៥ខែទៀត ពលរដ្ឋនៅភ្នំពេញ លែងអាចសង់រោងបុណ្យនិងរោងការតាមចិញ្ចើមផ្លូវហើយ

ជាតិ

សង្គមជាតិ

៥ខែទៀត ពលរដ្ឋនៅភ្នំពេញ លែងអាចសង់រោងបុណ្យនិងរោងការតាមចិញ្ចើមផ្លូវហើយ

23, Jan 2019 , 6:13 pm

រូបភាព

ដោយ: ឡាយ សុភាវតី

លោក ឃួង ស្រេង អភិបាលរាជធានីភ្នំពេញ បានចេញសេចក្ដីណែនាំមួយ ស្តីពីការរៀបចំសណ្ដាប់ធ្នាប់តាមដងផ្លូវ និងការប្រើប្រាស់ចិញ្ចើមផ្លូវសាធារណៈក្នុងរាជធានីភ្នំពេញ។ តាមរយៈសេចក្តីណែនាំ រដ្ឋបាលរាជធានីភ្នំពេញ បានដាក់ចេញវិធានការមួយចំនួន កុំឲ្យមានការសង់រោងការ រោងបុណ្យ និងរោងកម្មវិធីផ្សេងៗ នៅតាមដងផ្លូវនិងចិញ្ចើមផ្លូវ។

រដ្ឋបាលរាជធានីភ្នំពេញ បានទុកឱកាសឲ្យប្រជាពលរដ្ឋ អាចសង់រោងបុណ្យនិងរោងកម្មវិធីផ្សេងៗ ចាប់ពីថ្ងៃនេះ រហូតដល់ថ្ងៃទី៣០ ខែមិថុនា ឆ្នាំ២០១៩។ រដ្ឋបាលរាជធានីភ្នំពេញ ណែនាំប្រជាពលរដ្ឋថា ការសង់រោងឬការរៀបចំកម្មវិធីអ្វីមួយ មិនត្រូវឲ្យលើសពី ១ភាគ២ នៃទ្រូងផ្លូវឡើយ។

ការអនុញ្ញាតនេះ នឹងត្រូវបញ្ឈប់ ចាប់ពីថ្ងៃទី១ ខែកក្កដា ឆ្នាំ២០១៩ តទៅ។ សេចក្តីណែនាំ ដែលចុះហត្ថលេខាដោយលោក ឃួង ស្រេង តាំងពីខែធ្នូ ឆ្នាំ២០១៨មក បានសង្កត់ធ្ងន់យ៉ាងដូច្នេះថា៖«ប្រជាពលរដ្ឋទាំងអស់ ត្រូវរកទីតាំងឯកជន វត្តអារាម ព្រះវិហារ ឬ ទីតាំងសមស្របណាមួយជំនួសការប្រើប្រាស់ចិញ្ចើមផ្លូវ ឬទ្រូងផ្លូវ ហើយការធ្វើរោងបុណ្យ រោងអាពាហ៍ពិពាហ៍ និងរោងកម្មវិធីផ្សេងៗជាលក្ខណៈឯកជន នៅលើចិញ្ចើមផ្លូវ ឬទ្រូងផ្លូវ គឺមិនអនុញ្ញាតជូនឡើយ»។

រដ្ឋបាលរាជធានីភ្នំពេញ ថែមទាំងប្រាប់គណៈបញ្ជាការឯកភាពរដ្ឋបាលខណ្ឌទាំង១២ ឲ្យបង្កើត «ក្រុមការងាររៀបចំសណ្ដាប់ធ្នាប់តាមដងផ្លូវ និងប្រើប្រាស់ចិញ្ចើមផ្លូវសាធារណៈទាំងអស់» ក្នុងភូមិសាស្ត្ររបស់ខ្លួន ដើម្បីរៀបចំសណ្តាប់ធ្នាប់តាមដងផ្លូវនិងធានាការប្រើប្រាស់ចិញ្ចើមផ្លូវ ឲ្យបានត្រឹមត្រូវ។

លើសពីនេះ រដ្ឋបាលរាជធានីភ្នំពេញ បានប្រាប់ទៅប្រជាពលរដ្ឋ ម្ចាស់លំនៅដ្ឋាន ម្ចាស់អាជីវកម្ម ម្ចាស់ការដ្ឋាន អ្នកគ្រប់គ្រងមន្ទីរពេទ្យ អ្នកគ្រប់គ្រងគ្រឹះស្ថានអប់រំ អ្នកគ្រប់គ្រងអគារសាធារណៈ វិស័យឯកជន និងអ្នកប្រើប្រាស់ផ្លូវទាំងអស់ ឲ្យកែសម្រួល និងរៀបចំទីតាំងរបស់ខ្លួន ឲ្យបានត្រឹមត្រូវ ស្របតាមការណែនាំនេះ។ រដ្ឋបាលរាជធានីភ្នំពេញ ទុកពេលឲ្យ១ខែ សម្រាប់ការកែសម្រួលនិងរៀបចំទីតាំងទាំងនោះ ដោយគិតចាប់ពីកាលបរិច្ឆេទនៃការចេញសេចក្ដីណែនាំនេះទៅ។

រដ្ឋបាលរាជធានីភ្នំពេញ បានព្រមានយ៉ាងដូច្នេះថា៖«បើអ្នកណា មិនចូលរួមអនុវត្តតាមខ្លឹមសារនៃសេចក្ដីណែនាំនេះទេ គណៈបញ្ជាការឯកភាពរដ្ឋបាលខណ្ឌទាំង១២ និងមន្ទីរ អង្គភាពជំនាញពាក់ព័ន្ធ ត្រូវចាត់វិធានការរដ្ឋបាល ដែលរួមមាន បិទអាជីកម្ម ផ្អាកការដ្ឋាន ដកហូតសម្ភារ និង រុះរើសំណង់ ជាដើម។ ក្នុងករណីចាំបាច់ ត្រូវចាត់វិធានការច្បាប់ជាធរមាន»។