អន្តរជាតិ
នាយករដ្ឋមន្ត្រីតៃវ៉ាន់ប្រកាសលាលែងពីតំណែង ក្រោយបរាជ័យក្នុងការបោះឆ្នោតថ្នាក់តំបន់
× នាយករដ្ឋមន្ត្រីតៃវ៉ាន់ វីលៀម ឡៃ (William Lai) បានប្រកាសថា លោកបានលាលែងពីតំណែងហើយ ដើម្បីទទួលខុសត្រូវបរាជ័យការបោះឆ្នោតថ្នាក់មូលដ្ឋានកាលពីជាងពីរខែមុន។ គណៈរដ្ឋមន្ត្រីទាំងមូលរបស់លោក ក៏លាលែងតាមលោកដែរ។ បក្សកាន់អំណាចប្រជាធិបតេយ្យជឿនលឿន បានរងបរាជ័យធ្ងន់កក្នុងការបោះឆ្នោត ឯជ័យជម្នះធ្លាក់លើបក្សជាតិនិយមគួររមីងតាង ដែលសព្វថ្ងៃជាបក្សប្រឆាំង និងមានទំនោរទៅរកចិនប្រជាមានិត។
បរាជ័យក្នុងការបោះឆ្នោតថ្នាក់ក្រោមជាតិក្នុងខែវិច្ឆិកា ឆ្នាំ២០១៨ គឺជាការវាយប្រហារដ៏ធំលើរដ្ឋាភិបាលបក្សប្រជាធិបតេយ្យជឿនលឿន។ ប្រធានាធិបតី Tsai Ing-wen បានប្រកាសលាលែងពីតំណែងប្រធានបក្សដើម្បីបង្ហាញការទទួលខុសត្រូវចំពោះបរាជ័យនេះ។ នៅថ្ងៃទី១១ ខែមករានេះ នាយករដ្ឋមន្ត្រី វីលៀម ឡៃ ក៏នឹងលាលែងពីតំណែងដូចគ្នាដែរហើយមូលហេតុវិញក៏គ្មានអ្វីក្រៅពីតែលទ្ធផលមិនសមប្រកបក្នុងការបោះឆ្នោតនោះដែរ។
ប្រាប់អ្នកសារព័ត៌មាននៅឯសភានៅថ្ងៃទី១០ ខែមករា នាយករដ្ឋមន្ត្រីតៃវ៉ាន់រូបនេះនិយាយថា ពេលវេលាបានដល់ហើយ ហើយលោកនឹងបើកកិច្ចប្រជុំគណៈរដ្ឋមន្ត្រីពិសេសដើម្បីប្រកាសការលាលែងនេះ។ បើតាមលោក ឡៃ លោកស្រីប្រធានាធិបតី Tsai បានយល់ព្រមលើសំណើលាលែងនេះហើយ។ ជំហានបន្ទាប់ ប្រធានាធិបតី នឹងតែងតាំនាយករដ្ឋមន្ត្រីថ្មី ដែលបេក្ខភាពអាចជាអតីតប្រធានបក្សកាន់អំណាចលោក Su Tseng-chang ។
តាមពិតទៅ ការចុះចេញរបស់លោក វីលៀម ឡៃ ដែលស្បថធ្វើជានាយករដ្ឋមន្ត្រីកាលពីខែកញ្ញា ឆ្នាំ២០១៧ គឺជារឿងដែលគេរំពឹងទុកយូរហើយ ក្រោយការធ្វើមិនបានល្អក្នុងការបោះឆ្នោតឆ្នាំមុន។ វាជាប្រពៃណីរបស់នយោបាយតៃវ៉ាន់ដែលនាយករដ្ឋមន្ត្រីត្រូវលាលែងពីតំណែងពេលបក្សរបស់ខ្លួនបរាជ័យក្នុងការបោះឆ្នោត។ វាក៏ជារឿងធម្មតាដែលសមាជិកគណៈរដ្ឋមន្ត្រីទាំងអស់ សម្រេចចិត្តតាមនាយករដ្ឋមន្ត្រីនោះ។
ការតែងតាំងនាយករដ្ឋមន្ត្រីថ្មីដើម្បីទទួលការងារប្រចាំថ្ងៃរបស់រដ្ឋាភិបាល អាចជារឿងប្រឈមមួយសម្រាប់លោកស្រី Tsai ។ ខណៈការបោះឆ្នោតប្រធានាធិបតីនឹងធ្វើនៅឆ្នាំ២០២០ លោកស្រី ត្រូវតែស្ដារប្រជាប្រិយភាពរបស់ខ្លួនឡើងវិញ ដែលសព្វថ្ងៃកំពុងដាំក្បាលចុះខ្លាំងដោយសារបញ្ហាសេដ្ឋកិច្ច ក៏ដូចជាទំនាក់ទំនងជាមួយប៉េកាំងផងនោះ។ បច្ចុប្បន្ន ក្រុងប៉េកាំងបានដាក់សម្ពាធលើរដ្ឋាភិបាលងាកទៅរកឯករាជ្យនេះយ៉ាងខ្លាំង ហើយគំរាមប្រើទ័ពផង។
ស្របពេលការបោះឆ្នោតជ្រើសរើសមេដឹកនាំថ្មីនៅសល់មួយឆ្នាំទៀតនោះ មានសមាជិកបក្សកាន់អំណាចខ្លះមិនចង់ឲ្យលោកស្រី Tsai ឈ្មោះប្រជែងសម្រាប់អាណត្តិទីពីរឡើយ ខណៈលោកស្រីនៅមិនទាន់ប្រកាសជាផ្លូវការថា នឹងចូលរួមការបោះឆ្នោតទៀតឬយ៉ាងណាទេ។ ជុំវិញបេក្ខភាពនាយករដ្ឋមន្ត្រីថ្មីដែលមានភារៈស្ដារប្រជាប្រិយភាពរដ្ឋាភិបាលវិញ គឺជាអតីតអភិបាលក្រុងតៃប៉ិដែលទើបបាត់តំណែងក្នុងការបោះឆ្នោតខែវិច្ឆិកា ឆ្នាំ២០១៨ ថ្មីៗនេះ៕
Tag:
តៃវ៉ាន់
William Lai
Tsai Ing-wen
© រក្សាសិទ្ធិដោយ thmeythmey.com