ជាតិ
សេដ្ឋកិច្ច
រដ្ឋាភិបាលនឹងជ្រើសរើសវិស័យមួយចំនួនទៀត ដើម្បីកំណត់ប្រាក់ឈ្នួលគោលនៅពេលខាងមុខ រូបពីហ្វេសប៊ុកសម្ដេច ហ៊ុន សែន
× ភ្នំពេញ៖ កម្មករក្រៅប្រព័ន្ធក្នុងវិស័យមួយចំនួន ក៏នឹងត្រូវរដ្ឋាភិបាលគិតគូរកំណត់ប្រាក់ឈ្នួលគោលផងដែរនៅពេលខាងមុខ។ នេះបើតាមការថ្លែងរបស់ប្រមុខរដ្ឋាភិបាលសម្ដេច ហ៊ុន សែន ក្នុងពិធីជួបសំណេះសំណាលជាមួយកម្មករ-កម្មការិនីនៅខេត្តកំពត នៅថ្ងៃទី២៥ខែមករា។
ប្រសាសន៍សម្ដេច ហ៊ុន សែន ៖
បន្ទាប់ពីសម្ដេចនាយករដ្ឋមន្ត្រីបានកោតសរសើរកសិដ្ឋានដាំចេកមួយកន្លែងក្នុងខេត្តកំពត ដែលបានកំណត់ប្រាក់ខែគោលសម្រាប់កម្មកររបស់ខ្លួនដូចកម្មករកាត់ដេរដែរ សម្ដេចបានអះអាងពីគិតគូរកំណត់ប្រាក់ឈ្នួលគោលនេះដល់កម្មករក្រៅប្រព័ន្ធសម្រាប់វិស័យមួយចំនួន នាពេលខាងមុខ។ សម្ដេចបានថ្លែងដូច្នេះថា៖«អ្វីដែលយើងត្រូវគិត កម្មករក្រៅប្រព័ន្ធ យើងក៏ត្រូវយកចិត្តទុកដាក់កំណត់ប្រាក់ឈ្នួលអប្បបរមា នៅពេលខាងមុខ ដែលត្រូវជ្រើសរើស (វិស័យ) មួយចំនួន»។
សម្ដេច ហ៊ុន សែន មិនបានបញ្ជាក់ថាការកំណត់ប្រាក់ឈ្នួលគោលសម្រាប់កម្មករក្រៅប្រព័ន្ធ នឹងត្រូវធ្វើនៅឆ្នាំណានោះទេ ដែលសម្ដេចគ្រាន់តែបញ្ជាក់ពីការគិតគូរគោលនយោបាយទៅថ្ងៃមុខអំពីការកំណត់ប្រាក់ឈ្នួលគោលសម្រាប់កម្មករក្រៅប្រព័ន្ធនេះ។
បច្ចុប្បន្នកម្មករក្នុងផ្នែកវាយនភណ្ឌ កាត់ដេរ និងផលិតស្បែកជើង ដែលទទួលបានការកំណត់ប្រាក់ឈ្នួលគោល។ ឆ្នាំ២០១៩នេះ ប្រាក់ឈ្នួលគោលនេះ ត្រូវបានកំណត់ ១៨២ដុល្លារ ដែលប្រាក់ឈ្នួលនេះត្រូវបានដំឡើងជារៀងរាល់ឆ្នាំ៕
Tag:
កម្មករ
ក្រៅប្រព័ន្ធ
© រក្សាសិទ្ធិដោយ thmeythmey.com