ជាតិ
២៥ខេត្ត/រាជធានី
លទ្ធផលពិសោធន៍៖ ដំឡូងបារាំងអាចដាំបាននៅកម្ពុជា និងហុចផលប្រមាណ២០តោនក្នុង១ហិកតា រូបភាពពីហ្វេសប៊ុកមន្ទីរព័ត៌មានខេត្តមណ្ឌលគិរី
× ភ្នំពេញ៖«ដំឡូងបារាំង ពិតជាអាចដាំបាននៅខេត្តមណ្ឌលគិរី»។ លោក ជាង ហុង ព្រឹទ្ធបុរសនៃមហាវិទ្យាល័យវិទ្យាសាស្ត្រកសិកម្ម នៃសាកលវិទ្យាល័យកសិកម្មចំការដូង អះអាងដូច្នេះ ក្នុងពេលដឹកនាំនិស្សិតមហាវិទ្យាល័យកសិកម្មចំការដូង ទៅមើលការប្រមូលផលដំឡូងបារាំងនេះ កាលពីថ្ងៃទី២០ ខែមករា និងត្រូវបាន ចុះផ្សាយក្នុងហ្វេសប៊ុកមន្ទីរព័ត៌មានខេត្តមណ្ឌលគិរី។
តាមលោក ជាង ហុង ឆ្នាំនេះជាការពិសោធន៍លើកទី៣ លើការដាំដុះដំឡូងបារាំងនៅក្រុងសែនមនោរម្យ ខេត្តមណ្ឌលគិរី។ ទោះជាទទួលទិន្នផលគួរសម តែវាមិនអាចប្រៀបនឹងបណ្តាប្រទេសមួយចំនួន ជាពិសេស ប្រទេសអ៊ឺរ៉ុបបានទេ។ នេះបើតាម លោក ជាង ហុង ដែលបន្តបញ្ជាក់ថា ដំឡូងបារាំងដែលដាំដុះនៅកម្ពុជា អាចផ្តល់ទិន្នផលពី ១៧តោន ទៅ២០តោន ក្នុង១ហិកតា ហើយអាចលក់បានថ្លៃ ៤ពាន់រៀល ក្នុងមួយគីឡូក្រាម។
នៅក្នុងដំណើរនោះដែរ លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានបញ្ជាក់ថា លទ្ធផលការដាំដុះដំឡូងបារាំងលើកទី៣នេះមានភាពល្អប្រសើរ ហើយអាចកំណត់បានពូជដែលត្រូវដាំ និងសមស្របតាមអាកាសធាតុទៀតផង។ លោក សុង ឃាង សង្ឃឹមថា ឆ្នាំក្រោយ ការដាំដំឡូងបារាំង នឹងសាយភាយដល់កសិករ ខណៈដែលតម្លៃរបស់វាក៏ថ្លៃគួរសមដែរនោះ។ ទន្ទឹមនឹងនេះ លោក សុង ឃាង នឹងផ្សព្វផ្សាយពីបច្ចេកទេសដុះ ការជ្រើសរើសពូជ ដល់កសិករផងដែរ៕
© រក្សាសិទ្ធិដោយ thmeythmey.com