ជាតិ
សង្គមជាតិ
សេដ្ឋកិច្ច
ឧត្តមក្រុមប្រឹក្សាសេដ្ឋកិច្ចជាតិ បង្កើតក្រុមការងារទាក់ទងនឹងគោលនយោបាយសេដ្ឋកិច្ចឌីជីថល រូបលោក អូន ព័ន្ធមុនីរ័ត្ន ប្រធានឧត្តមក្រុមប្រឹក្សាសេដ្ឋកិច្ចជាតិ
× ភ្នំពេញ៖ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានឧត្តមក្រុមប្រឹក្សាសេដ្ឋកិច្ចជាតិ បានផ្តល់តួនាទីឲ្យលោក វង្សី វិស្សុត ជាប្រធានក្រុមការងាររៀបចំសេចក្តីព្រាងក្របខណ្ឌគោលនយោបាយសេដ្ឋកិច្ចឌីជីថលកម្ពុជា និងលោក រស់ សីលវ៉ា លោក គង់ ម៉ារី និងលោក អ៊ុង លុយណា ជាអនុប្រធាន និងមានសមាជិកចំនួន២០រូបទៀតផងដែរ។
តាមសេចក្តីសម្រេចរបស់លោក អូន ព័ន្ធមុនីរ័ត្ន ប្រធានឧត្តមក្រុមប្រឹក្សាសេដ្ឋកិច្ចជាតិ សមាសភាពទាំង២៣រូបនេះ នឹងមានភារកិច្ច តាមដាន សិក្សាអំពីការអភិវឌ្ឍសេដ្ឋកិច្ចឌីជីថលនៅក្នុងប្រទេសកម្ពុជា និងពិភពលោក និងការគម្រាមកំហែងនៃសេដ្ឋកិច្ចឌីជីថលនៅកម្ពុជា។
លោក អូន ព័ន្ធមុនីរ័ត្ន បានបញ្ជាក់ថា ក្រុមការងាររៀបចំសេចក្តីព្រាងក្របខ័ណ្ឌគោលនយោបាយសេដ្ឋកិច្ចឌីជីថលកម្ពុជា ត្រូវមានភារកិច្ចដូចជា រៀបចំសេចក្តីព្រាងក្របខ័ណ្ឌគោលនយោបាយសេដ្ឋកិច្ចឌីជីថលកម្ពុជា ដើម្បីដាក់ជូនឧត្តមក្រុមប្រឹក្សាសេដ្ឋកិច្ចជាតិពិនិត្យសម្រេច មុនពេលដាក់ជូនសុំការអនុម័តពីរាជរដ្ឋាភិបាល, តាមដាន សិក្សា និងវាយតម្លៃនិន្នាការនៃការអភិវឌ្ឍសេដ្ឋកិច្ចឌីជីថលនៅក្នុងតំបន់ និងពិភពលោក, វាយតម្លៃចំណុចខ្លាំង និងចំណុចខ្សោយ ឱកាស និងការគម្រាមកំហែងនៃសេដ្ឋកិច្ចឌីជីថល,ធ្វើការវិភាគពីតម្រូវការផ្នែកហេដ្ឋារចនាសម្ព័ន្ធ ធនធានមនុស្ស និងគាំទ្រផ្នែកគោលនយោបាយ, រៀបចំកិច្ចប្រជុំ សិក្ខាសាលា និងទស្សនកិច្ចសិក្សាដើម្បីប្រមូលធាតុចូល និងពិគ្រោះយោបល់តាមការចាំបាច់។
សមាសភាពទាំង២៣រូបនេះ ត្រូវចូលរួមអនុវត្តការងារ និងចូលរូមកិច្ចប្រជុំនានា ដែលពាក់ព័ន្ធនឹងកិច្ចការនេះ តាមការណែនាំរបស់ប្រធានក្រុម។ ក្នុងសេចក្តីរបស់លោកក៏បានបញ្ជាក់ដែរថា ក្រុមការងារទាំង២៣រូបនេះ អាចមានសិទ្ធិអញ្ជើញថ្នាក់ដឹកនាំ និងមន្ត្រីជំនាញមកពីក្រសួង ស្ថាប័ន និងដៃគូអភិវឌ្ឍនានាធ្វើការពិគ្រោះយោបល់ផងដែរ៕
© រក្សាសិទ្ធិដោយ thmeythmey.com