អាមេរិកនឹងពង្រឹងប្រព័ន្ធការពារមីស៊ីល ស្របពេលរុស្ស៊ីនិងចិនកំពុងអភិវឌ្ឍមីស៊ីលល្បឿនលឿន

អន្តរជាតិ

នយោបាយអន្តរជាតិ

អាមេរិកនឹងពង្រឹងប្រព័ន្ធការពារមីស៊ីល ស្របពេលរុស្ស៊ីនិងចិនកំពុងអភិវឌ្ឍមីស៊ីលល្បឿនលឿន

18, Jan 2019 , 2:20 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី១៧ ខែមករា បានប្រកាសបង្កើនសមត្ថភាពប្រព័ន្ធការពារមីស៊ីលរបស់អាមេរិក ស្របពេលដែលគូប្រជែងអាមេរិកមានរុស្ស៊ី និងចិនកំពុងអភិវឌ្ឍមីស៊ីលល្បឿនលឿននោះ។ លោក ត្រាំ ប្រកាសដូចនេះក្នុងពេលបញ្ចេញផែនការប្រព័ន្ធការពារមីស៊ីលថ្មីនៅឯមន្ទីរបញ្ចកោណ។ សម្រាប់លោក ត្រាំ គោលដៅរបស់យោធាអាមេរិកមិនសាំញាំឡើយ គឺត្រូវស្ទាក់រាល់មីស៊ីលទាំងអស់ដែលបាញ់តម្រង់អាមេរិក។

ប្រឈមមុខស្ថានការណ៍ដែលគូប្រជែងរបស់ខ្លួនប្រឺងប្រែងអភិវឌ្ឍមីស៊ីលទំនើបៗ អាមេរិកបានដាក់យុទ្ធសាស្ត្រថ្មីដើម្បីទប់ទល់វិញ។ ប្រធានាធិបតី ដូណាល់ ត្រាំ បានប្រកាសជាផ្លូវការនូវការត្រួតពិនិត្យប្រព័ន្ធការពារមីស៊ីល ដែលជាបណ្ដាញការពារមីស៊ីលរបស់អាមេរិកតាមរយៈការបាញ់ស្ទាក់រាល់មីស៊ីលបាលីស្ទិកទាំងអស់។ យុទ្ធសាស្ត្រនេះ ត្រូវបានគេរង់ចាំយូរមកហើយ ហើយផ្ដោតលើសមត្ថភាពនៃមីស៊ីលរបស់រុស្ស៊ី ចិន អ៊ីរ៉ង់ និងកូរ៉េខាងជើងជាដើម។

ក្នុងយុទ្ធសាស្ត្រថ្មីនេះ អាមេរិកបានមើលឃើញពីការកើនឡើងសមត្ថភាពរបស់រុស្ស៊ី និងចិនដែលកំពុងតែបង្កើនល្បឿនអភិវឌ្ឍមីស៊ីលស៊េរីថ្មី Hypesonic ។ មីស៊ីលប្រភេទនេះ មានល្បឿនលឿនជាងសំឡេង អាចហោះក្នុងរយៈកម្ពស់ទាប អាចប្ដូរផ្លូវហោះ ហើយប្រព័ន្ធការពារមីស៊ីលធម្មតាមិនអាចស្ទាក់បានឡើយ។ មកទល់ពេលនេះ ចិនបានដើរមួយជំហានមុនទៅ ឯរុស្ស៊ីកំពុងតែមានក្នុងឃ្លាំងទៅហើយតាមការប្រកាសរបស់លោក វ្ល៉ាឌីមៀ ពូទីន នាពេលកន្លងមក។

ចំពោះមុខមន្ត្រីយោធានៅឯមន្ទីរបញ្ចុកោណនៅថ្ងៃទី១៧ ខែមករា លោក ត្រាំ និយាយថា អាមេរិកនឹងផ្លាស់ប្ដូរប្រព័ន្ធការពាររបស់ខ្លួនដើម្បីទប់ទល់ការវាយប្រហារដោយមីស៊ីលគ្រប់ស៊េរីទាំងអស់។ លោកបន្តថា អាមេរិកនឹងកម្ទេចមីស៊ីលបាញ់ចេញពីមហាអំណាចដែលបង្ករឿង ឬក៏ពីប្រទេសអំណាចណាដែលអាចបង្កកំហុសដែរ ហើយក៏គ្មានថ្ងៃមីស៊ីលធ្លាក់លើដីអាមេរិកដែរ មិនថាមីស៊ីលប្រភេទអ្វី បាញ់មកពីណាឡើយ។

យ៉ាងណាមិញ ប្រឈមមុខការវិវត្តនៃមីស៊ីលល្បឿនលឿនជាងសំឡេងដែលរុស្ស៊ី និងចិននាំគ្នាអភិវឌ្ឍបែបនេះ អាមេរិកត្រូវតែមានផែនការពង្រឹងខែលការពាររបស់ខ្លួន។ ក្នុងន័យនេះ មន្ទីរបញ្ចកោណកំពុងសម្លឹងរកផ្លូវថ្មីដែលអាចចាប់ដានមីស៊ីលប្រភេទនេះ ដោយនឹងប្រើប្រាស់ប្រព័ន្ធចាប់សញ្ញាពង្រាយលើអាកាសតែម្ដង។ រដ្ឋមន្ត្រីស្តីទីក្រសួងការពារជាតិអាមេរិក ផាទ្រីក សាណាហាន់ ទទួលស្គាល់ថា បច្ចេកវិទ្យាថ្មីពិតជាខ្លាំងមែន តែអាមេរិកក៏មិនស្ងៀមដែរ ហើយចាំតាមដានគូប្រជែងរបស់ខ្លួនរហូត។

សូមបញ្ជាក់ថា លោក ត្រាំ បញ្ជាឲ្យត្រួតពិនិត្យប្រព័ន្ធការពារមីស៊ីលឡើងវិញកាលពីឆ្នាំ២០១៧ ចំពេលដែលភាពតានតឹងរវាងអាមេរិក និងកូរ៉េខាងកើនឡើងខ្លាំង។ វាក៏ជាលើកដំបូងតាំងពីឆ្នាំ២០១០ ដែលប្រព័ន្ធការពារមីស៊ីលត្រូវសើរើឡើងវិញ។ ចំណុចមួយគួរឲ្យចាប់អារម្មណ៍ក្នុងផែការថ្មី គឺអាមេរិកកំពុងសិក្សាលទ្ធផលពង្រាយមីស៊ីលលើអាកាសតែម្ដង ដើម្បីកម្ទេចមីស៊ីលរបស់សត្រូវដែលបាញ់តម្រង់អាមេរិកទៀតផង ខណៈសព្វថ្ងៃការចាប់មីស៊ីលពឹងផ្អែកលើប្រព័ន្ធលើដី៕