ជាតិ
សហព័ន្ធស្រូវ អង្ករ នឹងតវ៉ាទៅអន្តរជាតិ គួបផ្សំនិងការព្យាយាមប្រកួតប្រជែងនាំចេញអង្ករ រូបភាពបានពីផេកហ្វេសប៊ុក សហព័ន្ធ ស្រូវ អង្ករ កម្ពុជា
× ភ្នំពេញ៖ សហព័ន្ធស្រូវ អង្ករ កម្ពុជា នឹងតវ៉ាទៅសហគមន៍អន្តរជាតិ ហើយព្យាយាមប្រកួតប្រជែង ក្នុងការនាំចេញអង្ករ តាមរយៈការកាត់បន្ថយថ្លៃដើម និងពង្រីកទីផ្សារ។ នេះបើយោងតាមសេចក្តីថ្លែងការណ៍ របស់សហព័ន្ធស្រូវ អង្ករ កាលពីថ្ងៃទី២២ មករា។
សហព័ន្ធស្រូវ អង្ករ និងធ្វើការជាមួយក្រសួង-ស្ថាប័នពាក់ព័ន្ធ ពិសេសក្រុមការងារនៃវេទិការាជរដ្ឋាភិបាល និងឯកជនផ្នែកស្រូវ អង្ករ ដើម្បីជំរុញការប្រកួតប្រជែង និងព្យាយាមជំរុញម៉ាកសញ្ញាអង្ករប្រណិតកម្ពុជា«ម្លិះអង្ករ» ទៅកាន់ទីផ្សារអន្តរជាតិនានា។
«ម្លិះអង្ករ» ជាម៉ាកសញ្ញាសម្រាប់សម្គាល់អង្ករ ដែលទទួលបានពានរង្វាន់អង្ករល្អជាងគេលើពិភពលោក។ជាមួយគ្នានេះ សហព័ន្ធស្រូវ អង្ករ បានអំពាវនាវដល់ពលរដ្ឋកម្ពុជាទាំងអស់ ឲ្យជួយគាំទ្រតាមរយៈការទិញអង្ករកម្ពុជា ដើម្បីពង្រីកទីផ្សារក្នុងស្រុក ក៏ដូចជួយគាំទ្រដល់ប្រជាកសិករ ក្នុងវិស័យស្រូវ-អង្ករទាំងមូល។
«ការសម្រេចដាក់ពន្ធនេះ ជាជំហានថយក្រោយរវាងសហភាពអឺរ៉ុប និងកម្ពុជា ដែលបានកសាងកន្លងមក ដោយសង្ឃឹមថា យើងនឹងអាចដើរទៅមុខបានច្រើនជំហានទៀត ក្នុងការសហការនេះ»។ នេះជាលើកឡើងរបស់សហព័ន្ធស្រូវ អង្ករ ក្នុងសេចក្តីថ្លែងការណ៍។
សេចក្តីថ្លែងការណ៍សហព័ន្ធស្រូវ អង្ករនេះ ធ្វើឡើងក្រោយគណៈកម្មការសហភាពអឺរ៉ុប បានសម្រេចយកពន្ធគយលើផលិតផលអង្ករនាំចូលពីកម្ពុជា ក្នុងរយៈពេលបីជាប់គ្នា កាលពីថ្ងៃទី១៧ ខែមករា។ ការនាំចូលអង្ករពីកម្ពុជា ត្រូវបានសហភាពអឺរ៉ុប សម្រេចយកពន្ធគយដោយអត្រាជិត២០០ដុល្លារ ក្នុង១តោន នៅឆ្នាំ២០១៩ និងធ្លាក់ចុះមកនៅត្រឹមជាង១៧០ដុល្លារ នៅឆ្នាំ២០២០ ហើយបន្តធា្លក់ចុះនៅជាង១៤១ដុល្លារ នៅឆ្នាំ២០២១។ ការយកពន្ធលើអង្ករកម្ពុជានេះ សហភាពអឺរ៉ុប ចាប់ផ្តើមអនុវត្តពីថ្ងៃទី១៨ ខែមករា ឆ្នាំ២០១៩ទៅ៕
Tag:
ស្រូវ-អង្ករ
ថ្លៃដើម
ទីផ្សារ
© រក្សាសិទ្ធិដោយ thmeythmey.com