អន្តរជាតិ
×![]()
យោធាចិន បានពង្រឹងកងកម្លាំងយោធារបស់ខ្លួនជាលំដាប់នៅក្នុងជួរទ័ពជើងទឹក, ជើងអាកាស, ផ្នែកមីស៊ីល និងយុទ្ធសាស្ត្រ តែសម្រេចកាត់បន្ថយចំនួនកងទ័ពជើងគោករបស់ខ្លួន។ ទាក់ទិនងនឹងកំណែទម្រង់ថ្មីនេះ អ្នកជំនាញយល់ឃើញថា ចិនមានបំណងប្រែក្លាយសមត្ថភាពកងកម្លាំងរបស់ខ្លួនពីកងទ័ពចាំផ្ទះ ទៅជាកងទ័ពមួយដែលមានសមត្ថភាពឲ្យក្រុងប៉េកាំង អាចបង្ហាញសាច់ដុំរបស់ខ្លួនឆ្ងាយពីព្រំដែនចិន ព្រមទាំងការពារផលប្រយោជន៍របស់ជាតិនៅបរទេសថែមទៀតផង។
បទយការណ៍មួយដែលបានផ្សាយដោយទីភ្នាក់ងារព័ត៌មានចិន Xinhua បានបង្ហាញថា កងទ័ពជើងទឹក, ជើងអាកាស, កងកម្លាំងទទួលបន្ទុកផ្នែកមីស៊ីល និងកងកម្លាំងគាំទ្រយុទ្ធសាស្ត្រ បច្ចុប្បន្ននេះ បូកបញ្ចូលគ្នា មានចំនួនច្រើនជាងពាក់កណ្តាលនៃយោធាចិន។ ចំនួនយោធាក្នុងអង្គភាពធំទាំងបួននៃកងទ័ពរំដោះប្រជាជនចិន (PLA) នេះមានចំនួនលើសពីកងទ័ពជើងគោកដែលជាប្រពៃណីមានចំនួនលប់លើសគេនៅក្នុងយោធាទ័ព។
របាយការណ៍ខាងលើ បានបញ្ជាក់បែបនេះ៖«ទិន្នន័យថ្មីនេះគឺពុំធ្លាប់កើតមាននោះឡើយ នៅក្នុងប្រវត្តិសាស្ត្រនៃកងកម្លាំងរំដោះប្រជាជនជាតិ។ កងទ័ពជើងគោកចិន សព្វនេះនេះមានចំនួនតិចជាង ៥០ ភាគរយនៃចំនួនសរុបរបស់ PLA ។ ហើយស្ទើតែពាក់កណ្តាលនៃកងកម្លាំងមិនប្រយុទ្ធរបស់យើង ត្រូវបានកាត់បន្ថយ ហើយចំនួនមន្ត្រីនៅក្នុង PLA ក៏ត្រូវកាត់បន្ថយប្រមាណ ៣០ ភាគរយផងដែរ»។
ទាក់ទិននឹងកំណែទម្រង់ថ្មីនេះ អ្នកជំនាញផ្នែកយោធាដែលមានមូលដ្ឋាននៅទីក្រុងសៀងហៃ លោក Ni Lexiong បានគូសបញ្ជាក់ថា ការរុះរើក្នុងជួរកងទ័ពចិននេះគឺបង្ហាញពីការផ្លាស់ប្តូរយុទ្ធសាស្ត្រដ៏គួរឲ្យកត់សម្គាល់មួយ ដែលប្រែក្លាយពីកងកម្លាំងចាំផ្ទះ ទៅជាកងកម្លាំងមួយដែលមានសមត្ថភាពឲ្យក្រុងប៉េកាំង អាចបង្ហាញសាច់ដុំរបស់ខ្លួន ឆ្ងាយពីព្រំដែនចិន ព្រមទាំងការពារផលប្រយោជន៍របស់ជាតិនៅបរទេសថែមទៀតផង។ នេះបើយោងតាមការចុះផ្សាយរបស់កាសែតហុងកុង South China Morning Post ។
យោងតាមប្រភពព័ត៌មានដដែល លោក Ni បាននិយាយទៀតថា កំណែទម្រង់នេះក៏មានន័យថា អង្គភាពក្នុងកងទ័ពរំដោះប្រជាជនចិន រួមមាន កម្លាំងជើងទឹក កម្លាំងជើងអាកាស និងកម្លាំងទទួលបន្ទុ្កផ្នែកមីស៊ីល អាចដើរតួសំខាន់ជាងមុននៅក្នុងព្រឹត្តិការណ៍នៃជម្លោះ តាមរយៈការវាយប្រហារលើកម្លាំងសត្រូវ ឆ្ងាយពីព្រំដែនរបស់ចិន។ លោកពន្យល់ថា សង្គ្រាមសម័យទំនើបគឺផ្តោតសំខាន់លើភាពប្រសើរជាងនៅក្នុងផ្នែកមួយចំនួន រួមមាន ដែនអាកាស, បច្ចេកវិទ្យា និងអវកាស ដែលនោះនឹងកាន់តែកាត់បន្ថយសារសំខាន់នៃកម្លាំងជើងគោក។
កំណែទម្រង់ថ្មីនេះ ត្រូវបានប្រកាសជាលើកដំបូងបង្អស់ដោយប្រធានាធិបតីចិន ស៊ី ជិនភីង ក្នុងឆ្នាំ២០១៥ ដោយមានគោលបំណងកាត់បន្ថយចំនួនកងទ័ពដល់ទៅ ៣០ ម៉ឺននាក់ឯណោះ។ បច្ចុប្បន្ននេះ ចិនមានកងទ័ពសកម្មទាំងប្រុស ទាំងស្រីប្រមាណ ២ លាននាក់ ដែលធ្វើឲ្យកងទ័ពរំដោះប្រជាជនចិនក្លាយជា កងកម្លាំងប្រដាប់អាវុធធំជាងគេបំផុតលើពិភពលោក។
ម្យ៉ាងវិញទៀត យោធាចិនត្រូវបែងចែកជាប្រាំសាខាដូចជា កងទ័ពជើងគោក, ជើងទឹក, ជើងអាកាស, កងកម្លាំងទទួកបន្ទុកផ្នែកមីស៊ីល (មីស៊ីលបច្ចេកទេស និងមីស៊ីលយុទ្ធសាស្ត្រ) និងកងកម្លាំងគាំទ្រយុទ្ធសាស្ត្រ ដែលទទួលខុសត្រូវផ្នែកបច្ចេកវិទ្យា អវកាស និងសម្ភារៈសង្គ្រាម។ ស្ថាប័នពីរចុងក្រោយត្រូវបានបង្កើតកាលពីបីឆ្នាំមុន ស្របពេលដែលលោក ស៊ី ខិតខំប្រឹងប្រែងធ្វើទំនើបកម្មផ្នែកយោធា៕
Tag:
ចិន
យោធា
កំណែទម្រង់
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
