ជាតិ
សេដ្ឋកិច្ច
អ្នកកំពតអាចផលិតអំបិលបានច្រើនជាងឆ្នាំមុន ដោយសារភ្លៀងធ្លាក់តិច
× :
ភ្នំពេញ៖ ការផលិតអំបិលរបស់ខេត្តកំពត នឹងផ្គត់ផ្គង់គ្រប់គ្រាន់តាមតម្រូវការប្រជាពលរដ្ឋ ទូទាំងប្រទេស បានឡើងវិញ ក្នុងឆ្នាំ២០១៩។ នេះជាក្តីសង្ឃឹមរបស់ សម្តេច ហ៊ុន សែន ថ្លែងចំពោះមុខកម្មកររោងចក្រ ជាង១១ពាន់នាក់ ក្នុងខេត្តកំពត។ ក្តីសង្ឃឹមនេះ បានដោយសារ ការព្យាករអាកាសធាតុបានបង្ហាញថា ក្នុងឆ្នាំ២០១៩ កម្ពុជាមានភ្លៀងធ្លាក់តិចជាងឆ្នាំ២០១៨។
សម្តេច ហ៊ុន សែន បានមានប្រសាសន៍ដូច្នេះ៖« ឆ្នាំ២០១៨ ការផលិតផលអំបិល មានការលំបាក ដោយសារការប្រែប្រួលអាកាសធាតុ ធ្វើឲ្យមានភ្លៀងធា្លក់ច្រើន។ ដោយឡែកឆ្នាំ២០១៩នេះ ប្រហែលជាអំបិលរបស់យើង អាចនឹងមិនមានបញ្ហាទេ ដោយសារការធ្លាក់ភ្លៀងយឹត។ បើត្រូវភ្លៀងយឹត តាមការព្យាករអាកាសធាតុមែន នោះការផលិតអំបិលរបស់យើង ដើម្បីផ្គត់ផ្គង់ទូទាំងប្រទេសនេះ គឺមិនមានបញ្ហាទេ»។
ក្នុងពិធីជួបសំណេះសំណាលជាមួយកម្មកររោងចក្រខាងលើ កាលពីថ្ងៃទី២៥ មករា សម្ដេចបានបញ្ជាក់ថា កំពត គឺជាខេត្តតែមួយគត់ នៅកម្ពុជាដែលផលិតអំបិល។
សូមរម្លឹកផងដែរ កាលឆ្នាំ២០១៨ កម្ពុជាខ្វះអំបិលចំនួន៣ម៉ឺនតោន ដើម្បីផ្គត់ផ្គង់ ខណៈដែលតម្រូវការអំបិល ក្នុងស្រុកមានចំនួន១០ម៉ឺនតោន ក្នុងមួយឆ្នាំៗ។
ដោយឡែក កាលពីចុងខែវិច្ឆិកា ឆ្នាំ២០១៨ដដែល សហគមន៍អ្នកផលិតអំបិលខេត្តកំពត-កែប បាននាំចូលអំបិលប្រមាណ១ម៉ឺនតោនពីចិន ដើម្បីបំពេញតម្រូវការក្នុងស្រុក និងគ្រោងនាំចូលបន្តបន្ទាប់ទៀត ដើម្បីឲ្យគ្រប់ចំនួននៃការខ្វះខាត។
បច្ចុប្បន្នស្រែផលិតអំបិលនៅកំពត-កែប មានផ្ទៃដីជាង៤៦០០ហិកតា៕
Tag:
ជាតិ
សេដ្ឋកិច្ច
អំបិល
កំពត
© រក្សាសិទ្ធិដោយ thmeythmey.com