេរី សុំអន្តរាគមន៍ពីនាយករដ្ឋមន្ត្រី ដើម្បីឲ្យតុលាការទម្លាក់បទចោទ

11, Jan 2019 , 9:46 am

រូបភាព

លោក អ៊ួន ឈិន (ខាងឆ្វេង) លោក យាង សុជាមេត្តា (ខាងស្ដាំ)។ រូបពីហ្វេសប៊ុកលោក អ៊ួន ឈិន

ដោយ: ថ្មីៗ

លោក យាង សុជាមេត្តា និង លោក អ៊ួន ឈិន ដែលធ្លាប់បម្រើការងារជាអ្នកកាសែតឲ្យវិទ្យុអាស៊ីសេរី សុំអន្តរាគមន៍ពីសម្តេចនាយករដ្ឋមន្ត្រី ហ៊ុន សែន ដើម្បីជំរុញតុលាការ ឲ្យទម្លាក់បទចោទចេញពីពួកលោក។ ការសុំអន្តាគមន៍របស់ពួកលោក គឺស្រពពេលដែលនាយករដ្ឋមន្ត្រី ត្រូវជួបអ្នកកាសែតប្រមាណ៤៥០០នាក់ ដើម្បីសំណេះសំណាលនិងពិសាអាហារសាមគ្គីប្រចាំ នៅមជ្ឈមណ្ឌលកោះពេជ្រ នាល្ងាចថ្ងៃទី១១ ខែមករា ឆ្នាំ២០១៩នេះ។

លោក យាង សុជាមេត្តា ប្រាប់សារព័ត៌មានថ្មីៗ តាមទូរសព្ទថា ការមិនព្រមទម្លាក់បទចោទនេះ ធ្វើឲ្យពួកលោក ពិបាកក្នុងការប្រកបមុខរបរនិងការស្វែងរកការងារ។ លោក បញ្ជាក់បែបនេះថា៖«ថ្មីៗហ្នឹង យើង ឃើញរដ្ឋាភិបាល ប្រកាសបើកចំហដល់សារព័ត៌មានដែរ ជាពិសេសចង់ឲ្យវិទ្យុអាស៊ីសេរី មានការិយាល័យវិញ តែពួកខ្ញុំ ជាអតីតអ្នកកាសែតរបស់វិទ្យុអាស៊ីសេរី បែរជានៅជាប់បទចោទទៅវិញ។ អ៊ីចឹង យើងឃើញថា រដ្ឋាភិបាលប្រកាសបើកចំហ តែបេះដូងនៅបិទដដែល។ ខ្ញុំ យល់ថា ការរក្សាទុកបទចោទលើអ្នកសែតបែបនេះ មិនមែនជារូបភាពល្អទេ»។

លោក អ៊ួន ឈិន ក៏មិនខុសពីលោក យាង សុជាមេត្តា ដែរ ដែលថា ពួកលោក ពិតជាប្រឈមនឹងការដាក់ពាក្យសុំបម្រើការងារជាអ្នកកាសែត នៅស្ថាប័នផ្សេងៗ ដោយសារតែពួកលោក នៅតែជាប់បណ្តឹង និងស្ថិតនៅក្រោមការឃ្លាំមើលរបស់តុលាការ។ លោក អ៊ួន ឈិន អះអាងថា មកដល់ពេលនេះ ពួកលោក ពុំទាន់មានការងារធ្វើនៅឡើយទេ។

លោក លើកឡើងថា ជីវភាពរបស់ពួកលោក គឺអាស្រ័យលើការជួយឧបត្ថម្ភរបស់មិត្តភក្តិនិងសប្បុរសន។ លោក ទទូចយ៉ាងដូច្នេះថា៖«ពួកខ្ញុំ នៅតែសុំឲ្យទម្លាក់បទចោទចេញ ដើម្បីឲ្យពួកខ្ញុំមានសេរីភាពពេញលេញ និងមានលទ្ធភាពធ្វើការចិញ្ចឹមជីវិត»។

លើសពីនេះ មានអ្នកកាសែត៣៨នាក់ បានរួមគ្នាធ្វើលិខិតចំហមួយ នៅថ្ងៃទី១០ ខែមករា ដើម្បីស្នើឲ្យតុលាការទម្លាក់បទចោទចេញពីអ្នកទាំងពីរ។ ពួកគេ សរសេរក្នុងលិខិតចំហនោះថា៖«យើងខ្ញុំ ព្រួយបារម្ភយ៉ាងខ្លាំងចំពោះការចោទប្រកាន់ដ៏ធ្ងន់ធ្ងរលើអ្នកទាំងពីរ។ [.....] ការចោទប្រកាន់នេះ កំពុងតែបង្កភាពភ័យខ្លាច ដល់អ្នកសារព័ត៌មាន ដែលកំពុងបំពេញវិជ្ជាជីវៈនិងធ្វើឲ្យសេរីភាពសារព័ត៌មាននៅកម្ពុជាធ្លាក់ចុះផងដែរ»។

អត្ថបទទាក់ទង

អ្នកកាសែត លើកសំណូមពរផ្សេងៗទៅកាន់នាយករដ្ឋមន្ត្រី

អ្នកទាំងពីរ ត្រូវបានតុលាការ ចោទពីបទប្រគល់ឲ្យបរទេសនូវព័ត៌មានជាអាទិ ដែលធ្វើឲ្យអន្តរាយដល់ការការពារជាតិ និងបទផលិតវីដេអូអាសអាភាស។ សមត្ថកិច្ច ចាប់ពួកលោក កាលពីអំឡុងខែវិច្ឆិកា ឆ្នាំ២០១៧។

រហូតដល់អំឡុងខែសីហា ឆ្នាំ២០១៨ ចៅក្រមស៊ើបសួរនៃតុលការភ្នំពេញ ក៏ដោះលែងពួកលោក ឲ្យនៅក្រៅឃុំជាបណ្តោះអាសន្ន តែនៅរក្សាទុកបទចោទដដែល៕