អន្តរជាតិ
វ៉េណេស៊ុយអេឡាប្រកាសធ្វើសមយុទ្ធយោធា ស្របពេលស្ថានការណ៍នយោបាយតានតឹង ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរូ និងក្រុមឧត្តមសេនីយ៍ (រូបភាព The New York Times)
× ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ នៅថ្ងៃទី២៥ ខែមករា បានប្រកាសធ្វើសមយុទ្ធយោធាទ្រង់ទ្រាធំមួយនៅខែកុម្ភៈ ខណៈដែលស្ថានការណ៍នយោបាយកំពុងតែឡើងកម្ដៅខ្លាំង។ នៅពេលនេះ លោក ម៉ាឌុយរ៉ូ កំពុងប្រឈមមុខនឹងការប្រជែងអំណាចពីមេដឹកនាំប្រឆាំង ហ័ន ក្វៃដូ ដែលតាំងខ្លួនជាប្រធានាធិបតីដែរ ហើយមានអាមេរិកទទួលស្គាល់។ ទំនងបារម្ភពីការឈ្លានពាននៃកម្លាំងបរទេស លោក ម៉ាឌុយរ៉ូ អះអាងថា សមយុទ្ធខាងមុខនេះ ជាការសម្ញែងសាច់ដុំដាក់សត្រូវ។
កងទ័ពជាតិវ៉េណេស៊ុយអេឡា នឹងធ្វើសមយុទ្ធចាប់ពីថ្ងៃទី១០ ដល់ទី១៥ ខែកុម្ភៈខាងមុខ។ នេះបើតាមការប្រកាសរបស់លោកប្រធានាធិបតី នីកូឡាស់ ម៉ាឌុយរ៉ូ ក្នុងសន្និសីទសារព័ត៌មានថ្ងៃទី២៥ ខែមករា។ បើតាមលោក ម៉ាឌុយរ៉ូ ក្នុងសមយុទ្ធទ្រង់ទ្រាយធំនេះ យោធាវ៉េណេស៊ុយអេឡា នឹងហ្វឹកហាត់កម្ទេចការឈ្លានពានរបស់សត្រូវ និងបង្កើតជំនាញរបស់ពួកគេក្នុងការការពារទឹកដី ឆ្នេរ និងផ្លូវទឹករបស់ប្រទេស។
បើតាមសារព័ត៌មាន RT លោក ម៉ាឌុយរ៉ូ ដែលកំពុងប្រឈមមុខការតវ៉ារបស់ប្រជាជននោះ លើកឡើងថា កងទ័ពនឹងធ្វើឲ្យវ៉េណេស៊ុយអេឡាក្លាយជាប្រទេសដែលមិនអាចវាយប្រហារបាន ព្រោះយោធាមានសមត្ថភាពតទល់នឹងសត្រូវឈា្លនពានទាំងឡាយដែលហ៊ានបោះជើងជាន់ទឹកដីវ៉េណេស៊ុយអេឡា។ ប្រធានាធិបតីរូបនេះបន្តអួតអាងទៀតថា កងទ័ពជាតិវ៉េណេស៊ុយអេឡាមានសមត្ថភាពដល់កម្រិតជំនាញខ្ពស់បំផុតហើយ។
រដ្ឋតំបន់អាមេរិកខាងត្បូងដែលធ្លាប់តែមានបានដោយសារប្រេងមួយនេះ មានយោធាច្រើនគួរសម ដែលមានខ្ទង់កន្លះលាននាក់ឯណោះ ហើយបែងចែកជាទ័ពជើងគោក ជើងទឹក ជើងអាកាស កងឆ្មាំជាតិ និងកងជីវពលជាតិ។ ការធ្វើទំនើបកម្មកងទ័ពក៏ត្រូវបានធ្វើឡើងជាបន្តបន្ទាប់ ពិសេសតាំងពីសម័យលោក ហ៊ូហ្គោ ឆាវេស កាន់តំណែងប្រធានាធិបតីមក។
ក្នុងឆ្នាំ២០០៦ អាមេរិកក៏ដាក់បម្រាមអាវុធជាមួយវ៉េណេស៊ុយអេឡា ដែលនេះបង្ខំឲ្យរដ្ឋាភិបាលក្រុងការ៉ាកាស់ងាកទៅរករុស្ស៊ី និងចិនដើម្បីទិញអាវុធ និងគ្រឿងបរិក្ខារយោធាវិញ។ ក្នុងជួរទ័ពអាកាសរបស់ខ្លួន វ៉េណេស៊ុយអេឡាមានយន្តហោះចម្បាំង Su-30MK ដែលផលិតនៅរុស្ស៊ី និងឧទ្ធម្ភាគចក្រប្រយុទ្ធជាច្រើនគ្រឿងផង។ លើសពីនោះ វ៉េណេស៊ុយអេឡាក៏មានមីស៊ីលស៊េរីទំនើបដែលអាចបាញ់ពីលើមេឃទៅគោលដៅផ្ទៃដី និងបាញ់ពីអាកាសសំដៅកប៉ាល់ដែ។
ស្របពេលវិបត្តិនយោបាយក្នុងស្រុកកាន់តែវឹកវររហូតដល់មានសភាពីរ និងប្រធានាធិបតីពីរបែបនេះ កងទ័ពវ៉េណេស៊ុយអេឡា ក្លាយជាកម្លាំងស្នូលសម្រាប់ភាគីនយោបាយដែលចង់កាន់អំណាច។ យ៉ាងណាក្ដី កងទ័ពកំពុងឈរខាងលោក ម៉ាឌុយរ៉ូ ដដែល ហើយបានបដិសេធទទួលស្គាល់លោក ក្វៃដូ ជាមេដឹកនាំស្របច្បាប់របស់ពួកគេ។ តាមពិតទៅដោយសារមានកងទ័ពក្នុងដៃបែបនេះ ទើបលោក ម៉ាឌុយរ៉ូ អាចកាន់អំណាចបានដូចរាល់ថ្ងៃនេះ ទោះជាមានសម្ពាធអន្តរជាតិក្ដី។
Tag:
វ៉េណេស៊ុយអេឡា
នីកូឡាស់
ម៉ាឌុយរ៉ូ
© រក្សាសិទ្ធិដោយ thmeythmey.com